Matie 14 - Gourmanchéma Bible

¹ Laa yogunu *Elodo yua n den tie *Galile diema gufeneeli n den gbadi ke bi maadi Jesu maama,

² o den yedi o badibaanba: «Li tie Jan Batisi. O fii bi tinkpiba siiga. Lani n teni ke o tuuni leni u naa paaciamu ki tiendi mi bancianma yeni.»

³ Kelima puoli po Elodo den cuo Jan ki loli o ki luoni o li kpaadidieli nni, kelima Elodiasa, o waalo Filipi pua yaa po.

⁴ Kelima Jan den tua Elodo: «Laa pundi ŋan taa o wan tua a pua.»

⁵ Elodo den bua ki kpa o, ama o den jie ku niligu kelima bi den nua ke Jan tie sawalipualo.

⁶ Ama Elodo maadaali n den pundi, Elodiasa bisalo den jeli ki ciaga bi nitaankaaba siiga ki mangi Elodo pali,

⁷ hali ke o den poli ki niani ke o baa pa o wan mia o yaala kuli.

⁸ O jafaano den ga o naa tundi ki yedi: «Pa nni nekanba Jan Batisi yuli ku taditialigu nni.»

⁹ O bado pali den biidi, ama kelima wan den poli yaa poli bi nitaankaaba siiga yeni po, o den yedi ke ban teni li o jafaano.

¹⁰ O den soani ke bi ban jia Jan Batisi yuli li kpaadidieli nni.

¹¹ Bi den cuani li ku taditialigu nni ki teni o jafaano, ke o taa li ki gedini o naa po.

¹² Jan ŋoadikaaba den cua ki taa o kpiemo ki ban piini, ki gedi ki ban waani Jesu.

Jesu dini niba tudamuu

¹³ Jesu n den gbadi laa laabaalo, o den kua ku ñinbiagu nni ki piadi ki gedi bi niba n ki ye naani. Ku niligu n den bandi, ku den ñani i dogi nni ki cuoni ki ŋua o.

¹⁴ Wan den ñani ku ñinbiagu nni, o den laa ke bi niba ladi ki ban caa. Mi niñima den cuo o bipo ke o paagi bi yiama.

¹⁵ Ku yenjuogu n den baa, bi ŋoadikaaba den nagini o kani ki yedi o: «Ne tie fuali, u yienu mo bua ki kua, cabi ku niligu ban gedi a dobila nni ki ban da bi bonjekaala.»

¹⁶ Jesu den goa ki yedi ba: «Laa tie tiladi ban fii ki fuadi. Pa ba mani yiba ban je.»

¹⁷ Bi den yedi o: «Ti nan pia dupen bonba muu leni jami lie bebe ne.»

¹⁸ O den yedi ba: «Cuani mani la npo na.»

¹⁹ O den teni ke ku niligu kakali ti muadi po. Lani o den taa bi dupenmuudiba leni i janliedi ki yaadi ki noanli tanpoli po ki tuondi U Tienu. Lani o den cabidicabidi dupen yeni ki teni o ŋoadikaaba ke bi boagidi ku niligu.

²⁰ Bikuli den dini ki guo. Bi den taani ki gbieni piiga n baabuodi lie yaa boncaba n sieni.

²¹ Yaaba n den dini den bua ki pundi jaba tudamuu (5 000), kaa taani bi puoba leni a bila.

Jesu cuoni u ñingbanu po

²² Lanyogunu Jesu den fiini bi ŋoadikaaba ke bi kua ku ñinbiagu nni ki ga o liiga ki baa duodi ki gedi nepo yaa boanjaali hali wan baa cabi ku niligu.

²³ Wan den cabi ba, o den piadi ki doni li juali po ki ban jaandi. Ku ñiagu den bii ke o ye likani obebe.

²⁴ Ku ñinbiagu den cuoni ki bua ki pundi mi ñincianma siiga. A ñinguona den lengidi gu kelima ku den togidi ku faagu.

²⁵ O kootonmua-yuamo Jesu den cuoni u ñingbanu po ki kpendi bi kani.

²⁶ O ŋoadikaaba n den laa ke o cuoni u ñingbanu po yeni, ti jawaandi den cuo ba. Bi den yedi: «Li tie jiingu.» Ti jawaandi po bi den buudi.

²⁷ Jesu den jaligi ki yedi ba: «Duani mani yi yama. Mine. Yin da jie mani.»

²⁸ Pieli den goa ki yedi o: «O Diedo, li yaa tie fine, teni min cuoni mi ñima po ki cua a kani.»

²⁹ O den yedi: «Cua na.» Pieli den ñani ku ñinbiagu nni ki yaa cuoni u ñingbanu po ki caa Jesu po.

³⁰ Ama wan den sua ke ku faagu yaba, ti jawaandi den cuo o ke o cili ki baa mia. O den tiani ki yedi: «O Diedo, ga nni.»

³¹ Jesu den jaligi ki tandi o nuu ki cuo o ki yedi o: «Fini yua yaa *dandanli n ki fuu, be yaa po ke a yama lengidi?»

³² Bi den kua ku ñinbiagu nni ke ku faagu cuo ki sedi.

³³ Yaaba n den ye ku ñinbiagu nni den cua ki labini ki kpiagi Jesu ki yedi: «A tie U Tienu Bijua moamoane.»

Jesu paagidi a yiama Jenesaleti diema nni

³⁴ Ban den duodi mi ñincianma, bi den pundi *Jenesaleti diema nni.

³⁵ Lankani yaa dotieba n den bandi Jesu, bi den soani bi tondiba i tinkundogi kuli nni ke bi cuani o kani a yiama kuli.

³⁶ Bi den miadi o ke wan pa ba ban li sii o liadicuadi bebe. Yaaba n den sii kuli den paagi cain.