Matie 4 - Gourmanchéma Bible

¹ Lani n pendi *U Tienu Fuoma den gedini Jesu mi fanpienma nni ke Sutaani tulini o.

² Jesu n den loli bu ñoabu dana piinaa leni ñadi piinaa, mi koma den cuo o.

³ Mi tulinma daano yeni den cua o kani ki yedi o: «A yaa tie U Tienu Bijua ŋan maadi ki teni a tana na n tua jiema.»

⁴ Jesu den goa ki yedi: «Li diani: O nisaalo kan yaa ye mi jiema bebe po ka, ama yaa maama n ñani U Tienu ñoabu nni kuli yaa po.»

⁵ Sutaani den gedini Jesu u dogagidiko Jelusalema po, ki teni ke o sedi U Tienu diegu yuli po.

⁶ O den yedi o: «A yaa tie U Tienu Bijua ŋan yugi ki cii tiipo kelima li diani: ‹O baa puogi o malekinba apo. Bi baa tebini a bi nii po Ke a taali n da tuudi tanli.› »

⁷ Jesu den yedi o: «Li go diani kaanto: Da biigi o Diedo a Tienu.»

⁸ Sutaani go den gedini o yaa juali n kpedi hali boncianla yuli po ki waani o ŋunduna diema kuli leni mi kpiagidi,

⁹ ki yedi o: «A yaa gbaani ki kpiagi nni, n baa pa ŋa laa bonla kuli.»

¹⁰ Jesu den yedi o: «Fuadi likani Sutaani, kelima li diani: ‹A baa kpiagi o Diedo a Tienu, Ki yaa jaandi wani bebe.› »

¹¹ Lane Sutaani den ŋa Jesu. Lanyogunu malekinba den cua Jesu kani ki tuuni opo.

Jesu cili o tuonli Galile diema nni

¹² Jesu n den gbadi ke bi cuo Jan, o den fii ki gedi *Galile.

¹³ O den ñani Nasaleti ki cua ki ye Kapenayuma dogu nni yu ku leni mi ñincianma, Sabulono leni Nefitali buoli yaa tinmu nni.

¹⁴ O den tieni yeni ke o sawalipualo *Esayi n den maadi yaa maama n tieni:

¹⁵ «Sabulono leni Nefitali tinmu yaaba, Yaa tinmu n ku leni Galile ñincianma, Judana kandima tinga yaaba yeni, Bani yaa nilanba n ye Galile diema nni,

¹⁶ Laa niba, yaaba n den ye li *biigili nni, di laa mi yencianma. Laa yenma yendi bani, Yaaba n den ka mi kuuma leni mi jinjingu n den die naankani.»

¹⁷ Lanyogunu Jesu den cili ki wangi o Laabaaliŋamo ki tua: «Lebidi mani yi yama, kelima *tanpoli diema kuli.»

Jesu yini jankpaanba naa ke bi ŋoadi o

¹⁸ Jesu n den cuoni ki baali Galile ñincianma, o den laa naataanjaba lie, Simono yua n go yi Pieli, leni o waalo Andile, ke bi lu i taali mi ñincianma nni kelima bi den tie jankpaanba.

¹⁹ O den yedi ba: «Ŋoadi mani nni, nani yin lingi i jami maama, n baa teni yin yaa lingi bi niba moko yeni.»

²⁰ Lanyogunu liga bi den ŋa bi taali ki ŋoadi o.

²¹ Jesu den suagi liiga ki go laa naataantoe lie, Sebede bijaliediba, Jaka leni o waalo Jan. Bi den ye ku ñinbiagu nni leni bi baa Sebede ki ŋanbidi bi taali.

²² O den yini ba. Lanyogunu bi den ŋa ku ñinbiagu leni bi baa kuli ki ŋoadi o.

²³ Jesu den gaandi Galile diema kuli nni ki kua li *balimaama bangima diena nni, ki bangi bi niba ki wangi ba *U Tienu diema Laabaaliŋamo, ki paagidi bi niba bi yianbuoli leni bi tadinbuoli kuli po.

²⁴ O yeli den ñani Sili diema kuli nni. Bi den cuani o kani i yianbuoli leni mi yianfulima kuli danba, leni mu cicibiadimu n die yaaba, leni mi bisinbilima danba leni ti gbanankpiendi danba. O den paagi bikuli.

²⁵ Bi niba boncianla, yaaba n den ñani Galile, leni *Dekapola, leni Jelusalema leni Jude diema kuli, leni yaa diema n ye Judana kpenu kandima, bikuli den ŋoadi o.