Matie 3 - Gourmanchéma Bible

¹ Laa yogunu Jan Batisi den kua Jude diema yaa fanpienma nni ki wangi U Tienu maama,

² ki tua: «Lebidi mani yi yama kelima *tanpoli diema kuli.»

³ Wani Jan n tie o sawalipualo Esayi n den maadi yua yaa maama ki yedi: «O nilo kpaani mi fanpienma nni ki tua: ‹Yin bogini mani o Diedo sanu, Ki naadi mani o sani.› »

⁴ Jan den laa ti yuoyuokobidi tiadi ki ñaagi o ciaga ku gbanñagidigu. O den di i naaci leni ku muagu nni yaa siadi.

⁵ Jelusalema dogu yaaba leni Jude diema yaaba kuli, leni yaa tinkundogi n baali Judana kpenu yaaba kuli, den kpendi o kani.

⁶ Bi den tuodi ki doagidi bi *tuonbiadi, ki cedi ke Jan *batisi ba Judana kpenu nni.

⁷ Wan den laa ke *Falisieninba leni *Sadusieninba boncianla kpendi o kani ke wan batisi ba, o den yedi ba: «Yinba, u waalabi-buolu na, ŋme fandi yi yin sani ki cia U Tienu pabienli yaali n baa cua na?

⁸ Yin yaa tuuni mani yaa tuona n doagidi ke yi lebidi yi yama.

⁹ Yin da se ki tua yi pala nni: ‹Ti pia Abalahama ke o tie ti yaaja.› N kadi ki waani yi ke U Tienu baa fidi ki teni yaa tana n tie na n tua Abalahama puoliŋuani.

¹⁰ Baa moala bi caani li yali i tijiini po. Yaa tibu n ki luoni yaa bonluonkaala n ŋani kuli, bi baa pedi bu ki lu mi fantama nni.

¹¹ Mini n batisi yi leni mi ñima, ke lan doagidi ke yi lebidi yi yama. Ama yua n ŋua n puoli pia u paalu ki cie nni. Mii pundi baa yua n baa tugi o cacaadi. Wani, o baa batisi yi leni U Tienu Fuoma Yua leni mi fantama.

¹² O kubi o kaaligu o nuu nni. O baa ŋanbi o jalu cain, ki wodi ki kuodi mi bima li buali nni, ki nan sia mi fenma leni yaa fantama n kaa pia gbindima.»

Jan batisi Jesu

¹³ Laa yogunu Jesu den ñani *Galile diema ki cua u kpenu Judana, Jan kani, ke wan batisi o.

¹⁴ Ama Jan den bua ki yie opo ki yedi: «Li bi pundi fine n batisi nni, ke a mo nan cua mini yaa kani?»

¹⁵ Jesu den goa ki yedi o: «Cedi ki tieni yeni moala, yeni n tie tin tieni yaala n tiegi kuli.» Lanwani Jan den tuo, waa go yie.

¹⁶ Wan den batisi o yaa yogunu, Jesu den ñani mi ñima nni. Tanpoli den luodi ke Jesu laa ke *U Tienu Fuoma ñani lipo ki ji nani ki kpaajiega yeni ki ti jagini opo.

¹⁷ Lanyogunu u nialu den maadi tanpoli po ki yedi: «One n tie n *Bijabuadiga, n pali n mani yua yaa po hali boncianla.»