Mise 5 - Gourmanchéma Bible

¹ Fini Betelema-Yufilata dogu, A wa Juda buoli dogi kuli siiga Ama yua n baa die Isalele yaaba Baa ña a niini, Wani yua n den ye yaa yogunu n kpeli.

² Lani yaa po U Tienu baa ŋa o niba bi yibalinba nuu nni, Hali yaa pua n baa maa ki bonjaga yeni Yaa mali ga yaa yogunu. Lanwani ki biga yeni kpiiba yaaba n sieni Ki ye foagima baa goa ki kpeni Bi lieba Isalele yaaba diema nni.

³ O yaa cua o baa yaa kpaa ba, Leni Li Miali Diedo paalu, O baa gobidi leni wani Li Miali Diedo o Tienu kpiagidi. O niba jigi baa co Kelima yaaba n ye hali ŋanduna banlu kuli Baa kpiagidi wani bi bado.

⁴ Wani n baa cuani mi yanduanma. Asili yaaba yaa cua ti diema nni Ki kua hali ti dieŋama nni. Ti baa teni bi yudanba boncianla n fii ki sedi bipo.

⁵ Bi baa diedi Asili diema, leni Nemilodi diema leni bi jatiadi. Bi yaa ŋma ti tinga nni, Ban baa maa yua yeni baa faabi ti bi nuu nni. Bi yaa kua ti diema nni, ki ŋma ti tinga nni Bi baa faabi ti Asili yaaba nuu nni.

Isalele yaaba, yaaba n baa sieni

⁶ Lanyogunu Jakobo puoliŋuani yi n sieni Baa ye yaa nibuoli n yaba siiga. Nani yaa mangu n ña Li Miali Diedo kani ki kuugi, Nani ki taaga n mini ki ŋa yaa ñinboala ti muadi po yeni, Ki taaga yeni naa guu bi niba kani liba. Bi nisaaliba mo ka cuani ga.

⁷ Jakobo puoliŋuani yaaba sieni mo baa ye, Yaa nilanbuoli n yaba yaa siiga Nani yaa yangbanlo n ye ti fuayandi siiga, Yaaka nani yaa yangbanlo n ye a pegola siiga yeni. O yaa cuoni bi siiga, o bibini ki padi, Oba kuli kan ga ba o kani.

⁸ Isalele yaaba, pua mani yi yibalinba, Ki bolini bani yi nanda kuli.

Li Miali Diedo baa bolini yaala n tie bi niba suginma

⁹ Li Miali Diedo go yedi: «Laa daali n baa bolini yin pia yaa taami kuli, Ki go bolini yin pia yaa toateliti kuli.

¹⁰ N baa bolini yaa dogi n ye yi diema nni kuli, Ki go bolini yin den maa yaa diepaala bu toabu po.

¹¹ N baa bolini yin kubi yaa buligbandi yi nuu nni. A lingida kan go yaa ye yi siiga.

¹² N baa bolini yi *buli leni yi buli nannana yi siiga, Ke yi kan go gbaani ki pugi yi nii n den tagi yaala yeni.

¹³ N baa fobi yin den caani yi diema nni *Akela budaadi yaadi yeni, Ki go bolini yi dogi.

¹⁴ N pali fii boncianla, Ke n baa bu ki cuo yaa nilanbuoli n kaa den cengi n yedima.»