Matie 22 - Gourmanchéma Bible

¹ Jesu go den pua ba mi kpanjama ki yedi:

² «*Tanpoli diema baa tie nani yaa bado n den ŋanbi o bijua pocaajiema.

³ O den soani o naacenba ban yini wan den yini yaaba laa pocaajiema po, ama bi den yie baa cua.

⁴ O go den soani naacentoaba ki yedi: ‹Yin waani mani min yini yaaba ke n ŋanbi mi jiema ki gbeni, ki kodi n ne leni n yanwubiditi ki ŋanbi ki gbeni. Ban di cua mi pocaajiema po na.›

⁵ Ama wan den yini yaaba yeni den fali o yiinu, ki fii ki gedi bi kaani, one n gedi o kuanu po, one mo o kpendu,

⁶ yaaba n sieni mo den cuo o naacenba ki fiagi ba ki ku ba.

⁷ O bado pali den beni boncianla ke o soani o toatieba ke bi ku laa nikpaba kuli ki sia bi dogu.

⁸ Lanwani o den yedi naacentoaba: ‹Mi pocaajiema ŋanbi ki gbeni, ama min den yini yaaba naa pundi ki je ma.

⁹ Yin gedi mani yaa sani n pia bi niba boncianla nni ki yini yin laa yaaba kuli ban cua mi pocaajiema po.›

¹⁰ Bi naacenba yeni den kua i sani nni ki taani ban laa yaaba kuli, bi nibiadiba leni bi niŋanba kuli, yeni mi pocaajiema dieli den gbie bi niba.

¹¹ O bado n den kua ke o baa le yaaba n cua o yiinu, o den laa niyendo ke waa laa mi pocaajiema yaa tiadi.

¹² O den yedi o: ‹N danli, a tieni lede ki kua ne kaa laa mi pocaajiema yaa tiadi?› O ja yeni naa den baa ki guani pu.

¹³ O bado den yedi o naacenba: ‹Loli mani o taana leni o buadi ki lu o niinpo li *biigili nni, a bubula leni mi ñincegima n baa ye naankani.› »

¹⁴ Jesu den juodi ki yedi: «Ban yini yaaba yaba, ama ban gandi yaaba wa.»

Loma badiciamo Sesa lubili

¹⁵ Lanwani *Falisieninba den fii ki foagidi ki ban juogi ban baa tieni maama ki dia Jesu ku madiagu ki cuo o.

¹⁶ Bi den soani o kani bi ŋoadikaaba leni o bado *Elodo yaa buakaaba ke bi yedi o: «Canbaa, ti bani ke a tie moamoandaano, ki bangi bi niba U Tienu sanŋoadima leni i moamoani, ŋaa jie oba kuli, ŋaa gagidi oba kelima bi niba n nua ke o tie maama po.

¹⁷ Lani yaa po waani ti a mo n sua yaala. Naani li pia u sanu tin pa Loma badiciamo *Sesa li lubili bi, bi laa pia?»

¹⁸ Jesu den bani bi nunfanbiadibu ki goa ki buali ba: «Yinba pala lie danba ne, be n teni ke yi dia nni ku madiagu yeni?

¹⁹ Min le yin baa pa yaa ligi li lubili yeni?» Bi den teni o li kujapienli.

²⁰ O den buali ba: «Ŋme yaa nannanli leni ŋme yaa diani nna?»

²¹ Bi den goa ki yedi o: «Sesa yaali yo.» Lane o den yedi ba: «Lanwani, pa mani Sesa, yaala n tie Sesa yaala, ki pa U Tienu mo, yaala n tie U Tienu yaa yaala.»

²² Ban den gbadi o maguankaama, li pakili den cuo ba ke bi den fii ki ñani o kani ki ban caa.

Sadusieninba buali, bi tinkpiba fiima po

²³ Landaali goga, *Sadusieninba, yaaba n tua ke bi tinkpiba fiima ki ye, bi tianba den cua Jesu kani ki buali o i naa buali:

²⁴ «Canbaa, Musa den yedi: ‹O nilo yaa kpe kaa pia biga, o waalo n taa o kpepuoli ki baa o kpelo po u buolu.›

²⁵ To, ti siiga nni jaba lele den ye ki taa baayendo. O bonkpelo den taa o pua ki kpe. Wan ki den baa buolu yeni, o waalo den taa o kpepuoli.

²⁶ Wani o bonlielo yeni moko den kpe kaa baa buolu, ke o bontaalo moko taa laa pua ke li tientieni yeni ki yaa caa hali o bonleleelo.

²⁷ Bikuli n den kpekpe, o pua moko den yuandi ki kpe.

²⁸ Lanwani, bi tinkpiba fiima yogunu, bani bonba lele yeni siiga, o pua yeni nan baa tie ŋme yaa yua yo? Kelima bi niinni yendo yendo kuli den taa o ke o tua o pua.»

²⁹ Jesu den goa ki yedi ba: «Yi tudi kelima yii bani i Diani, yii bani U Tienu paaciamu mo.

³⁰ Kelima bi tinkpiba fiima yogunu, bi jaba kan go taa puoba, bi puoba mo kan go kuni jaba, bi baa tie nani malekinba yeni tanpoli po.

³¹ Yaala n tie bi tinkpiba fiima yaa maama fuuli po mo, naani yii cogi U Tienu n yedi yi yaala na:

³² ‹N tie Abalahama Tienu, Isaaka Tienu leni Jakobo Tienu?› To, U Tienu mo naa tie kpiema Tienu ka, o tie yaaba n fo yaa Tienu yo.»

³³ Ku niligu den gbadi Jesu bangima ke li paki ba.

Li bali maama majali

³⁴ Falisieninba n den gbadi ke Jesu mubini Sadusieninba ñoana, bi den taani o kani.

³⁵ Bi siiga nni yendo yua n tie li *bali maama bangikaciamo den buali o ki bua ki dia o ku madiagu ki yedi o:

³⁶ «Canbaa, li bali maama nni, mile n cie?»

³⁷ Jesu den goa ki yedi o: «Ŋan bua o Diedo a Tienu leni a pali kuli, leni a miali kuli leni a yantiali kuli.

³⁸ Li bali maama nni mine n cie ki tie li mayuli.

³⁹ Yaama n ŋua ma mo ki naani leni ma tie mine: Ŋan yaa bua a nisaalilielo nani ŋan bua a yuli maama yeni.

⁴⁰ Li bali maama leni bi sawalipuaba maama kuli maa laa maliedima po yo.»

Kilisiti n tie yua

⁴¹ Falisieninba n den taani, Jesu den buali ba:

⁴² «Yi tama be yo *U Tienu n Gandi Yua po? O tie ŋme bijua yo?» Bi den goa ki yedi o: «O tie Dafidi bijua.»

⁴³ Jesu den yedi ba: «Li yaa tie yeni, li nan ga lede ke mi Fuoma den teni ke Dafidi maadi o maama ki yini o o Diedo, wan den yedi:

⁴⁴ O Diedo den yedi n Diedo: ‹Kali n jienu po Hali min baa guli a yibalinba Ŋan ŋmaa ba.›

⁴⁵ Dafidi oba yini o o Diedo, li nan go ga lede ke o tie wani Dafidi bijua?»

⁴⁶ Oba kuli ki den fidi ki guani Jesu baa mayenma. Hali landaali mo oba kuli ki den pia papaali ki go buali o bualiba kuli.