Matie 10 - Gourmanchéma Bible

¹ Jesu den yini o piiga n ŋoadikaliediba ki dini ba li bali ki puni ba u paalu ban yaa deli ki ñandi mu cicibiadimu mun ye yaaba yaa niinni, ki go yaa paagidi bi niba leni ban pia yaa yianbuoli leni yaa tadinbuoli kuli po.

² Bi piiga n tondiliediba yeni yela n tie na. Yua n kpia, Simono ban go yi yua Pieli leni o waalo Andile, Sebede bijua Jaka leni o waalo Jan,

³ Filipi leni Batelemi, Toma leni o lubigaalo Matiyu, Alife bijua Jaka leni Tade,

⁴ Simono ban yi yua o Yankuadaano leni Judasa Isikalioto yua n den yuandi ki janbi Jesu.

Jesu soani o piiga n tondiliediba

⁵ Bani n tie Jesu n den soani o piiga n niliediba yaaba ki teni ba yaa ñoabonli n tie na:

⁶ «Da gedi mani bi nilanba po, ki da kua Samali yaaba dogi nni mo, ama yin gedi Isalele buolu yaaba po, bani yaaba n tie nani yaa pe n yaadi yeni.

⁷ Yin tagi naankani kuli, yin yaa wangi ke *U Tienu diema kuli.

⁸ Yin yaa paagidi a yiama, ki fiindi bi tinkpiba, ki ŋanbidi a gbaada, ki deli mu cicibiadimu. Yi den baa fanma, yimo n yaa puuni fanma.

⁹ Da ŋuuni mani wula, yaaka ŋanjilifa, yaaka i ligi kuli yi ŋuuni nni,

¹⁰ ki da taa sancenboagili, yaaka liaditedimu lie, yaaka cacaadi, yaaka gbiamu, kelima o tuonsoanlo pundi ki baa o bonjekaala.

¹¹ Yin kua yaa dociamu nni leni yaa dowaalu nni kuli, yin buali ki bandi yaa nilo n baa tuo ki ga yi cangu yaa ye likani. Yin caani o yaa deni hali yin baan fii yaa yogunu.

¹² Yi yaa kua yaa diegu nni kuli, yin fuondi ba ki yedi: ‹Mi yanduanma n yaa ye leni yi.›

¹³ Yi yaa sua ke ku diegu yaaba ga yi cangu, yin gaali ba yaa yanduanma n yaa ye leni ba. Ama bi yaa ga yi cangu mo, yi gaali n guani yikani.

¹⁴ Bi yaa tuo ki ga yi cangu dieguba nni leni doguba nni kuli, kaa cengi yi maama mo, yi yaa ña likani, yin kpia ba yi taatama.

¹⁵ N waani yi i moamoani, ti buudi daali Sodoma leni *Gomola yaaba yaa fala kan pundi laa dogu yaaba yaa fala.

Bi niba n baa waani Jesu tondiba yaa fala

¹⁶ Cengi mani: N soani yi nani i pe yene i fuasangbanli siiga. Yin yaa fani nani i we yeni, ki go yaa dingi nani mu kpaajiemu yeni.

¹⁷ Fangi mani yi yula leni bi niba, kelima bi baa co ki caani yi li bujiali kani. Bi baa pua yi i baliji li *bali maama bangima diena nni.

¹⁸ Bi baa caani yi gufeneelinba kani leni bi badiba kani kelima n yaa po, ke yin tua bipo siedi bani leni bi nilanba po kuli.

¹⁹ Bi yaa ti cuo ki gedini yi li bujiali kani yaa yogunu, yin da yagi mani yi yama yin baa maadi maama leni yin baa yedi yaala kuli po, kelima lanyogunu bi baa pa yi yin baa yedi yaala.

²⁰ Kelima laa tie yinba ka baa maadi, yi Baa Fuoma, yaama n ye yi niinni, n baa maadi.

²¹ Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po ki cuo ba ki teni ban kpa ba.

²² Bi niba kuli baa nandi yi kelima n yeli po. Ama yua n baa juuni hali mi juodima baa tindi.

²³ Bi yaa waani yi o falabiado doyendu nni, sani mani ki gedi dotogu. N waani yi i moamoani, yi kan gaani Isalele yaaba dogi nni kuli ki gbeni ke o *Ja Bijua daa cua.

²⁴ O ŋoadika ki cie o canbaa, o naacemo mo ki cie o daano.

²⁵ Li dagidi o ŋoadika n yaa tie nani o canbaa, o naacemo mo n yaa tie nani o daano yeni. Bi yaa yini o diedaano *Belisebu, laa pia tama ke bi baa sugidi o diegu nni yaaba ki cie.

Yin baa jie yua

²⁶ Lanwani yin da jie ba, kelima liba kuli ki ye ki wuo ki kan wuodi. Liba kuli ki ye ki duagi ke bi kan bandi la.

²⁷ Min yedi yi yaala li *biigili nni, waani li mani u yensiinu, ban soabidi yaama yi tuba nni, kpaani ma mani a diena po.

²⁸ Da jie mani yaaba n baa kpa ti gbanandi, ama ki nan kan fidi ki kpa o naano. Ama yin yaa jie mani yua n baa fidi ki bolini o naano leni ti gbanandi kuli ku *fantanbuogu nni.

²⁹ Baa kuadi nuani lie lie ka falini? Ama baa nuanyenga bi siiga kan baa tiipo ke yi Baa U Tienu ki bua.

³⁰ To, yinba, baa yi yudi, yi Baa bani ti coali kuli n da maama.

³¹ Lanwani yin da jie mani pu kuli, yi pia mayuli ki cie i nuani boncianla.

Ki tuo bi ki yie Jesu

³² Lani yaa po yua n tuo nni bi niba nintuali, n moko baa tuo o n Baa yua n ye tanpoli nintuali.

³³ Ama yua n nia nni bi niba nintuali, n moko baa nia o n Baa yua n ye tanpoli nintuali.

Jesu cuama cuani mi paadima

³⁴ Yin da tama ke n cua ki baa teni mi yanduanma n yaa ye ŋanduna nni ka. Mii cua ki baa teni mi yanduanma ka n yaa ye, ama n cuani bu toabu.

³⁵ Kelima n cua ki baa teni ki bonjaga n paadi leni o baa, ki bonpuoga n paadi leni o naa, ki biyuaga n paadi leni o yaanaa.

³⁶ O nilo yibalinba baa tie o diegu nni yaaba.

³⁷ Yua n bua o baa yaaka o naa ki cie mini, waa pundi ki yaa tie n ŋoadika. Yua n bua o bijua yaaka o bisalo ki cie nni, waa pundi ki yaa tie n ŋoadika.

³⁸ Yua kaa taa o *dapoanpoanli ki bugi ki ŋua nni, waa pundi ki yaa tie n ŋoadika.

³⁹ Yua n bua ki kubi o miali baa biani li. Ama yua n baa biani o miali kelima mini yaa po baa le li.

Yua n ga Jesu yua cangu panpaani

⁴⁰ Yua n ga yi cangu ga mini yaa cangoe, yua n ga n cangu mo ga yua n soani nni yaagoe.

⁴¹ Yua n ga o sawalipualo cangu kelima o tie sawalipualo po, baa baa o sawalipualo n baa baa yaa panpaani. Yua n ga o niteginka cangu mo kelima o tie niteginka po, baa baa o niteginka n baa baa yaa panpaani.

⁴² N waani yi i moamoani, n ŋoadikaaba na siiga, baa yua yaa jigidi n wa ki cie, yua n puni o mi ñinsoangima ke o ñuni kelima o tie n ŋoadika kuli kan luo o panpaani.»