Mise 3 - Gourmanchéma Bible

¹ Mini Mise den yedi bani, Jakobo puoliŋuani yudanba, cengi mani: «Naani laa tie yinba yaa tuonli ka yin bi yaa ja yaa buudi n tiegi?

² Ama yi nani yaala n ŋani tienma Ki bua yaala n bia yaa tienma. Yi piti n niba gbandi, Ki kogidi bi nandi ki ŋaani a kpaba.

³ Yi ŋmani n nibuoli gbanandi Yi piti bi gbandi Ki mudi bi kpaba. Yi jia ba bonjenajena Nani ban sagi yaa nandi li bobili nni yeni, Nani ban ŋaani yaa nandi li bobili nni yeni.

⁴ Li tie lani yaa po ke yaa yogunu ke yi ti kpaani Ki miadi Li Miali Diedo wan faabi yi, O kan guani yi liba. O baa buli yi o nunga laa yogunu, Kelima yi soani yaa tuona n bia.»

U Tienu fu leni bi sawalipuaba yaaba n yaani o niba

⁵ Li Miali Diedo maadi yaa maama n tie na ki yedi: «Yaa sawalipuaba n boandi o niba, Ke bi yaadi o sanu nni. N niba yaa puni ba bonŋmankaala, Se ban yaa tua ke mi yemanma baa ye. Bi yaa puni ba bonŋmankaaliba mo, Ban yaa tua ke bu toabu baa cua.

⁶ Lani yaa po yinba bi sawalipuaba yeni, Yi yogunu tuoni u bianu U yienu baa biigi yipo, Yi kan go le bonlekaaliba kuli. Yi kan go fidi ki pua sawali liba kuli po.»

⁷ Yaaba n pua sawali kuli baa pii bi nunmu kelima i fe po, Kelima U Tienu kan guani bipo liba.

⁸ Ama mini, Li Miali Diedo Fuoma ye n niinni Ki gbieni nni u fidu, O go puni nni li bali leni li papaali, Ke min waani Jakobo puoliŋuani bi tagili, Ki waani bani Isalele yaaba bi *tuonbiadi.

Mise waani ke Jelusalema baa bodi

⁹ Lanwani, Jakobo puoliŋuani yudanba, Yinba, Isalele yaaba koanbala, Yinba, yaaba n nani yaa bujiaba n tiegi, Ki go teni ke yaala n tiegi kuli lebidi ki goli, cengi mani!

¹⁰ Yi maa a diena ki pugidi U Tienu dogu Jelusalema leni mi kukpama Leni li mabinli n kpendinni yipo yaa ligi.

¹¹ Jelusalema yudanba jia ti buudi ki gaani a suuna. Likani kopadicianba yaa ga pani, Bi kan bangi li *bali maama, Bi sawalipuaba yaaba n ye likani yaa ga ligi, Bi kan pua sawali. Ama bi cili ki paagidi bi pala Li Miali Diedo po ki tua: «Naani Li Miali Diedo ki ye leni ti? Fala kan nandi ti.»

¹² Lanwani kelima yinba yaa po, Bi baa ko Siyono nani u kuanu yeni. Jelusalema baa tua kulinjagbejuali. Ku tiigu mo baa pini U Tienu diegu n ye yaa juali yuli po.