Mise 6 - Gourmanchéma Bible

¹ Lanwani cengi mani Li Miali Diedo n yedi nni yaala: «Fii ki bu a buudi a joaciama nintuali, ŋan tua a siedinba A joabila moko n gbadi a yedima!

² N den yedi: ‹Yinba, a joaciama leni ki tinga tanpupaala, Cengi mani Li Miali Diedo n baa bu yaa buudi, Kelima o pia ti buudi ki baa bu leni o niba. O bua ki bu leni bani Isalele yaaba.›

³ O yedi: ‹N niba, n tieni yi be? N coagi yi leni be? Waani nni mani.

⁴ N den ñani yi Ejipiti nni ki cuani yi ne, N den faabi yi leni ti yonbidi, Ki soani Musa, Alono leni Miliyami Ke bi tua yi liiga yaaba ki gobidi yi.

⁵ N niba, tiadi mani Moabi bado *Balaaka n den jagi Ke o baa tieni yi yaa bonbiadila, Ki go tiadi Beola bijua *Balaama n den guani o yaa maama. Tiadi mani yaala n den tieni li sancenli nni kuli, Ki cili Sitimi ki pundi hali Giligali. Tiadi mani lankuli ki bandi mini Li Miali Diedo N den tieni yipo yaa *ŋanbili kuli.› »

U Tienu n bua bi nisaaliba n ŋoadi o maama

⁶ N baa cua Li Miali Diedo nintuali leni be? N baa pugi Tanpojoma Tienu leni be? Naani n baa cua leni yaa naabila n pia binyenli yenli yo Ki padi opo a *padijuukaana bi?

⁷ Naani Li Miali Diedo pali baa mangi N yaa cuani opo i pe tudatuda bam? Naani Li Miali Diedo bua yaa kpama n baa gbieni I kpenciami tudatuda bam yo? Naani n baa taa n bonjakpiaga ki padi ga li padili Ki mia sugili n yiema leni n yanmaalibiadima po bi?

⁸ U Tienu den bangi fini o nisaalo yaala n ŋani. Leni Li Miali Diedo n gu akani yaala. Lani n tie ke ŋan yaa ŋua yaa bujiali n tiegi, Ki bua mi teginma Ki go yaa cuoni wani a Tienu nintuali leni li yumiinli.

U Tienu fu leni i janbi leni li mabinli danba

⁹ Li Miali Diedo maadi leni u dogu niba, O baa faabi yaaba n tuo o bali, Cengi mani Juda yaaba, yinba yaaba n taani ki kaa u dogu nni:

¹⁰ «Naani n baa fidi ki cedi bi nibiadiba n yaa kubi Bi diedi nni ban den janbi ki baa yaa ŋalimano, Leni yaa *bonbiigikaala n kaa dagidi, Mini U Tienu n solini yaala?

¹¹ Yaaba n kubi i boandi bonbiigikaala Ki go ŋuuni bi boaga nni yaa bonbiigikaala n tie mi faama. Naani laa niba tiegi mini U Tienu nuni po bi?

¹² U dogu nni piada mabindi a luoda. U dogu nni yaaba kuli pua mi faama ki janbidi bi lieba.

¹³ Li tie lani yaa po ke n teni ke fala baa yinba u dogu na yaaba. N baa bolini yi kelima yi *tuonbiadi po.

¹⁴ Yi baa di ki kan guo, Koma kan ña yipo. Yin baa bili yaa kpaandi ke tin faa ki todi yi, Kan kuani yi fuoma, Baa yin baa kubi yaala, n baa teni bu toabu n bolini likuli.

¹⁵ Yi baa coagi ti jaadi ki kan yendi. Yi baa ŋoali ki ñandi *olifie bonluonkaala kpama, Ama yi kan sogi ma, Yi baa tuodi duven tiidi bonluonkaala, Ama yi kan ño li duven.

¹⁶ Yikuli ŋoadi o bado Omili n den bili yaa bogidibiada, Leni wani Omili bijua Akabi puoliŋuani N den tiendi yaala kuli. Yi ŋua ki kubi ban den jagi ki bili yaa bonbiadila. Li tie lani yaa po ke n baa taa yi Ki teni yi yibalinba nuu nni ban bolini yi. Fini u dogu, n baa teni a niba n tua bi niba po laadi bonla. Yi baa tugi ban den n fiagidi n niba yaa fe.»