Mise 4 - Gourmanchéma Bible

¹ Mi juodima yogunu yaa pundi, Li Miali Diedo bili, Ke o diegu n ye yaa juali po Baa kpedi ki cie a joabila kuli, Baa a joaciama moko. I nibuoli baa tigibi ki caa likani.

² I nilanbuoli boncianla baa caa likani ki tua biyaba: «Cua mani tin do Li Miali Diedo juali yuli po, Wani Jakobo Tienu diegu kani, Ke wan bangi ti o sani, Ke tin yaa cuoni yini yaa niinni.» Kelima li tie Siyono po yo ke li *bali maama baa ña, Li Miali Diedo maama baa ña Jelusalema.

³ O baa tua i nibuoli boncianla bujialo O baa tua yaa nilanbuoli n pia u paalu Ki ye hali foagima koanpaado. Bi baa taa bi jugisiemu ki maa a cecela Bi baa taa bi kpaana mo ki maa ti moaciedi. Nibuoluba kan go fii ki tuogi uyu. Bi kan go bangi bu toabu n tiendi maama.

⁴ Nilo kuli baa kaa o duven tiidi soangu nni Leni o kankanŋuuke soangu nni. Yua n baa teni bi niba n jie kan go yaa ye, Kelima Li Miali Diedo U Paaciamu Kuli Daano Ñoabu n maadi ki yedi ke li baa tie yeni.

⁵ I nilanbuoli kuli ŋua ban nua yaala nani ke li tie U Tienu yeni, Tinba wani ŋua Li Miali Diedo ti Tienu Hali yaa yogu n tu yaa yogu.

Isalele yaaba baa ña ti yonbidi nni ki goa

⁶ Li Miali Diedo yedi: «Laa daali n baa goa ki taani n pe, yaaba n poagili, N baa goa ki taani ban den deli ki yadi yaaba, Min den faligi bani yaaba yeni.

⁷ N baa taa yaaba n poagili yeni Ki teni ban tua yaaba n baa sieni, N baa teni ban den deli ki gedini yaaba foagima yeni N tua yaa nibuolu n pia u paalu. Laa yogunu mini Li Miali Diedo baa die ba Siyono juali nni Hali yaa yogunu kuli.

⁸ Fini Siyono juali li toaguudidieli, A baa goa ki baa a kpiagidi nani mi kpiama yeni, Jelusalema mo n goa ki baa o bali.»

Isalele yaaba baa le fala ki yuandi ki baa mi faabima

⁹ Yinba Jelusalema yaaba, Be teni ke yi buudi moala? Naani yin kaa go pia bado, Kaa go pia tundika yeni yaa po yo? Naani lani n teni ke yi mua ki yalini Nani u maditugukoanu n cuo yaa pua yeni?

¹⁰ Yaa yalini ki duni mani nani yaa pua n ye Leni u maditugukoanu yeni. Kelima moala yi baa ña u dogu na niinni Ki gedi ki ban kpaa yi gbandiena li fuali nni. Yi baa gedi hali Babilona. Lanpo yi baa faabi, N baa ga yi lanpo Mini Li Miali Diedo baa faabi yi yi yibalinba nuu nni.

¹¹ Moala i nilanbuoli boncianla taani Ki bua ki tuogi leni yi bu toabu, Ki maadi yi maama ki tua: «Tin paadi Siyono dogu ki kua u niinni ki *joagini u. Tin sedi ki diidi u dogu yeni bolinma.»

¹² Ama i nilanbuoli yeni niba naa bani mini Li Miali Diedo yantiana. Baa bani min jagi ke n baa tieni yaala. Li boani ba ke mini n taani ba Nani ban yen taani a dibaba u jalu nni maama Ki baa pua yeni.

¹³ Siyono yaaba, fii mani ki ŋma yi yibalinba Nani yaa ne n cuoni u jalu nni ki ŋmaadi i di yeni. N baa teni yi yina n tua kuboandi. Yi taawoga mo n tua kumoandi. Yi baa ŋma ki midi yaa nilanbuoli n yaba, Ki gagidi bi piama mini ki tinga kuli Diedo po.

¹⁴ Moala Siyono yaaba, yinba yaaba n pia yaa toagola n yaba, Taani mani yi toagola kuli, Kelima bi taagi ki baa lindi ki cebini yi, Ki tuogi leni yi bu toabu, Ki pua yinba Isalele yaaba yudaano kpianu u gbiamu.