Marki 14 - Gourmanchéma Bible

¹ Mi *Pendima jaanma leni yaa dupen n ki pia *dabinli jaanma n den sieni dana lie, bi kopadicianba yudanba leni li *bali maama bangikaaba den moandi ban baa tieni maama ki cuo Jesu leni bu nunfanbu ki kpa o.

² Bi den tua: «Lan da tieni mi jaanma dana nni, ke ku fuugu n da ti fii bi niba siiga.»

O pua wuli tulale Jesu yuli po

³ Jesu den ye Betani o *gbaado Simono deni. Wan den ka ki di, o pua den cua ki kubi yaa tiagu n tie alibati tanli, ke ku gbie leni *naadi-moanmoano yaa tulale ke o dunga yaba hali boncianla. O den jobidi ku tiagu yeni ki wuli laa tulale Jesu yuli po.

⁴ Yaaba n den ye likani siiga bi nitianba den maadi leni biyaba leni li pabienli ki yedi: «Be yaa po ke o biani yaa tulale n tie na?

⁵ Bi bi baa fidi ki kuadi o yaa ligi n cie kujapiena kobitaa, ki taa yi ki pa a luoda.» Bi pala den fii o pua yeni po.

⁶ Jesu den yedi ba: «Cedi mani o, be yaa po ke yi yagini o yama? Wan tieni npo yaala na ŋani.

⁷ Kelima a luoda ye leni yi yogunu kuli, yi yaa bua yaa yogunu kuli yi baa fidi ki ŋanbi bipo, ama mini wani kan yaa ye leni yi yogunu kuli.

⁸ O pua na tieni npo wan paani maama. Wan wuli npo tulale yeni, o tuodi ki bogini n gbanandi mi piinma po yo.

⁹ N waani yi i moamoani, ban baa waani o Laabaaliŋamo ŋanduna nni naankani kuli, bi baa tiadi ki togidi o pua na n tieni yaala.»

Judasa tuo ke o baa janbi Jesu

¹⁰ Bi piiga n niliediba siiga yendo ke bi yi o Judasa Isikalioto den gedi bi kopadicianba yudanba po ki bua ki janbi Jesu ki teni o ba ban cuo o.

¹¹ Ban den gbadi o maama bi pala den mangi, ke bi niani o ke bi baa suu o i ligi. Judasa den cili ki lingi wan baa baa yaa folu ki janbi Jesu ki teni ba.

Jesu dini mi Pendima jaanjiema leni o ŋoadikaaba

¹² Yaa dupen n ki pia dabinli jaanma cilidaali, ban yen kodi mi Pendima jaanma pebiga yaa daali yeni, Jesu ŋoadikaaba den buali o: «A bua tin gedi lepo ki ban ŋanbi mi Pendima jaanjiema ŋan je?»

¹³ O den soani o ŋoadikaaba siiga niba lie ki yedi ba: «Kua mani u dogu nni, yi baa tuogi o ja ke o bugi li ñincuali, yin ŋoadi mani o.

¹⁴ Wan baan kua naankani yin yedi likani diedaano: ‹Canbaa yedi daa: Mini leni n ŋoadikaaba n baa je mi Pendima jaanjiema yaa candieli nni ye le?›

¹⁵ O baa waani yi li dietuadili yaali n yaba ki ŋanbi, ke yaala n dagidi kuli ye lienni. Yin ŋanbi mani tipo lankani.»

¹⁶ O ŋoadikaaba den fii ki kua u dogu nni ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.

¹⁷ Ku juogu n den baa, Jesu leni bi piiga n niliediba den cua likani.

¹⁸ Ban den ka u saajekaanu kani ki di yaa yogunu, Jesu den yedi ba: «N waani yi i moamoani, yi siiga nni yendo yua n di leni nni baa janbi nni ki teni ban cuo nni.»

¹⁹ Bi ŋoadikaaba pala den cili ki biidi ke yendo yendo kuli den yedi o: «Li tie mini yo?»

²⁰ O den yedi ba: «Li tie yinba bi piiga n niliediba siiga yendo, yua n taagi ki tungi leni nni ku saatiagu nni na.

²¹ O *Ja Bijua caa nani lan diani ki bili opo maama. Ama fala baa ye leni yaa nilo n baa janbi o Ja Bijua. Li den baa tu laa ja po bi yaa den mali o.»

O Diedo jiema

²² Ban den di yaa yogunu Jesu den taa dupen, ki tuondi ki cabidi ki teni ba, ki yedi: «Ga mani, line tie n gbanandi.»

²³ O go den taa ki tadiñokaaga ki den tuondi U Tienu ki teni ba ke bikuli ñuni.

²⁴ O den yedi ba: «Yaa bonñokaala n tie na tie n soama, yaama n teni ke U Tienu *ŋantaado kua, yaama n baa wuli bi niba boncianla po.

²⁵ N waani yi i moamoani, n kan go ño duven, hali min go baa ti ño o o bonpaano *U Tienu diema nni yaa daali.»

Pieli baa ti nia Jesu

²⁶ Ban den yini Pisominba, bi den ñani ki gedi *Olifie Tiidi juali po.

²⁷ Jesu den yedi ba: «Yikuli baa ŋa nni, kelima li diani: ‹N baa pua o yankpaalo, i pe mo n yadi.›

²⁸ Ama n yaa ti fii bi tinkpiba siiga, n baa ga yi liiga ki gedi *Galile.»

²⁹ Pieli den yedi o: «Yaaba n sieni kuli yaa pala yaa baa biidi ban ŋa ŋa, mini wani n kan ŋa ŋa.»

³⁰ Jesu den yedi o: «N waani a i moamoani, dinla ñiagu na liga, hali ke ku kootongu daa mua milie, a baa nia taalima taa ke ŋaa bani nni.»

³¹ Ama Pieli den nia hali boncianla ki yedi: «Baa li yaa tie tiladi ke min taani ki kpe leni a, n kan nia ke mii bani a.» Bikuli den yedi yeni.

Jesu jaandi Jetesemane sadinga nni

³² Jesu leni o ŋoadikaaba den gedi yaa kaanu n yi Jetesemane nni. O den yedi ba: «Kali mani ne hali min baa jaandi.»

³³ O den taa Pieli, Jaka leni Jan ke bi yegi leni o. I jeje leni li paboanli den cili ki cuo o.

³⁴ O den yedi ba: «Li paboanli cuo nni hali ke li naani n baa kpe yeni, sedi mani ne ki yaa guu.»

³⁵ Lani, o den suagi liiga waamu ki baa ki labini, ki jaandi ke li yaa baa tuo, yaa yogunu n kpendi na n lagidi ki ŋa o.

³⁶ O den tua: «N Baa, n Baa, a fidi li bonla kuli, ŋan ñani n kani yaa tadiñokaaga n tie na min da ño. Die lan da tua mini ka n bua yaala, ama fine n bua yaala.»

³⁷ O den guani o ŋoadikaaba kani ki sua ke bi goa, ke o yedi Pieli: «Simono, a goa yo? Ŋaa fidi ki guudi baa waamu?

³⁸ Yaa guu mani ki jaandi ke yin da ti kua mi tulinma nni. Li pali bua, ama ti gbanandi nan tadi.»

³⁹ O go den piadi, ki go jaandi nani mi kpiama yeni.

⁴⁰ O go den guani bikani ki sua ke bi goagoa, kelima mi guama den gbadi ba. Baa den bani ban baa goa ki yedi o yaala.

⁴¹ O go den guani mi tataama ki yedi ba: «Yi baa goa ki fuodi mani yo? Li dagidi. U yogunu pundi. Bi janbi o Ja Bijua, ki baa teni nni ti *tuonbiadi danba nuu nni.

⁴² Fii mani tin gedi. Diidi mani, yua n baa janbi nni kpendi na.»

Bi cuo Jesu

⁴³ Jesu n da den maadi yaa yogunu, Judasa, yua n tie bi piiga n niliediba siiga yendo, den pundi o kani. Bi kopadicianba yudanba leni li bali maama bangikaaba leni Jufinba *nikpeliba n den soani yaa niligu ke bi kukubi mu jugisiemu leni i gbiami den yegi leni o.

⁴⁴ Wani o jajanbido yeni den tuodi ki waani ku niligu yaa maalima n tie na: «Min baa gobini yua yeni, wani n yeni, yin cuo o mani ki gedini o wan da cia.»

⁴⁵ Wani Judasa n pundi likani, lanyogunu liga o den nagini Jesu kani ki yedi o: «Canbaa,» ki gobini o.

⁴⁶ Lani bi niba yeni den bibi Jesu ki cuo o.

⁴⁷ Yaaba n den ye likani siiga yendo den noadi o jugisiega, ki pedi ki joandi bi kopadicianba bado naacemo tubili.

⁴⁸ Jesu den yedi ku niligu: «Yi cua ki kukubi mu jugisiemu leni i gbiami nani yi lingi o sanjialo yeni ki baa cuo nni bii?

⁴⁹ N den ye leni yi U Tienu diegu nni daali kuli ki bangi yi U Tienu maama, ama yii den cuo nni. Li tua yeni ke yaala n diani i Diani nni n tieni ki dudi.»

⁵⁰ Lani bi ŋoadikaaba kuli den ŋa o ki sani.

⁵¹ O jawaalo den ŋua Jesu ki goli bu kpalibu bebe. Ban den cuo o,

⁵² o den ŋmadi ki ŋa o kpalibu yeni ki sani mubili.

Jesu sedi bi cancannikpeliba nintuali

⁵³ Bi den gedini Jesu bi kopadicianba bado kani. Bi kopadicianba yudanba leni bi nikpeliba leni li bali maama bangikaaba den taani lankani.

⁵⁴ Pieli den ŋua Jesu foagima hali ki ban pundi bi kopadicianba bado luolu nni. O den ka leni bi naacenba ki yie mi fantama.

⁵⁵ Bi kopadicianba yudanba leni Jufinba *cancannikpeliba taancianli kuli den lingi yaa siedi n baa pa ba u sanu ban teni ban kpa Jesu. Ama baa den baa.

⁵⁶ Bi niba boncianla den tieni Jesu po mi siedi-faama, ama bi siedi yeni ki den taa yenma.

⁵⁷ Bi tianba den fii ki sedi ki tieni opo yaa siedi-faama n tie na ki yedi:

⁵⁸ «Ti den gbadi ke o yedi: ‹N baa mudi U Tienu diegu na, o nisaalo nuu n maa yaala, ki go maa U Tienu diegu toagu dana taa, nisaalo nuu n kaa maa yaagu.› »

⁵⁹ Baa laa maama po bi siedi naa den taa yenma.

⁶⁰ Lani bi kopadicianba bado den fii ki sedi bi kukuli siiga ki buali Jesu: «A kan guani maamaba kuli? Yaa niba n ye ne tiendi apo be siedo nna?»

⁶¹ Jesu den ŋmini suo, waa guani liba kuli. Bi kopadicianba bado go den buali o: «A tie *U Tienu n Gandi Yua, U Tienu yua n pia ti kpiagidi yaa Bijua bi?»

⁶² Jesu den yedi o: «N tie wani. Yi baa ti le ke o Ja Bijua ka U Paaciamu Kuli Daano jienu po, ki go le ke o ñani tanpoli ki kpendi ti tawadi nni.»

⁶³ Lane bi kopadicianba bado den cuo wani oba yaa tiayiekaadi ki padi ki yedi: «Ti go bua siedinba ki tieni be?

⁶⁴ Yi gbadi ke o sugi U Tienu. Yi jagi be?» Bikuli den taani ki yedi ke li pundi wan kpe.

⁶⁵ Lani bi tianba den cili ki siini opo ti ñinsandi, ki pini o nunga li cabili ki kudi o a nukula ki tua o: «Ŋme pua ŋa? Bandi o.» Bi naacenba den taa o ki pabidi o i tanpabi.

Pieli nia ke waa bani Jesu

⁶⁶ Pieli den ye tiipo bi kopadicianba bado luolu nni yeni, ke yaa jafanba n tuuni ku diegu yeni niinni siiga yendo den cua likani.

⁶⁷ Wan den laa Pieli ke o yie mi fantama, o den noanli o ki yedi o: «A moko den ye leni Nasaleti yua Jesu.»

⁶⁸ Pieli den nia ki yedi: «Mii bani ŋan bua ki yedi yaala, mii ga.» Lani o den ñani u luolu nni ki tagi ki caa bu buliñoajabu po ke ku kootongu mua.

⁶⁹ O jafaano yeni den laa o ki go yedi yaaba n se likani: «One moko tie bi jaba yeni siiga yua de.» Pieli go den nia.

⁷⁰ Lan yen waamu yaaba n ye likani den yedi Pieli: «Moamoani lige, a moko tie laa niba siiga yua, kelima a tie Galile yua.»

⁷¹ Lanwani Pieli den cili ki solini o yuli ki go polini ki tua: «Mii bani yin maadi yaa ja yeni yaa maama yeni.»

⁷² Lanyogunu ku kootongu go den mua mi liema, ke Pieli di den tiadi Jesu n bi maadi o yaama ki yedi: «Hali ke ku kootongu daa mua mi liema, a baa nia taalima taa ke ŋaa bani nni.» Lani o den ñani ki ban buudi.