Matie 20 - Gourmanchéma Bible

¹ Yeni de, *tanpoli diema tie nani yaa koadaano n den ñani ku tiŋaapanpangu ki baa taa bi tuonsoanba o duven tiidi kuanu tuonli po.

² Wani leni bani den maadi ki kadi ke o baa pa ba kujapienyenli yenli daali kuli. Li yaa puoli o den cedi ke bi gedi o kuanu po.

³ U yienu n den paagi ke o go ñani, o den laa nitoaba ke bi ye ki daaga nni kaa tuuni liba.

⁴ O den yedi ba: ‹Yi mo n gedi mani n kuanu po, n baa pa yi lan dagidi.›

⁵ Bi den gedi. O go den ñani u yensiinu leni li yenlebidili kuli ki go tieni yeni.

⁶ U yienu n bua ki baa yaa yogunu, o go den ñani ki laa nitoaba ke bi se ki daaga nni. O den buali ba: ‹Be yaa po ke yi tundi ki se ne kaa tuuni liba?›

⁷ Bi den goa ki yedi: ‹Li tie kelima oba naa taa ti tuonle.› O den yedi ba: ‹Yi mo n gedi mani n kuanu po.›

⁸ Ku jofangu n den pundi, o koadaano den yedi o tuonsoanjiido: ‹Yini bi tuonsoanba na ki pa ba bi pani, ki cili leni yaaba n yuandi ki kua, ki ban juodi leni yaaba n kpa kua.›

⁹ Yaaba n den kua ke u yienu bua ki baa yeni den cua ki ga kujapienyenli yenli.

¹⁰ Yaaba n den kpa kua mo den cua ki tama ke bi baa ga ki cie yeni, ama bi moko den ga kujapienyenli yenli.

¹¹ Ban den ga, bi den yenbidi yenbidi o koadaano po

¹² ki tua: ‹Yaaba n yuandi ki kua, soani u yogunu waamu bebe, ke a nan taani ki pani bani leni tinba kuli yenma, tinba yaaba n tundi ki tuuni ki yenbiadiga nni ki laadi fala.›

¹³ O koadaano den goa ki yedi bi siiga nni yendo: ‹N danli, mii tudi apo. Tii bi maadi ki kadi ke n baa pa ŋa kujapienyenli kaa?

¹⁴ Ga ŋan die yaala ki fuadi likani. N bua ki pa yua n yuandi na nani min pani a maama.

¹⁵ Mii pia sanu ki tieni min die yaala min bua maama yoo? Li nunponli cuo ŋa kelima min ŋani yeni yoo?› »

¹⁶ Jesu den juodi ki yedi: «Yene ke puoli yaaba baa ti tua liiga yaaba, liiga yaaba mo baa ti tua puoli yaaba.»

Jesu waani mi tataama ke o baa kpe ki go fii

¹⁷ Jesu n den do ki caa Jelusalema leni bi piiga n niliediba, o den piadi leni ba. Li cenli siiga o den yedi ba:

¹⁸ «Cengi mani, ti do ki caa Jelusalema. Bi baa cuo o *Ja Bijua ki teni bi kopadicianba yudanba leni li *bali maama bangikaaba nuu nni. Bi baa jia o ti buudi ki bili ke ban kpa o.

¹⁹ Bi baa teni o bi nilanba nuu nni ban ñuadi o, ki pua nni i baliji, ki kpa ki tabini nni li *dapoanpoanli po. Ama li dataali daali o baa fii bi tinkpiba siiga.»

Jaka leni Jan naa yaa miabu

²⁰ Li yaa puoli Sebede bijaba naa den nagini Jesu kani leni o bila yeni, ki gbaani o nintuali ki baa mia o bu miabu.

²¹ Jesu den buali o: «A bua be?» O den goa ki yedi o: «N bua ŋan bili ke a yaa ti ka ti gbandi po yaa yogunu, n bilieda na n yaa ka yendo a jienu, yendo mo a ganu.»

²² Jesu den goa ki yedi: «Yii bani yin miadi yaala. Yi baa fidi ki ño min baa ño yaa tadiñokaaga bi?» Bi den yedi o: «Ti baa fidi.»

²³ O den goa ki yedi ba: «Moamoane ke yi baa ño min baa ño yaa tadiñokaaga, ama ki kaani o nilo n jienu yaaka n ganu, laa ŋua mini, li tie n Baa n bili la yaaba yaa po yo.»

²⁴ Ŋoadikaaba piiga yaaba n sieni n den gbadi lani, bi pala den beni bi naataanliediba yeni po.

²⁵ Jesu den yini ba ki yedi: «Yi bani ke yaa nibuoli n kaa tie Jufinba yaa baditieba mabindi ba, bi paatieba mo die ba leni u paalu.

²⁶ Lan da tie yeni yinba yaa siiga. Yi siiga yua n bua ki tua niciamo kuli, wan tua yi naacemo.

²⁷ Yua mo n bua ki tua liiga yua kuli, wan tua yi yonbo.

²⁸ Lani n tie o Ja Bijua n cua ki tiendi maama. Laa tie nitoaba n yaa tuuni opo ka, ama ke wan yaa tuuni nitoaba po, ki go pa o miali ki kpe, ki da ki faabi bi niba boncianla.»

Jesu noadi juama lie

²⁹ Jesu leni o ŋoadikaaba n den ña Jeliko dogu nni, yaa niligu n yaba den ŋua o.

³⁰ Juama lie den ka u sankunu. Ban den gbadi ke Jesu tagini ki pendi, bi den tangi: «Ti Daano, Dafidi Bijua, gbadi tipo mi niñima.»

³¹ Ku niligu den funi leni ba ki yedi ke ban suoni, ama bi go den tangi ki pugidi: «Ti Daano, Dafidi Bijua, gbadi tipo mi niñima.»

³² Jesu den sedi ki yini ba ki buali: «Yi bua min tieni yipo be?»

³³ Bi den goa ki yedi: «Ti Daano, ti bua ŋan pa ti ti nuni n yaa nua.»

³⁴ Mi niñima den cuo Jesu ke o sii bi nuni. Lanyogunu bi nuni go den nua ke bi ŋoadi o.