Matie 19 - Gourmanchéma Bible

¹ Jesu n den maadimaadi laa maama kuli ki gbeni, o den fii ki ñani *Galile diema nni ki gedi Jude tinga yaaga n ye Judana kpenu kandima.

² Ku niligu den ŋua o. O den paagi a yiama likani.

³ *Falisieninba den tuogi o ki dia o ku madiagu ki yedi: «Naani li *bali maama tuo o ja n ñani o pua lan tie yaala kuli po bi?»

⁴ O den goa ki yedi: «Yii cogi ke mi cilima o Tagido den tagi o ja leni o pua?

⁵ Li go yedi: ‹Li tie lani yaa po ke o ja baa ña o baa leni o naa kani ki taani leni o pua, bani niba lie yeni n tua gbananyendi.›

⁶ Yeni, baa go tie bilie ka, bi di tie yende. U Tienu n taani yaala, o nisaalo n da paadi la.»

⁷ Bi den yedi o: «Be yaa po ke Musa nan den bili li bali maama nni ke o ja n teni o pua li poñatili ki ñani o?»

⁸ O den goa ki yedi ba: «Li tie kelima yi pajuaga yaa po ke Musa den tuo ke yin yaa ñandi yi puoba. Ama hali ŋanduna tagima yogunu laa den tie yeni.

⁹ Mini, n waani yi ke yua n ñani o pua ke laa tie kelima conconma po, ki go taa potoa kuli, o conbi.»

¹⁰ O ŋoadikaaba den yedi o: «Li yaa tie yeni o ja leni o pua siiga, laa ŋani ja n taa pua.»

¹¹ O den goa ki yedi ba: «Bi niba kuli ka baa fidi ki ga laa maama, se U Tienu n puni yaaba li paalu bebe.

¹² Kelima bi tianba ye ki tie *moagilimu kelima bi mali ki tie yeni, bine mo tua moagilimu kelima bi niba tieni ba la, bine mo tua yeni kelima *tanpoli diema po. Yua n baa fidi ki ga laa maama, wan ga.»

Jesu gaali a biwaala

¹³ Li yaa puoli bi niba den cuani Jesu kani a biwaala ke wan maani o nii bipo ki go jaandi bipo. Bi ŋoadikaaba den funi leni yaaba n kpendinni ba.

¹⁴ Ama Jesu den yedi: «Cedi mani a biwaala n cua n kani ki da deli ba, kelima tanpoli diema tie yaaba n tie nani a biwaala yene yaa po.»

¹⁵ O den maani o nii bipo, ki fii ki fuadi likani.

O jawapiado

¹⁶ O ja den cua Jesu kani ki buali o: «Canbaa, n baa tieni be yaa bonŋanle ki baa yaa miali n kan gbeni?»

¹⁷ Jesu den goa ki buali o: «Be yaa po ke a buali nni yaala n ŋani po? Yendo bebe n ye ki ŋani. A yaa bua ki baa yaa miali n kan gbeni, ŋan yaa tiendi li balimaama n bili yaala.» O den buali o: «Lile?»

¹⁸ Jesu den goa ki yedi o: «Ŋan da kpa o nilo, ŋan da conbi, ŋan da tieni mi siedi-faama, ŋan da su.

¹⁹ Ŋan jigini a baa leni a naa, ki go bua a nisaalilielo nani ŋan bua a yuli maama yeni.»

²⁰ O jawaalo yeni den yedi o: «N kubi lankuli. N go poadi be?»

²¹ Jesu den yedi o: «A yaa bua ki yaa ŋani cain, ŋan gedi ki ban kuadi ŋan pia yaala ki pa a luoda li ligi, lane a baa pia ŋalimani tanpoli po. Lani, ŋan cua ki ŋoadi nni.»

²² O jawaalo yeni n den gbadi laa maama, o den tagini ki ban caa leni li pabiidili kelima o ŋalimano den yaba.

²³ Lane Jesu den yedi o ŋoadikaaba: «N waani yi i moamoani, li baa pa boncianla o piado po wan kua tanpoli diema nni.

²⁴ N go yedi yi, ku yuoyuogu n tagini mi kpalipienbonma nni dingi ki cie o piado n kua *U Tienu diema nni.»

²⁵ Bi ŋoadikaaba n den gbadi lani, li den paki ba boncianla ke bi yedi: «Li yaa tie yeni, ŋme nan baa fidi ki tindi?»

²⁶ Jesu den diidi ba ki yedi: «Bi nisaaliba kan fidi la, ama U Tienu wani fidi li bonla kuli.»

²⁷ Lanwani Pieli den yedi o: «Diidi ki le, ti den ŋa likuli ki ŋoadi a. Li nan baa tua tipo lede?»

²⁸ Jesu den goa ki yedi ba: «N waani yi i moamoani, li bonla kuli yaa goa ki pandi yaa yogunu, ke o *Ja Bijua mo kali o bali kalikaanu po leni ti kpiagidi kuli, yinba yaaba n ŋua nni, yi moko baa kali piiga n bali kalikaani lie po ki jia Isalele piiga n buoliedi buudi.

²⁹ Yua mo n fii ki ŋa o diena, yaaka o naataanjaba, yaaka o naataanpola, yaaka o baa, yaaka o naa, yaaka o bila, yaaka o kuani kelima n yeli po, o baa baa likuli taalima kobiga kobiga, ki go baa yaa miali n kan gbeni.

³⁰ Ama liiga yaaba siiga boncianla baa tua puoli yaaba, puoli yaaba siiga mo, boncianla baa tua liiga yaaba.