Mi Coadima 3 - Gourmanchéma Bible

¹ Diidi Alono leni Musa puoliŋuani, Li Miali Diedo n den maadi leni Musa Sinayi juali kani yaa yogunu.

² Diidi Alono bijaba yela n ne: O bijakpelo den yi Nadabi. Yaaba n den ŋua wani mo den tie: Abihu, Eleyasala leni Itamali.

³ Alono bijaba yaaba n den baa mi gagidima, ki den dini li kopadicianbali ki baa yaa tuuni li kopadician-tuonli n yeni.

⁴ Nadabi leni Abihu den kpe Li Miali Diedo nintuali kelima bi den cuani Li Miali Diedo nintuali fantantoama Sinayi fanpienma nni. Baa den pia bila. Eleyasala leni Itamali n den tuuni li kopadician-tuonli ke bi baa Alono gobidi ba.

⁵ Li Miali Diedo den maadi leni Musa ki yedi:

⁶ «Yini Lefi buolu yaaba ki taa ba ki teni o kopadiciamo Alono ke ban yaa todi o.

⁷ Bi baa yaa tuuni u *Kadikaanu gbandieli nintuali kani ban puogi ba yaa tuona Alono po leni Isalele yaaba nitaanli kuli po. Bi baa yaa tuuni li gbandieli tuona.

⁸ Bi baa yaa gu u Kadikaanu gbandieli tiadi kuli leni ban piani Isalele yaaba yaala kuli. Bi baa yaa tuuni li gbandieli tuona.

⁹ Ŋan taa Lefi buolu yaaba ki teni Alono leni o bijaba, ban yaa tuuni bipo Isalele yaaba kuli yeli nni.

¹⁰ Ŋan teni Alono leni o bijaba yo n yaa tuuni li kopadician-tuonli. Yua n ki tie Alono buolu yua yaa nagini likani se wan kpe.»

¹¹ Li Miali Diedo den maadi leni Musa ki yedi:

¹² «Diidi n gandi Lefi buolu yaaba Isalele yaaba siiga ke bi ga Isalele yaaba bijakpeliba bikpiala kuli kaanu. Mini n baa yaa die Lefi buolu yaaba.

¹³ Kelima mini n die bonjakpiaga kuli. Min den ku Ejipiti yaaba bonjakpiala kuli yaa daali, n den ŋa n yuli po Isalele nni bonjakpiala kuli. Mini n die bi niba bonjakpiala leni ti yandi kuli yaa bontonkpiamu. N tie Li Miali Diedo.»

Lefi buolu yaaba coadikpiali

¹⁴ Li Miali Diedo den maadi leni Musa Sinayi fanpienma nni ki yedi:

¹⁵ «Ŋan ŋoadi Lefi bijaba ki coadi bi diedi leni bi cubuliñoana. Ŋan coadi bi jaba ki cili yaaba n pia ŋmaalo leni yaaba n cie yeni.»

¹⁶ Musa den ŋoadi ki coadi ba nani Li Miali Diedo n den teni o li ñoabonli maama

¹⁷ Lefi bijaba yela n ne: Gelisoni, Kehati, leni Melali.

¹⁸ Diidi Gelisoni bijaba yela ki ŋoadi bi cubuliñoana n den tie maama. Lani n den tie Libini leni Simeyi.

¹⁹ Kehati bijaba nani bi cubuliñoana n den tie maama, lan den tie: Amilama, Yitisehali, Ebiloni leni Usieli.

²⁰ Melali mo yaa bijaba nani bi cubuliñoana n den tie maama. Lan den tie: Mali leni Musi. Lan den tie Lefi buolu yaaba diedi ki ŋoadi cubuliñoabu cubuliñoabu.

²¹ Gelisoni n den tie Libini cubuliñoabu leni Simeyi cubuliñoabu yaa yaaja. Laa cubuliñoana n tie Gelisoni puoliŋuani.

²² Ban den coadi yaaba kuli ki cili yaa jaba n den pia ŋmayendo leni yaaba n den cie yeni kuli den taani ki fii niba tudalele n kobimuu (7 500).

²³ Gelisoni puoliŋuani yaa cubuliñoana den kpaagi bi naga li gbandieli puoli ki goa nintuali po.

²⁴ Gelisoni puoliŋuani yudaano den tie Layeli bijua Eliasafi.

²⁵ Bi den puogi Gelisoni puoliŋuani u Kadikaanu gbandieli kubima leni u *kaangagidiŋamu kubima, leni li gbandieli leni yaa kpalibu n den liibi li leni yaa*kpalidoaginkaabu n ye u Kadikaanu buliñoabu po.

²⁶ Bani n go den kubi u luolu caba, u luolu buliñoabu kpalidoaginkaabu, li gbandieli gaani lindima leni li*padibinbinli, leni li gbandieli baabi kuli.

²⁷ Kehati n den tie Amilama cubuliñoabu, Yitisehali cubuliñoabu, Ebiloni cubuliñoabu leni Usieli cubuliñoabu yaa yaaja. Bani n den tie Kehati puoliŋuani yaa cubuliñoana.

²⁸ Ban den coadi bi jaba kuli ki cili yaaba n den pia ŋmaalo leni yaaba n den cie yeni kuli den taani ki fii niba tudanii n kobiluoba (8 600). Bani n den gu u kaangagidiŋamu.

²⁹ Kehati cubuliñoabu den kpaagi bi nagili li gbandieli ganu po.

³⁰ Kehati puoliŋuani yaa yudaano den tie Usieli bijua Elitisafani.

³¹ Bi den puogi bani Kehati buolu yaaba ban guudi ku*ŋantaadikpaku leni yaa tabilo ke bi yen maandi ban gagidi U Tienu po yaa dupen leni u fidisantuankaanu, a padibinbina, u kaangagidiŋamu tiadi, leni ban tuuni leni yaa tiadi, bu kpalidoaginkaabu leni yaala n den ye lienni kuli.

³² Lefi buolu yaaba yudanciamo den tie o kopadiciamo Alono bijua Eleyasala. Wani n den gobidi yaaba n den gu u kaangagidiŋamu.

³³ Melali n den tie Mali cubuliñoabu leni Musi cubuliñoabu yaa yaaja. Bani n den tie Melali puoliŋuani yaa cubuliñoana.

³⁴ Ban den coadi yaaba, ki cili yaa jaba n den pia ŋmaalo leni yaaba n den cie yeni, den taani ki fii tudaluoba n niba kobilie (6 200).

³⁵ Melali cubuliñoana yudaano den tie Abihayili bijua Tudiyeli. Bi den kpaagi bi nagili li gbandieli jienu po.

³⁶ Bi den piani bane li gbandieli daadi, li kudoe, li dasaana, li bunbuna, li tiabibidi kuli leni yaa tiadi n den ye lienni kuli.

³⁷ Bani n go den kubi u luolu dasaana leni u bunbuna, u kpaana leni u baabi.

³⁸ Yaaba n den kpaagi bi nagili ki ku u kaangagidiŋamu ki goa puoli po, lan tie u Kadikaanu gbandieli nintuali den tie Musa, Alono leni o bijaba. Bi den tuuni li gbandieli tuonli Isalele yaaba kuli po. Yua n ki den tie Alono buolu yua yaa den nagini likani se wan kpe.

³⁹ Musa leni Alono n den coadi Lefi buolu yaaba nani Li Miali Diedo n den yedi maama, ki ŋoadi bi cubuliñoana, yaa jaba n den pia ŋmaalo leni yaaba n den cie yeni den taani ki fii tudapiilie n niba tudalie (22 000).

A bikpiala daafaabima

⁴⁰ Li Miali Diedo den yedi Musa: «Coadi Isalele yaaba bonjakpiala kuli, ki cili yaaba n pia ŋmaalo leni yaaba n cie yeni. Ŋan diani bikuli yela.

⁴¹ Ŋan paadi Lefi buolu yaaba ke ban ga npo Isalele yaaba bonjakpiala kaanu, ki yaa tie mini Li Miali Diedo n die yaaba. Bi yandi moko baa ga npo Isalele yaaba yandi yantonkpiamu kaanu, ki yaa tie min die yaa yandi.»

⁴² Musa den coadi Isalele yaaba bonjakpiala kuli nani Li Miali Diedo n den yedi o maama.

⁴³ Ban den coadi Isalele yaaba bonjakpiala yaaba, ki cili yaaba n pia ŋmaalo leni yaaba n den cie yeni kuli den taani ki fii tudapiilie n tudalie n piilele n niba taa (22 273).

⁴⁴ Li Miali Diedo den maadi leni Musa ki yedi:

⁴⁵ «Ŋan paadi Lefi buolu yaaba ke ban ga npo Isalele yaaba bonjakpiala kaanu ki yaa tie mini Li Miali Diedo n die yaaba. Ŋan paadi bi yandi moko ke tin ga Isalele yaaba yantonkpiamu kaanu, ki yaa tie mini Li Miali Diedo n die yaa yandi. Lefi yaaba baa yaa tie min die yaaba. N tie Li Miali Diedo.

⁴⁶ Isalele yaaba bonjakpiala coali cie Lefi buolu yaaba kobilie n piilele n niba taa. Bi yaa *daafaabima tie line:

⁴⁷ Ŋan bili kujapiena muu pani yua kuli po. Ŋan baa ga yaa kujapiena yeni kpiagu n yaa de leni u kaangagidiŋamu yaa kujapienli kpiagu, lani n tie gela piilie.

⁴⁸ Ŋan teni Alono leni o bijaba laa kujapiena yaa niba n paani yeni yaa daafaabima po.»

⁴⁹ Musa den ga a kujapiena yeni yaaba n den paani kaa den pia Lefi buolu yaaba daafaabima yeni kani.

⁵⁰ O den ga i ligi Isalele yaaba bonjakpiala kani, ke li den tie tudili n kobitaa n piiluoba n kujapiena muu (1 365), nani u kaangagidiŋamu yaa kujapienli yeni.

⁵¹ Musa den taa mi daafaabima kujapiena ki teni Alono leni o bijaba ki ŋoadi Li Miali Diedo ñoabonli, nani Li Miali Diedo n den puogi Musa maama.