Matie 5 - Gourmanchéma Bible

¹ Jesu n den laa ku niligu, o den doni li juali po. Wan den kali, o ŋoadikaaba den nagini o kani.

² O den yaadi ki bangi ba ki yedi:

Li pamanmoanli

³ «Li pamanli ye leni yaaba n pia li yumiinli, kelima *tanpoli diema tie bi yaama.

⁴ Li pamanli ye leni yaaba n ye leni li pabiidili, kelima bi baa baagi ba.

⁵ Li pamanli ye leni yaaba n pia li padingili, kelima bi baa diedi ki tinga.

⁶ Li pamanli ye leni mi *teginma koma leni mi ñunñuunu n pia yaaba, kelima bi baa guo.

⁷ Li pamanli ye leni bi niñingbadiba, kelima bi baa gbadi bipo mi niñima.

⁸ Li pamanli ye leni yaaba n pia li papienli, kelima bi baa le U Tienu.

⁹ Li pamanli ye leni bi candanbaaba, kelima bi baa yini ba U Tienu bila.

¹⁰ Li pamanli ye leni ban wangi yaaba fala kelima mi teginma po, kelima tanpoli diema tie bi yaa yaala.

¹¹ Li pamanli ye leni yi bi niba yaa sugidi yi ki wangi yi falabiado ki maadi yipo mi mabiadima kelima mini yaa po.

¹² Yin mangi mani yi pala ki yaa ye leni li pamancianli kelima yi panpaani baa yaba tanpoli po. Bi niba den wangi bi sawalipuaba falabiado yeni, bani yaaba n den ye ke yi daa ye.

Mi yaama leni mi yenma kpanjama

¹³ Yinba n tie mi yaama ŋanduna po. Mi yaama yaa ti luo mi manu, bi baa taa be ki go mangi ma? Maa go pia fuomaba, se ban lu ma niinpo bi niba n ŋmaa ma.

¹⁴ Yinba n tie mi yenma ŋanduna po. Yaa dogu n ye li juali yuli po kan fidi ki wuoni.

¹⁵ Bi kan go cuoni ki fidisanga mo ki taa li sancianli ki ŋoagini ga, ama bi baa tuani ga u fidisantuankaanu, gan yendi yaaba n ye li dieli nni kuli po.

¹⁶ Yeni yin cedi mani yi yenma n yendi yeni bi niba kani ke ban le yi tuonŋama ki kpiagi yi Baa yua n ye tanpoli po.

Jesu n yedi yaala li balimaama po

¹⁷ Yin da tama ke n cua ki baa bolini li *bali maama leni bi sawalipuaba maama ka. Mii cua ki baa bolini ma, ama n cua ki baa tieni ma.

¹⁸ N waani yi i moamoani, hali tanpoli leni ki tinga n baa ye, baa yaa dianyendu n wa ki cie i diani nni, kan ña li bali maama nni hali likuli n baa tieni ki dudi.

¹⁹ Yua n miidi li bali maama nni baa yaama n wa ki cie siiga mayenma, ki go bangi bi niba ban yaa tiendi yeni, o baa tua yua n wa ki cie tanpoli diema nni. Yua mo n tiendi man bili yaala ki go bangi ma, o baa tie niciamo tanpoli diema nni.

²⁰ N waani yi, yi teginma yaa cie li *bali maama bangikaaba leni *Falisieninba, yi kan kua tanpoli diema nni.

Jesu n yedi yaala li pabienli po

²¹ Yi gbadi ke bi den yedi bi nikpiaba: ‹Ŋan da kpa o nilo, yua n ku o nilo, bi baa bu ki cuo o.›

²² Ama mini n yedi yi, yua n bieni o pali o lielo po kuli, li pundi ban bu leni o, yua n yedi o lielo: ‹O yanpiidaano na›, li pundi ke yi *cancannikpeliba taancianli n cuo o. Yua n yedi o lielo: ‹O yanluodaano na,› li pundi ban cuo ki kuani o ku *fantanbuogu nni.

²³ Lanwani a yaa cua li *padibinbinli kani ki baa pa a paabu, ki tiadi likani ke a lielo pia leni a bu madiabu,

²⁴ ŋan cedi a paabu likani ki kpa gedi ki ban mangi leni a lielo yeni, ki yuandi ki guani ki pa U Tienu a paabu.

²⁵ A koanginka yaa cuo ŋa ki caani a li bujiali kani, ŋan mangi leni o tontoni ki daa pundi, ke wan da ti teni o bujialo n cuo ŋa ki teni a sandalima, wan kuani a li kpaadidieli nni.

²⁶ N waani a i moamoani, a kan ña lienni kali a ban pani ki gbeni, kaa sieni baa tanga.

Jesu n yedi yaala mi conconma po

²⁷ Yi gbadi ke bi den yedi: ‹Ŋan da conbi.›

²⁸ Ama mini n yedi yi ke yua n noanli pua ke o yama kua o niinni, o conbi leni o o pali nni no yo.

²⁹ A jiennunbu yaa tie apo li tingbali bonla, ŋan logidi bu ki lu foagima, kelima a gbanan-buoyendu yaa bodi, li baa ŋani apo ki cie ban lu a gbanandi kuli ku fantanbuogu nni.

³⁰ A jienu yaa tie apo li tingbali bonla, ŋan jia ku ki lu foagima, kelima a gbanan-buoyendu yaa bodi, li baa ŋani apo ki cie ban lu a gbanandi kuli ku fantanbuogu nni.

Jesu n yedi yaala li poñanli po

³¹ Bi go den yedi: ‹Yua n ñani o pua, wan teni o li poñatili.›

³² Ama mini n yedi yi ke yua n ñani o pua, ke laa tie mi conconma po ka, o teni ke laa pua tua poconconli. Yua n taa poñaka mo, o conbi.

Jesu n yedi yaala yaaba n polini po

³³ Yi den gbadi ke bi waani bi nikpiaba: ‹Ŋan da poli ki niani ki naa tieni. Ama ŋan poli ki niani o Diedo ke a baa tieni yaala, ŋan tieni la.›

³⁴ Ama mini n yedi yi: Yin da poli baa leni tanpoli kelima li tie U Tienu bali kalikaanu,

³⁵ baa leni ki tinga kelima ki tie o taaŋmaakaanu, baa leni Jelusalema kelima li tie o badiciamo dogu.

³⁶ Ŋan da poli leni a yuli, kelima a kan fidi ki teni baa yuyengu n pendi, yaaka kun boandi.

³⁷ Yi yaa yedi: ‹Mm, lan yaa tie mm.› Yi yaa yedi: ‹A-a mo, lan yaa tie a-a.› Kelima yaala n pugini kuli di ñani o *Biado kane.

Jesu n yedi yaala li pantuuli po

³⁸ Yi den gbadi ke bi yedi: ‹Nunbu n baa pa nunbu panli, ñinli mo n baa pa ñinli panli.›

³⁹ Ama mini n yedi yi, yin da yie o nibiado po, nilo yaa pabi a a jienkpianu po, ŋan pegidi ki teni o a ganu mo.

⁴⁰ Nilo yaa bua ki yini a ti buudi ki ga a liadibiga, ŋan teni o a liadicianli mo.

⁴¹ O nilo yaa tieni a u paalu ke ŋan ciani o kilo dajenli, ŋan ciani o dajena lie.

⁴² Pa yua n mia ŋa, da buli a nunga yua n bua ŋan ledi opo.

Mi buama yibalinba po

⁴³ Yi gbadi ke bi den yedi: ‹Ŋan bua a nisaalilielo ki nandi a yibali.›

⁴⁴ Ama mini n yedi yi: Yaa bua mani yi yibalinba, ki yaa jaandi yaaba n faligidi yipo.

⁴⁵ Yeni yi baa tie yi Baa yua n ye tanpoli bila, kelima o yen tendi ke o yienu pudi bi nibiadiba leni bi niŋanba kuli po, ki yen tendi ke ki taaga mii bi niteginkaaba leni yaaba n ki tiegi kuli po.

⁴⁶ Li yaa tie ke yi bua yaaba n bua yi bebe, yi baa baa be yaa panpaani yo? Bi lubigaaba wani ki tiendi yeni ka yoo?

⁴⁷ Yi yaa fuondi yi kpiiba bebe, yi tieni be ke li pia mi paadima? Baa bi nilanba wani ki tiendi yeni ka yoo?

⁴⁸ Yin gagidi ki yaa ŋani nani yi Baa yua n ye tanpoli n gagidi ki ŋani maama.