Matie 18 - Gourmanchéma Bible

¹ Lanyogunu bi ŋoadikaaba den nagini Jesu kani ki buali o: «*Tanpoli diema nni ŋme n baa tugi li yuli?»

² Jesu den yini ki biwaaga ki sieni o bi siiga ki yedi:

³ «N waani yi i moamoani, yi yaa lebidi ki tua nani a biwaala yeni yi kan kua tanpoli diema nni.

⁴ Yua n miini o yuli ki tua nani yaa biwaaga n tie na kuli, wani n baa tugi li yuli tanpoli diema nni.

⁵ Yua n ga ki biwaaga nani one cangu kuli n yaa yeli nni, ga mini yaa cangoe.

Mi tulinma n bia maama

⁶ Ama yua mo n baa teni ke yaa bonwaamu n daani nni na siiga baa yendo n tudi kuli, li bi baa ŋani ki cie landaano po ban lani o li naacianli, ki lu o mi ñincianma nni wan mia ki bodi.

⁷ Fala baa ye leni ŋanduna kelima li tingbali bonla yaa po. Kelima li kan tuo ke li tingbali bonla kan yaa ye. Ama fala baa ye leni yaa nilo n cuani la.

⁸ A nuu, yaaka a taali, yaa tie tingbali bonla, ŋan jia ki lu foagima. Kelima a yaa baa yaa miali n kan gbeni leni taayenli yaaka nuyendu, li baa ŋani apo ki cie ŋan yaa pia taana lie leni nii lie ban nan lu ŋa yaa fantama n ki pia gbindima nni.

⁹ A nunbu mo n yaa tie apo tingbali bonla, ŋan logidi bu ki lu foagima, kelima a yaa baa yaa miali n kan gbeni leni nunyenbu, li baa ŋani apo ki cie ŋan yaa pia nuni lie ban lu ŋa ku *fantanbuogu nni.

¹⁰ Fangi mani yi yula ki da fali a bonwaala na siiga baa yendo, kelima n yedi yi ke tanpoli po bi malekinba ye Baa yua n ye tanpoli nintuali yogunu kuli. [

Yaa pia n yaadi

¹¹ Kelima o *Ja Bijua cua ki baa faabi yaaba n yaadi.]

¹² Yi tama be? O ja yaa pia pe kobiga. Bi siiga yendo n yaadi, o baa tieni lede? Waa baa ŋa yaa piiyia n peyiadi n sieni bi kpaakaanu a juana kani ki gedi ki ban lingi yua n yaadi yeni?

¹³ N waani yi i moamoani, o yaa laa o kuli, o baa mangi o pali boncianla kelima laa pia po ki cie yaa piiyia n peyiadi n ki yaadi yeni.

¹⁴ Li tie yeni leni yi Baa yua n ye tanpoli, waa bua ke a bonwaala na siiga baa yendo n yaadi.

A lielo yaa tudi

¹⁵ A lielo yaa tieni ti *tuonbiadi, gedi, fini leni wani yi lie lie, ki waani o o tagili. O yaa tuo a tundi, a ga a lielo yeni.

¹⁶ Ama o yaa tuo a tundi, ŋan taa niyendo, yaaka niba lie ke mi maama kuli n kadi siedinba lie yaaka siedinba taa yaa ñoana nni.

¹⁷ O yaa yie kaa cengi ba mo, ŋan waani Kilisiti n yini yaaba taanli. O yaa yie kaa cengi Kilisiti n yini yaaba taanli moko, ŋan yaa nua o nani o *nilamo leni o lubigaalo yeni.

¹⁸ N waani yi i moamoani, yin baa loli yaala ŋanduna nni kuli, li baa loli tanpoli po, yin baa loti yaala mo ŋanduna nni kuli, li baa loti tanpoli po.

¹⁹ N go waani yi, yi niinni niba lie yaa taani ñoabu ki mia yaala kuli ŋanduna nni, n Baa yua n ye tanpoli baa pa ba la.

²⁰ Kelima niba lie bi niba taa yaa taani n yeli nni, n ye bi siiga nni.»

Yaa naacemo n ki pia sugili o lieba po

²¹ Lani Pieli den nagini o kani ki yedi: «O Diedo, n lielo yaa tudi npo, n baa tieni opo sugili hali taalima ŋa? Hali taalima lele bi?»

²² Jesu den goa ki yedi o: «Mii yedi a hali taalima lele ka, ama n yedi a piilele hali figilima lele.

²³ Kelima tanpoli diema tie nani yaa bado n den bua o naacenba n waani o ban kubi opo yaa ligi maama fuuli.

²⁴ Wan den cili ki coadi yua kuli n kpendinni yaa ligi, bi den cuani o kani yendo ke o pia li panli ke li tie ligiciami.

²⁵ Wan ki den pia liba ki baa pa laa panli yeni, o canbaa den yedi ban kuadi o, wani leni o pua leni o bila leni wan pia yaala kuli, ke li panli n gbeni.

²⁶ O naacemo den gbaani o nintuali ki yedi: ‹Canbaa, juuni npo, n baa pa ŋa likuli.›

²⁷ Mi niñima den cuo o canbaa laa naacemo po ke o puni o sugili o panli kuli po ki cedi wan gedi.

²⁸ Laa naacemo n den ñani, o den tuogi o lieba siiga yendo yua den kubi opo kujapiena kobiga. O den bibi o ki cuo o nialu ki yedi o: ‹Pa nni n panli.›

²⁹ O lielo yeni den gbaani o taana kani ki mia o sugili ki yedi: ‹Juuni npo, n baa pa ŋa.›

³⁰ Ama waa den bua ki tieni sugili. O den taa o ki ban kuani o li kpaadidieli nni hali wan baa pa o panli kuli ki gbeni.

³¹ O lieba n den laa wan tieni yaala kuli, bi pala den biidi boncianla. Bi den gedi ki ban togidi bi canbaa yaala n tieni kuli.

³² Lanwani bi canbaa den yini o naacemo yeni ki yedi o: ‹O naacenbiado na, n den cabi a leni a panli kuli kelima a den mia nni.

³³ Laa pundi ke fini mo n gbadi a lielo po mi niñima nani min gbadi apo maama yeni?›

³⁴ O canbaa pali den beni boncianla. O den teni o li kpaadidieli jiidikaaba ban faligi o hali wan pa o panli kuli ki gbeni.»

³⁵ Jesu den juodi ki yedi: «N Baa yua n ye tanpoli baa soani yi moko yene, yi siiga yua n kaa puni o lielo sugili leni payenli.»