Matie 8 - Gourmanchéma Bible

¹ Jesu n den jiidi li juali po, bi niba boncianla den ŋua o.

² O gbaado den cua ki gbaani o nintuali ki yedi: «N Daano, a yaa bua, a baa fidi ki ŋanbi nni.»

³ Jesu den tandi o nuu ki sii o ki yedi: «N bua, ŋanbi.» Lanyogunu o *gbaadima den gbeni opo ke o ŋanbi.

⁴ Jesu den yedi o: «Ŋan fangi a yuli ki da yedi niloba liba. Ama, gedi ki ban waani a yuli kopadiciamo, ki padi Musa n den bili yaa padili, lan tua bipo siedi ke a ŋanbi.»

Jesu paagi a minteela yudaano naacemo

⁵ Jesu n den kua Kapenayuma nni, minteela kobiga yudaano den tuogi o

⁶ ki mia o ki yedi: «N Daano, n naacemo dua ke ti yianfaandi cuo o, ki go koani o boncianla.»

⁷ Jesu den yedi o: «N baa cua ki paagi o.»

⁸ Minteela kobiga yudaano yeni den goa ki yedi o: «N Daano, mii pundi ŋan kua n dieli nni, maadi mayenma bebe, n naacemo baa paagi.

⁹ Kelima mini yua ke toaba die nni, n moko pia min die yaa minteela. N yen yedi one: ‹Gedi,› wan gedi, ki yedi o yua mo: ‹Cua na,› wan cua. N yen yedi n naacemo: ‹Tieni line,› wan tieni.»

¹⁰ Jesu n den gbadi laa maama, li den paki o, ke o yedi yaaba n ŋua o: «N waani yi i moamoani, baa yinba Isalele yaaba siiga, n daa laa yaa *dandancianli n tie na buolu.

¹¹ N waani yi i moamoani ke bi niba boncianla baa ña puoli leni nintuali kuli, ki cua ki taani ki kali leni Abalahama leni Isaaka leni Jakobo, u saajekaanu kani *tanpoli diema nni.

¹² Ama bi baa lu yaaba n bi baa tie tanpoli diema yaaba yeni, niinpo li *biigicianli nni, a bubula leni mi ñincegima n baa ye naankani.»

¹³ Li yaa puoli Jesu den yedi a minteela yudaano: «A kuni, lan tua apo nani ŋan daani maama.» Lanyogunu liga o naacemo den paagi.

Jesu paagi a yiama boncianla

¹⁴ Jesu den gedi Pieli denpo. O den sua ke wani Pieli cuadinaa dua kelima o den pia gbananbiendi.

¹⁵ Jesu den sii o nuu ke u yianu kagidi opo ke o fii ki ga o cangu.

¹⁶ Ku yenjoboandigu bi den cuani Jesu kani bi niba boncianla, mu cicibiadimu danba. O den maadi bebe ki deli ki ñani mu cicibiadimu mun den ye yaaba yaa niinni, ki go paagi a yiama kuli.

¹⁷ O den tieni yeni ke o sawalipualo Esayi n den maadi yaa maama n tieni: Wani oba n den taa ti tadingu, Ki tugi ti yiani.

Yaaba n bua ki ŋoadi Jesu

¹⁸ Jesu n den laa ke ku niligu lindi o, o den waani o ŋoadikaaba ban duodi ki gedi nepo yaa boanjaali.

¹⁹ Li *balimaama bangikaaba siiga yendo den cua o kani ki yedi o: «Canbaa, n baa ŋua ŋa ŋan caa naani kuli.»

²⁰ Jesu den goa ki yedi o: «I coli pia i fali, ti bonyugiditi mo pia a tiana, ama o *Ja Bijua wani naa pia wan baa dua naani.»

²¹ Nitoa, o ŋoadikaaba siiga yua, den yedi o: «N daano, pa nni u sanu min da kpa gedi ki ban piini n baa no.»

²² Jesu den goa ki yedi o: «Yaa ŋua nni, ki cedi bi tinkpiba n piini bi tinkpiba.»

Jesu duani ku tafaaciangu

²³ Jesu den kua ku ñinbiagu nni ke o ŋoadikaaba den ŋoadi o.

²⁴ Ban den ye mi ñincianma nni, ku faabiadigu den fii ke a ñinguona fii ki baa milini ku ñinbiagu, ama wani, o den goa.

²⁵ O ŋoadikaaba den nagini ki fundi o ki yedi: «Ti Daano, fii ki faabi ti, ke ti baa bodi.»

²⁶ O den yedi ba: «Be teni ke yi jie nanda, yinba yaaba yaa *dandanli n ki fuu?» Lanwani o den fii ki sedi ki funi leni ku faagu leni mi ñincianma ke likuli duani salam.

²⁷ Ti jawaandi den cuo o yegininlieba kuli ke bi yieni biyaba: «O tie ŋme yo, ke baa ku faagu leni mi ñincianma kuli tuo ki tieni wan yedi yaala?»

Jesu deli ki ñani mu cicibiadimu niba lie niinni

²⁸ Jesu n den pundi nepo yaa boanjaali Gadala yaaba dogu tinbianu nni, mu cicibiadimu danba bonba lie den ñani a kula po ki tuogi o. Bi den bia boncianla hali ke niloba kan tuo ki tagini lipo sanu.

²⁹ Bi den tiani opo: «Be n ye tinba leni fini siiga, U Tienu Bijua? Naani a cua ne ki baa duoli ti ke u yogunu daa pundi yoo?»

³⁰ Li sua ke u duokuliciamu den nagi likani ki gbi i moajiini.

³¹ Mu cicibiadimu den miadi Jesu ki tua: «A yaa deli ti, ŋan cedi tin gedi ki ban kua u duokulu na niinni.»

³² O den yedi mu: «Gedi mani.» Mu den ñani bi jaba yeni niinni ki ban kua i duoli nni. Lani u duokulu kuli den digi mi joayidima po ki baa mi ñincianma nni ki bodi lienni.

³³ Yaaba n den kpaa ba den sani ki gedi ki ban waani u dogu po yaala n tieni kuli, leni yaala n tieni mu cicibiadimu danba.

³⁴ Lane, u dogu nni yaaba kuli den ñani ki baa tuogi Jesu. Ban den laa o bi den mia o ke wan ña bi tinga nni.