Mi cilima 3 - Gourmanchéma Bible

¹ U Tienu n den tagi yaa moayandi kuli yaa siiga, o wa den fani ki cie bikuli. O wa yeni den yedi o pua: «Naani li tie moamoani ke Li Miali Diedo yedi: ‹Yin da ŋmani u koaŋamu yaa tiidi yaa bonluonkaala kuli?› »

² O pua den yedi o wa: «Ti baa fidi ki ŋmani u koaŋamu tiidi yaa bonluonkaala.

³ Ama yaa tibu n se u koaŋamu siiga yaa bonluonkaala wani, U Tienu den yedi: ‹Yin da ŋmani la ki da sii la mo ke yin da ti kpe.› »

⁴ O wa den yedi o pua: «Yi kan kpe ba.

⁵ Li tie kelima U Tienu bani ke yi yaa ŋmani la yaa daali, yi nuni baa ŋubidi ke yi baa yaa tie nani U Tienu yeni ki bani mi ŋanma leni mi biadima.»

⁶ O pua den laa ke bu tibu bonluonkaala ŋani li bonjekaala po, ki go ŋani bu nunbu po ki tie yaa bonbuadila n baa teni ke o nilo n baa mi yanfuoma. O den cie bu bonluonkaala ki ŋmani ki puni o calo, yua n den ye o kani, ke omo ŋmani.

⁷ Bani kuli yaa nuni den ŋubidi ke bi den bandi ke bi ye mubima. Bi den ŋali bu kankanbu yaa faadi ki tieni a banda.

⁸ Bi den gbadi Li Miali Diedo U Tienu yaa nialu ke o den goadi u koaŋamu nni ku yenjoboandigu. O ja leni o pua den sani ki wuoni u koaŋamu tiidi yaa siiga ki foagidi leni Li Miali Diedo U Tienu nunga.

⁹ Li Miali Diedo U Tienu den yini o ja ki yedi o: «A ye le?»

¹⁰ O den yedi: «N gbadi a nialu u koaŋamu nni ki jie kelima n ye mubima ke n sani ki wuoni.»

¹¹ Li Miali Diedo U Tienu den yedi: «Ŋme n waani a ke a ye mubima? Naani a ŋmani min den kuani a ke ŋan da ŋmani yaa tibu yaa bonluonkaala?»

¹² O ja den yedi: «Ŋan den puni nni yaa pua yeni wani n teni nni bu tibu yaa bonluonkaala ke n ŋmani.»

¹³ Li Miali Diedo U Tienu den yedi o pua: «Be yaa po yo ke a tieni line?» O pua den yedi: «O wa n boandi nni ke n ŋmani.»

¹⁴ Li Miali Diedo U Tienu den yedi o wa: «Kelima a tieni lani, A baa yaa tie ti solindi yua ti denyandi kuli yaa siiga Leni ti moayandi kuli yaa siiga, A baa fuli a tugu po Ki yaa di mi tama hali a miali dana kuli.

¹⁵ N baa bili ti yibalindi fini leni o pua yaa siiga, A puoliŋuani leni o puoliŋuani yaa siiga. O baa mudi a yuli, Amo baa poagili o taajentindili.»

¹⁶ O den yedi o pua: «N baa pugini apo fala ŋan punbi yaa yogunu. A baa maa leni fala. A gbanandi bonbuakaala baa ŋoadi a calo yaala, Ama o baa diedi a.»

¹⁷ O den yedi o ja: «Kelima a cengi a pua yaa maama Ki ŋmani min den kuani a ŋan da ŋmani yaa tibu yaa bonluonkaala, Ki tinga baa tua ti solindi yaaga kelima fini yaa po. A baa baadi ki niinni a bonjekaala leni fala Hali a miali dana kuli.

¹⁸ Ti moabiaditi leni i konkoni baa pudi ki tinga nni, A baa yaa di yaa bonjekaala n ye u kuanu nni.

¹⁹ A baa soani li tuonli ki mande ki nan baa li bonjekaala Hali ŋan baa goa ki tinga nni, Ŋan den ñani naankani, Kelima a tie mi tama ki go baa guani mi tama nni.»

²⁰ Adama den cili o pua yeli Awa, kelima o den tie miali fo kuli yaa naa.

²¹ Li Miali Diedo U Tienu den tieni ti gbandi yaa liada Adama leni o pua po, ki lani ba.

²² Li Miali Diedo U Tienu den yedi: «O ja kpandi ki tua nani tinba yeni ki bandi mi ŋanma leni mi biadima. Tin yie opo moala ke wan da tandi o nuu ki cie li miali tibu yaa bonluonkaala ki ŋmani ki yaa ye ki naa pia juodima.»

²³ Li Miali Diedo U Tienu den deli Adama Edena koaŋamu nni ke wan yaa ko ki tinga wan ñani yaaga yaa niinni yeni.

²⁴ Wan den deli Adama yeni, o den sieni *selubanba ke bi fuundi yaa jugisiemu n pia mi fantama Edena yaa koaŋamu puoli ke ban yaa guu li miali tibu yaa sanu.