Marki 15 - Gourmanchéma Bible

¹ U yienu pudima yogunu bi kopadicianba yudanba, bi nikpeliba li *bali maama bangikaaba leni bi *cancannikpeliba den taani ki juogi. Bi den loli Jesu ki gedini o ki ban teni o Pilata.

² Pilata den buali o: «A tie Jufinba bado bi?» Jesu den goa ki yedi o: «Fini n yedi yeni.»

³ Bi kopadicianba yudanba den maadi Pilata ki kuli Jesu boncianla.

⁴ Pilata go den buali o: «A kan goa ki yedi maamaba bi? Cengi ban maadi ki kuliti a yaala kuli.»

⁵ Ama Jesu ki go den guani maamaba kuli. Li den paki Pilata.

Pilata jia ki kadi ke ban kpa Jesu

⁶ Mi *Pendima jaanma kuli Pilata den yen faabi kpaadiyenli ku niligu n mia o wan faabi yua.

⁷ Li den sua ke yaaba n yie li bali danba ki tieni mi janjanma ki ku bi niba ye li kpaadidieli nni. Bi siiga nni yendo den yi Balabasa.

⁸ Ku niligu den cua Pilata kani ki mia o ke wan tieni bipo nani wan maani ki tiendi maama.

⁹ O den goa ki yedi ba: «Yi bua min faabi yipo yinba Jufinba bado yeni bi?»

¹⁰ Kelima o den bani ke bi kopadicianba yudanba den cuo Jesu ki cuani o li bujiali kani kelima bi nunponbiadili po.

¹¹ Bi kopadicianba yudanba den tigini ku niligu ke ban mia Pilata wan faabi bipo Balabasa.

¹² Pilata go den buali ba: «N nan baa tieni yin yi yua Jufinba bado yeni lede?»

¹³ Bi go den tiani ke li pa ki cie ki yedi: «Joani o li *dapoanpoanli po.»

¹⁴ Pilata den yedi ba: «Be yaa po? O tieni be ke li bia?» Bi go den tiani ki pugini: «Joani o li dapoanpoanli po.»

¹⁵ Pilata den bua ki mangi ku niligu pali, lani yaa po o den faabi bipo Balabasa. O den teni ke bi pua Jesu i baliji, ki taa o ki teni a minteela ban ban joani o li dapoanpoanli po.

Loma yaaba minteela ñuadi Jesu

¹⁶ A minteela den gedini Jesu ki ban kuani o gufeneeli diegu nni wan ja ti buudi naankani, ki yini bi cagili kuli.

¹⁷ Bi den golini o bu kpalimoanbu ki taa i konkoni ki piani nani ki badifogiliga yeni ki cibini o.

¹⁸ Lani bi den fuondi o ki tua: «Ti fuondi a, fini Jufinba bado.»

¹⁹ Bi den pua o yuli li kankagili, ki siini opo ti ñinsandi, ki gbaandi o nintuali ki pugi o.

²⁰ Ban den ñuadiñuadi o yeni ki gbeni, bi den goliti bu kpalimoanbu yeni ki goa ki lani o o yaa tiadi, ki ñani o ki caani o ki baan kpaa ki joani o li dapoanpoanli po.

Bi joani Jesu li dapoanpoanli po

²¹ O ja den ye ki yi Simono, ki den tie Silena dogu yua, Alesanda leni Lufusa baa, den ñani u kuanu po ki kpendi ki kadi leni ba, ke bi tieni o u paalu ke o bugi Jesu dapoanpoanli.

²² Bi den gedini Jesu ban yi yaa kaanu Goligota, lani bua ki yedi: “Ku Yukuokuogu kaanu.”

²³ Bi den bua ki teni o yaa duven n kali leni *mili, ama waa den ga.

²⁴ Bi den joani o li dapoanpoanli po, ki boagidi o tiayiekaadi ki den toani tiatia o tiayiekaadi po, ki baa le yua kuli n baa baa yaala.

²⁵ Ban den joani o li dapoanpoanli po den tie u yienu n den paagi yaa yogunu.

²⁶ Yaa diani n den waani ban jia o buudi ki ku o yaala yaa po den tie yine: “Jufinba yaa bado.”

²⁷ Bi go den joani sanjiaba lie a dapoanpoana po, yendo o jienu po, o yua o ganu po. [

²⁸ Yeni, li den tieni nani i Diani n yedi maama: «Bi den nua o ke o taa yenma leni ti *tuonbiadi danba.]»

²⁹ Bi santagiba den sugidi o, ki fegini bi yula ki tua: «Hei, fini yua n baa mudi U Tienu diegu ki go maa gu dana taa,

³⁰ ga a yuli, ki jiidi li dapoanpoanli po.»

³¹ Bi kopadicianba yudanba leni li bali maama bangikaaba moko den ñuadi o yeni bi siiga ki tua: «O den ga nitoaba ki nan kan di fidi ki ga o yuli.»

³² Bi go den tua: «*U Tienu n Gandi Yua, wani Isalele yaaba bado, n jiidi li dapoanpoanli po moala na, ke tin le ki daani o.» Ban den taani ki joani wani leni yaaba a dapoanpoana po moko den sugidi o.

Jesu kuuma

³³ Lan den pundi u yensiicocolu, li *biigili den tieni ki tinga nni kuli ki yaa caa hali li yenlebidili.

³⁴ Lanyogunu Jesu den tiani boncianla: «Elowi, Elowi, lama sabakitani.» lani n tie: «N Tienu, n Tienu, be yaa po ke a ŋa nni?»

³⁵ Yaa niba n den ye likani bi tianba n den gbadi, bi den yedi: «Diidi, o yi o sawalipualo *Elia.»

³⁶ Bi siiga nni yendo den sani ki pagini u cietuogu mi ñinmiligima nni, ki fini li kankagili ki yugidi ki teni o ke wan ño. O nilo yeni den yedi o lieba: «Cedi mani tin le Elia yaa baa cua ki jiini o.»

³⁷ Jesu den tiani ke li pa, ki fuo ki jiini.

³⁸ U Tienu diegu *kpalidoaginkaabu den padi siiga nni ki cili tanpoli ki ban jiidi hali tinga, ki boagidi boaga lie.

³⁹ Minteela kobiga yudaano, yua n den se ki tiegi Jesu, n den laa ke o kpe yeni, o den yedi: «Moamoani, o ja na den tie U Tienu Bijua yo.»

⁴⁰ Bi puoba moko den se foagima ki diidi. Li den pia bi siiga Magidala dogu yua Maliyama, leni Maliyama yua n tie Jaka, o jawaalo leni Jose naa, leni Salome.

⁴¹ Jesu n den ye *Galile, bi puoba yeni den ŋua o ki todi o o yema po. Potoaba yaaba n yaba moko den ye likani. Bi den ciani Jesu ki cua Jelusalema.

Jesu piinma

⁴² Laa daali den tie li boginli daali, lani n tie Jufinba n yen bogini yaala kuli mi *fuodima daali po. Lani yaa po ku jofangu yogunu,

⁴³ Alimate dogu yua Josefi, yua n tie bi *cancannikpeliba siiga yendo ki pia ti kpiagidi, ki moko guu ke *U Tienu diema yogunu n pundi, den paagi o pali ki gedi Pilata po ki ban mia wan teni o Jesu o kpiemo.

⁴⁴ Li den paki Pilata leni Jesu n kpe tontoni maama. O den yini minteela kobiga yudaano ki buali o o yaa kpe ke li waagi?

⁴⁵ Minteela kobiga yudaano n den waani o lan tie maama, o den tuo ke Josefi taa o kpiemo.

⁴⁶ Josefi den da bu kpalipienbu ki gedi ki ban jiini o kpiemo li dapoanpoanli po, ki bobini o bu kpalipienbu yeni, ki ban duani o li kuli nni, ban kpiedi yaali ku tangu niinni. O den bindi ku tanpabigu ki biini li kuli ñoabu.

⁴⁷ Magidala yaa Maliyama leni Jose naa Maliyama den diidi ban duani Jesu o kpiemo naankani.