Nehemi 11 - Gourmanchéma Bible

¹ Isalele yaaba yudanba den kali Jelusalema. Yaaba n sieni den toani tiatia ke niba piiga siiga niyendo n cua ki yaa ye Jelusalema u dogagidiko nni ke yaaba n sieni mo n yaa ye yaa dogi n sieni yaa niinni.

² Bi niba den gaali yaaba n den tuo bi yama po ke bi baa yaa ye Jelusalema kuli.

³ Yaa dogi n sieni niinni Isalele yaaba, yaaba n sieni, leni bi kopadicianba leni Lefi buolu yaaba leni U Tienu diegu naacenba leni Salomono naacenba yaaba den kaa bi tincele nni, yua kuli o yaa dogu nni. Juda diema yudanba den ye Jelusalema.

⁴ Juda buolu yaaba leni Benjamina buolu yaaba bi tianba den kali Jelusalema. Juda buolu yaaba, yaaba n den kali nne: Ataja, yua n den tie Peletisa yaabili. Peletisa den mali Mahalaleeli, Mahalaleeli n maa Sefatia, Sefatia n maa Amalia, Amalia n maa Sakali, Sakali n maa Osiasi, Osiasi mo n maa wani Ataya.

⁵ Juda buolu yua, yua n go den kali nne: Maaseja yua n den tie Siloni yaabili. Siloni den mali Sakali, Sakali n maa Joyalibi, Joyalibi n maa Adaya, Adaya n maa Hasaja, Hasaja n maa Koli-Hose, Koli-Hose n maa Baluki, Baluki mo n maa wani Maaseja.

⁶ Peletisa buolu yaaba, yaaba n den kali Jelusalema kuli den taani ki tie kobinaa n piiluoba n jakoanda nii.

⁷ Benjamina buolu yaaba, yaaba n den kali nne: Salu, yua n den tie Esayi yaabili. Esayi den mali Itieli, Itieli n maa Maaseja, Maaseja n maa Kolaja, Kolaja n maa Pedaya, Pedaya n maa Joyedi, Joyedi n maa Mesulami, Mesulami mo n maa wani Salu.

⁸ O yaa puoli li go den pia Gabayi leni Salayi. Bikuli den tie kobiyia n piilie n niba nii.

⁹ Sikili bijua Joeli den tie bi yudaano. Senua bijua Juda mo den tie u dogu yudaano duogili.

¹⁰ Bi kopadicianba siiga yaaba n den kali Jelusalema den tie: Joyalibi bijua Yedayeya leni Jakini,

¹¹ leni Selaja, yua n den tie U Tienu diegu kopadicianba bado Ahitubi yaabili. Ahitubi den mali Melajoti, Melajoti n maa Tisadoki, Tisadoki n maa Mesulami, Mesulami n maa Hilikiya, Hilikiya mo n maa wani Selaja.

¹² Li den tie bani leni bi lieba kobinii n piilie n bilie yaaba n den tuuni U Tienu diegu nni. Li go den pia Malikiya yaabili Adaya. Malikiya den mali Pasuli, Pasuli n maa Sakali, Sakali n maa Amitisi, Amitisi n maa Pelalia, Pelalia n maa Jelokami, Jelokami mo n maa wani Adaja.

¹³ O yaa puoli li go den pia diedanba kobilie n piinaa n bilie yaaba n tie o kpiiba, leni Imeli yaabili Amasisayi. Imeli den mali Mesilemoti, Mesilemoti n maa Akisayi, Akisayi n maa Asaleeli, Asaleeli mo n maa wani Amasisayi.

¹⁴ Li den tie bani leni bi lieba kobiga n piilie n jakoanda nii. Gedolimi bijua Sabidieli n den tie bi yudaano.

¹⁵ Lefi buolu yaaba siiga yaaba n den kali Jelusalema den tie: Buni yaabili Semayeja. Buni den mali Hasabia, Hasabia n maa Asilikama, Asilikama n maa Hasubi, Hasubi mo n maa wani Semayeja.

¹⁶ Li den tie wani leni Sabetayi leni Josabadi, yaaba n den tie Lefi buolu yaaba siiga yudanba, ki die U Tienu diegu niinpo tuona maama,

¹⁷ leni Asafi yaabili Matania, yua n den tie Sabidi bijua Mise yaa bijua ki gobidi ti pagidi yani i jaandi yogunu, leni Bakibukia, o kpiiba siiga yua n den gobidi ki todi o leni Jedutuni yaabili Abida, Galali bijua Samua yaa bijua.

¹⁸ Lefi buolu yaaba, yaaba n den ye u dogagidiko nni kuli taanma den tie kobilie n piinii n niba naa.

¹⁹ A buliñoaguuda mo den tie Akubi, Talimona leni bi buliñoaguudilieba. Bikuli den taani ki tie kobiga n piilele n niba lie.

²⁰ Isalele yaaba, yaaba n sieni leni bi kopadicianba leni Lefi buolu yaaba den kakali Juda dogi kuli nni, yua kuli o tincele nni.

²¹ U Tienu diegu naacenba den kali Ofeli Ñianjaali, ki juaga po. Bi yudanba den tie Tisisa leni Gisipa.

²² Yua n den tie Lefi buolu yaaba yudaano Jelusalema dogu nni den tie Mise yaabili Usi. Mise den mali Matania, Matania n maa Hasabia, Hasabia n maa Bani, Bani mo n maa wani Usi. O den tie Asafi buolu yua, yaa buolu yaaba n den die i yani maama U Tienu diegu nni.

²³ O bado den ñani li ñoabonli bi yanyanba po ki go bili bi panpaani daali kuli po.

²⁴ Juda buolu yua Salaki yaabili Mesesabeeli bijua Petaya den ye o bado diegu nni ki tuuni yaala n tie Isalele yaaba*ŋantaadi kuli po.

Yaa Jufinba n ki den kali Jelusalema

²⁵ Juda buolu yaaba bi tianba den kali a dobila leni a koajaana nni. Bi den kali Kilijati-Aliba leni u tinkundogi nni, Diboni leni u tinkundogi nni Jekabitiseeli leni u tinkundogi nni,

²⁶ Jesua Molada, Beti-Paleti,

²⁷ Hatisali-Suali, Beli-Seba leni u tinkundogi nni,

²⁸ Tisikilagi, Mekona leni u tinkundogi nni,

²⁹ Eni-Limoni, Tisolea, Jalimuti,

³⁰ Sanoa, Adulama leni yi tinkundogi nni, Lakisi leni u lindima, Aseka leni u tinkundogi nni. Bi den kakali ki cili Beli-Seba ki taa ki yaa caa hali Hinomi joaloangu.

³¹ Benjamina buolu yaaba den kaa Geba dogi nni, Mikimasi, Aya, Betela leni u tinkundogi nni,

³² Anatoti, Nobi, Hanania,

³³ Hasoli, Lama, Gitayimi,

³⁴ Hadidi, Tiseboyima, Nebalati,

³⁵ Lodi, Ono leni a tuonsoanbanda Joaloangu nni.

³⁶ Li den baa Lefi buolu yaaba, yaaba n taani Benjamina buolu yaaba po baa ke bi den boagidi ki taani ba Juda yaa buolu yaaba yaa po.