Mise 7 - Gourmanchéma Bible

¹ Ŋain, n tie nani yaa nilo n fii Ki baan cie o tiidi bonluonkaala u jetaagu taanma n pendi yaa yogunu yeni. Ama wan ban pundi waa laa wan baa je yaala. Waa laa o yama n bi ye yaa bonluonka-kpiala nni, Baa bonyenli bu tibu po.

² Bi niŋanba kuli bodi, baa yendo naa go ye mi diema nni. Yaaba n tiegi kuli gbeni bi niba siiga, Bi niba kuli wuoni ki bua ki bibi bi lieba ki kpa ba. Nilo kuli dia o kpiilo ku diagu ki bua ki cuo o.

³ Bi niba kuli nii maani yaala n bia tienma. Bi yudanba kan tieni pu se ki ga li suuli. Bi bujiaba moko dia bi niba a suuna. A nikpiaga doagidi yaa nunponbiadili n pia ba. Bikuli n taani ki tuu ñoabu.

⁴ Bi siiga yua n ŋani ki cie bia nani ku konkongu yeni, Yua n tiegi ki cie moko bia ki cie ti konkondi tuugu. Yinba mi diema niba, bi sawalipuaba n den tuodi Ki maadi yipo yaa daali, Yi tundifala daali yeni nagini. Laa yogunu yi gbanu baa wudi.

⁵ Da dugi mani yi nikpiaba po. Da jigini mani yi buakaaba po. Kubi mani yi ñoaniani yi puoba nintuali. Bani yaaba n dua ki taabi yi yeni.

⁶ Ki bonjaga fali o baa, Ki bonpuoga mo fiini mi yiema o naa po. Ki biyuaga mo o yaanaa po, Yua kuli yibali tie o diegu yua yo.

⁷ Ama mini, n baa diidi Li Miali Diedo yo, Ki bili n suginma wani n *faabima Tienu kani, Wani n Tienu baa tuo n miabu.

Ti dugidi U Tienu niñingbadima po

⁸ Ti yibalinba, da mangi mani yi pala tipo, Baa ti yaa baa, ti go baa fii Baa ti yaa ka li *biigili nni, Li Miali Diedo tie ti yenma.

⁹ Ti tieni ti *tuonbiadi Li Miali Diedo po, Lanwani ti baa juuni o pabienli tundifala po, Hali wan baa ti ga ti buudi yaa yogunu, Ki faligi yaaba n faligidi ti ki saa tipo moamoani. O baa ñani ti li biigili nni ki gedini ti naankani n yieni, Ki baa ŋanbi tipo.

¹⁰ Ti yibalinba baa le lankuli i fe n cuo ba, Bani yaaba n tua ti, Li Miali Diedo yi Tienu ye le? Bi baa ŋma ti yibalinba nani u sanu nni moamoadi yeni.

¹¹ Yinba Isalele yaaba, yaa daali ke bi baa goa ki maa Yaa bilinciami n lindi ki cebini yi dociamu Jelusalema, Bi baa diadi yi diema.

¹² Laa daali yeni a niba baa ña Asili diema nni yaama n ye jienu po. Bine n ña hali Ejipiti dogi nni, yi n ye ganu po, Bine mo baa ña Tili dogu yu n ye nintuali, Bine mo n ña hali u kpenciamu Yufilata yu n ye puoli po. Bi baa ña mi ñincianma jaana po leni a juana nni ki kpeni.

¹³ Ama li ŋandunli yaaba, Yaaba n sieni baa bodi kelima bi tuonbiadi po.

U Tienu baa gbadi Isalele yaaba po mi niñima

¹⁴ U Tienu, taa a yankpaagbiamu ki yaa kpaa a niba, Bani yaa nigoli n tie a piama yeni, Bani, yaaba n ye bi bebe Kalimeli fuasieli Ki pia yaa tisoangidi n yaba leni yaa yankpaakaani n yaba. Ŋan go yaa kpaa ba nani ŋan den kpa kpaa ba maama Yaa yankpaakaani n ŋani boncianla ki ye Basana leni Galaadi diema nni yeni.

¹⁵ U Tienu yedi: «N baa teni yin go le mi bancianma, Nani yin den ñani Ejipiti nni yaa yogunu yeni.

¹⁶ I nilanbuoli yaaba baa ti le lankuli i fe n cuo ba, Baa leni ban pia yaa paalu kuli. Bi baa pii bi ñoana, Bi tuba mo baa womi.

¹⁷ Bi baa liagi mi tama nani i we Nani yaala n balini ki tinga nni kuli yeni. Ti jawaandi baa cuo ba ban ña bi diepaala nni, Ki cua Li Miali Diedo ti Tienu nintuali ki digibi.» U Tienu, bi baa jie ŋa, ki fangi a.

¹⁸ Ŋme n naani leni fini U Tienu, Fini yua n puuni a niba yaaba n sieni sugili bi tuonbiadi po? Ŋaa kubi a pabienli yogunu kuli, Kelima mi niñingbadima mani apo.

¹⁹ A go baa gbadi tipo mi niñima, Ki ŋma ti tuonbiadi a taana tiipo, Ki lu ti mi ñincianma tiipo.

²⁰ A baa waani tinba a niba Jakobo puoliŋuani A buama yaama n ki pia lebidima, Ki go waani tinba Abalahama puoliŋuani a*ŋanbili, Nani ŋan den poli ki niani ti yaajanba, Hali yogunu maama.