Matie 24 - Gourmanchéma Bible

¹ Jesu n den ñani U Tienu diegu nni ki cuoni ki caa, o ŋoadikaaba den nagini ki baa waani o U Tienu diegu dieciama.

² Jesu den yedi ba: «Yi nua laa bonla kuli? N waani yi i moamoani, ke baa tanyenli kan sieni ki yaa maa li lieli po, ke a kuli naa padi ki baa.»

Yaa fala n baa ti cua mi juodima yogunu

³ Jesu n den ka *Olifie Tiidi juali po, o ŋoadikaaba den cua bani bi bebe ki yedi o: «Waani ti laa bonla n baa ti cua yaa yogunu, leni yaa sinankeeni n baa waani ti a cuama leni ŋanduna juodima yogunu.»

⁴ Jesu den goa ki yedi ba: «Fangi mani yi yula ke niloba n da boandi yi.

⁵ Kelima bi niba boncianla baa ti cua n yeli nni ki yedi: ‹Mini n tie *U Tienu n Gandi Yua.› Lani bi baa boandi bi niba boncianla.

⁶ Yi baa gbadi ke bi maadi bu toabu maama, ki go maadi bu toabu laabaalo maama. Da yagi mani yi yama, kelima laa bonla baa cua tiladi. Ama li da kan tua mi juodima ka.

⁷ U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi koncianma leni mi tindigibima baa tiendi i kaantiami.

⁸ Laa bonla kuli da tie nani u maditugukoanu cilima bebe yene.

⁹ Laa yogunu bi baa yaa wangi yi fala, ki go kpaani yi. I nibuoli kuli baa nandi yi kelima n yeli po.

¹⁰ Li baa tua li tingbali bonla niba boncianla. Bi baa janbidi biyaba ki nandi biyaba.

¹¹ Bi sawalipua-faadanba baa fii boncianla, ki boandi bi niba boncianla.

¹² Mi biadima n baa pugini maama po, niba boncianla buama baa wadi.

¹³ Ama yaaba n juuni hali mi juodima baa tindi.

¹⁴ *U Tienu diema Laabaaliŋamo na da baa kpa pundi ŋanduna kuli nni, ki tua siedi i nibuoli kuli po. Lani yaa pendi mi juodima baa cua.

Ti caginbiaditi

¹⁵ Lanwani yi yaa ti laa ke yaa cagindi n baa wudi bi niba gbani ye u *kaangagidiŋamu nni, o sawalipualo Danieli n den maadi yaadi yaa maama, yua n cogi n kpaagi bonŋanla.

¹⁶ Laa yogunu yaaba n baa ye Jude nni n sani ki gedi a juana po.

¹⁷ Yua n ye o doangu yuli po, n da jiidi ki kua deenni ki baa taa yaa tiadi n ye lienni.

¹⁸ Yua n ye u kuanu po mo n da lebidi ki guani o denpo ki baan taa o tiayekaadi.

¹⁹ Fala baa ye leni yaa puoba n punbi, leni yaaba n da ŋaandi laa dana nni.

²⁰ Mia mani U Tienu ke yi nuama n da tua ku fawaagu yogunu, yaaka mi *fuodima daali.

²¹ Kelima fala baa yabidi laa yogunu hali maama ke o buolu daa tieni ki cili ŋanduna cilima ki pundi hali moala. O buolu kan go tieni mo.

²² U Tienu yaa bi wadi laa dana nisaaloba kuli kan bi tindi, ama kelima wan gandi yaaba po, o baa wadi laa dana.

²³ Laa yogunu nilo yaa yedi yi: ‹U Tienu n Gandi Yua ye ne,› yaaka: ‹O ye nepo,› yin da daani o maama.

²⁴ Kelima a tuonanda yaaba n yedi ke bi tie U Tienu n gandi yaaba leni bi sawalipua-faadanba baa fii ki yaa tiendi sinankeenciami leni li bonlidikaala, hali ke bi yaa bi baa fidi, bi bi baa boandi baa U Tienu n gandi yaaba moko.

²⁵ N tuodi ki waani yi laa bonla.

²⁶ Lanwani, bi yaa ti yedi yi: ‹O ye li fuali nni,› yin da gedi. Bi yaa ti yedi yi: ‹O wuo a diena nni,› yin da daani ma.

²⁷ Kelima nani mi tañigima n yen ña puoli ki yendi ki poandi ki gedi hali nintuali maama, o *Ja Bijua cuama baa tua yene.

²⁸ Li bonkpienla n ye naani kuli, i kaabi baa taani lankane.

O Ja Bijua cuama

²⁹ Laa dana fala yaa pendi yaa yogunu, u yienu baa biigi, o ŋmaalo mo kan go yendi, a ŋmabila baa ña tanpoli ki baali, tanpoli paaciami mo baa digibi.

³⁰ Lani, o Ja Bijua sinankeeni baa doagidi tanpoli, ŋanduna nibuoli kuli baa mua. Bi baa le ke o Ja Bijua ye ti tawadi nni ki kpendi leni u paaciamu leni ti kpiagiciandi.

³¹ O baa soani o malekinba leni kakaci ban yaa piebi ki taani U Tienu n gandi yaaba ŋanduna kaannaadi kuli nni, ki cili nepo yaa bianu ki yaa caa hali u poyu.

Bu kankanbu kpanjama

³² Bandi mani bu kankanbu kpanjama n bangi yaala. Bu beni yaa faadi ki cili ki bundi, yi bani ke ku siagu nagidi.

³³ Li go tie yene, yi yaa ti laa laa bonla kuli, yin bandi ke o Ja Bijua nagini, ki ye bu buliñoabu kani.

³⁴ N waani yi i moamoani ke mi naa nifiima kuli kan pendi ke laa bonla kuli ki tieni.

³⁵ Tanpoli leni ki tinga kuli baa pendi, ama n maama kan pendi hali abada.

U Tienu bebe n bani o Ja Bijua cuama yogunu

³⁶ Oba kuli ki bani laa bonla n baa ti cua yaa daali leni yaa yogunu, baa tanpoli malekinba ki bani, baa Bijua, se Baa bebe.

³⁷ Lan den tie maama Nowe yogunu, li go baa tie yeni o Ja Bijua cuama yogunu.

³⁸ Hali ki tabolinkaaga n daa den cua, bi nisaaliba den di ki go ñu, ki taani bi puoba, ki puuni bi bisiaba bi jaba, hali Nowe n den ti kua ku ñinbiaciangu nni yaa daali.

³⁹ Baa den faami liba kuli po hali ki tabolinkaaga n den ti cua ki koadi bikuli. Li baa go tie yene o Ja Bijua cuama yogunu.

⁴⁰ Laa yogunu niba lie baa ye u kuanu nni, bi baa taa yendo ki ŋa yendo,

⁴¹ puoba lie baa naani li naali nni, bi baa taa yendo ki ŋa o lielo.

⁴² Lani yaa po yin yaa gu mani, kelima yii bani yi Diedo n baa cua yaa daali.

⁴³ Yin bandi bonŋanla ke o diedaano yaa bi bani li conconli n baa cua ku ñiagu yaa yogunu, o bi baa gu ki kan cedi wan cibi o dieli.

⁴⁴ Yeni, yi moko n bogini ki yaa gu, kelima o Ja Bijua baa cua yin ki daani o yaa yogunu.

O naacendugika leni o naacenbiado

⁴⁵ Ŋme n tie yaa naacendugika n pia mi yanfuoma, ke o canbaa guuni o o niba ke wan yaa tendi ba mi jiema li yogunu yaa pundi?

⁴⁶ Li pamanli ye leni laa naacemo, o canbaa yaa kpeni ki sua ke o tiendi yeni.

⁴⁷ N yedi yi i moamoani, o canbaa baa guuni o o piama kuli.

⁴⁸ Ama o yaa tie naacenbiado ki yedi o pali nni: ‹N canbaa waagi mi kpenma,›

⁴⁹ ki cili ki yaa pua o naacenlieba, ki di ki go ñu leni a dañogaada,

⁵⁰ laa naacemo canbaa baa kpeni wan ki daani o yaa daali leni wan ki faami yaa yogunu.

⁵¹ O baa teni ban pua o hali ki poagili o, ki gedini o ki ban taani leni pala lie danba a bubula leni mi ñincegima n baa ye naankani.