Luki 9 - Gourmanchéma Bible

¹ Jesu den yini ki taani bi piiga n niliediba ki puni ba u paalu leni li bali ban yaa paani mu cicibiadimu kuli ki go paagidi bi niba ban yia yaa yianbuoli kuli.

² O den soani ba ke ban yaa wangi *U Tienu diema maama, ki go yaa paagidi a yiama moko.

³ O den yedi ba: «Yin da taa liba li sancenli po, baa gbiamu, baa sancenboagili, baa jiema, baa ligi, ki da taa liada lie mo.

⁴ Yin kua yaa diegu nni kuli, yin yaa ye lankani hali yin baan fii.

⁵ Bi yaa tuo ki ga yi cangu naankani kuli, yin ña laa dogu nni yaa yogunu, yin kpia ba yi taatama, lan tua siedi bi yiema po.»

⁶ Lani bi ŋoadikaaba den fii ki gedi ki goagoadi i dowaali nni ki wangi o Laabaaliŋamo, ki paagidi a yiama i kaani kuli.

Elodo yanlengidima

⁷ *Elodo yua n den die *Galile diema den gbadi yaala n tiendi kuli, o yama den lengidi kelima bi tianba den tua ke Jan Batisi fii bi tinkpiba siiga,

⁸ bine n yaa tua ke o sawalipualo *Elia n go doagidi o yuli, bine mo ke bi sawalipuakpeliba siiga yendo n fii bi tinkpiba siiga.

⁹ Wani Elodo mo den tua: «N den teni ke bi jia Jan yuli, lanwani min gba ke bi maadi yua yaa po li naa bonla kuli tie ŋme?» O den moandi ki baa le o.

Jesu dini niba tudamuu

¹⁰ Jesu tondiba den guani o kani ki togidi o ban den tieni yaala kuli. Lani o den taa ba bi bebe ke bi gedi Betisayida dogu kunu po.

¹¹ A nigola den bandi ki ŋoadi o. Jesu den biali ba, ki waani ba U Tienu diema maama ki go paagi yaaba n ki pa.

¹² U yienu n bua ki kua, bi piiga n niliediba den nagini Jesu kani ki yedi o: «Cabi ku niligu ban yadi ki gedi yaa dobila leni yaa koajaana n kuu, ki ban baa u duankaanu leni li bonjekaala, kelima tin ye naani na tie fuali.»

¹³ Jesu den yedi ba: «Pa ba mani yiba ban je.» Bi den goa ki yedi o: «Tii pia liba kali dupen bonbi muu leni jami lie, li yaa tie ke ti baa gedi tiba ki ban da li bonjekaala yaa niba n ye ne kuli po yaaka.»

¹⁴ Kelima bi jaba bebe den bua ki pundi tudamuu (5 000). Jesu den yedi o ŋoadikaaba: «Teni mani ban boagidi nani niba piimuu muu yeni, ki kali caga caga.»

¹⁵ Bi den tieni yeni ki kaani bi niba kuli.

¹⁶ Jesu den taa bi dupenmuudiba leni i janliedi yeni, ki yaadi ki noanli tanpoli po ki jaandi ki seligi la. Lani o den cabidicabidi ki teni o ŋoadikaaba ban boagidi ku niligu.

¹⁷ Yua kuli den dini ki guo. Bi den wodi ban dini ki sieni yaala ki gbieni piiga n baabuodi lie leni a boncaba.

Pieli kadi ki waani ke Jesu tie Kilisiti

¹⁸ Dayenli Jesu den piadi ki jaandi ke o ŋoadikaaba bebe den ye leni o. O den buali ba: «A nigola tua ke n tie ŋme?»

¹⁹ Bi den goa ki yedi o: «Boncianla tua ke a tie Jan Batisi, bine Elia, bine mo ke bi sawalipuaba siiga nni yendo n fii bi tinkpiba siiga.»

²⁰ O go den yedi ba: «Yi mo te, yi mo nan yedi ke n tie ŋme yo?» Pieli den goa ki yedi o: «A tie U Tienu n *Gandi Yua.»

²¹ Jesu den maadi leni li bali ki yedi ke ban da waani la niloba kuli.

Jesu pua sawali ke o baa kpe ki go fii

²² O go den yedi ke li tie tiladi o *Ja Bijua n le fala boncianla, ke Jufinba *nikpeliba leni bi kopadicianba yudanba leni li *balimaama bangikaaba n yie o, ki kpa o. Ama ke li dataali daali o baa fii bi tinkpiba siiga.

O nilo n baa ŋoadi Jesu maama

²³ Lani Jesu den yedi bi niba kuli: «Yua n bua ki yaa ŋua nni kuli, wan yie o yuli, ki yaa bugi o *dapoanpoanli daali kuli ki nan yaa ŋua nni.

²⁴ Kelima yua n bua ki ga o miali kuli o baa biani li, ama yua n baa biani o miali kelima mini yaa po kuli baa faabi li.

²⁵ O nilo yaa baa ki diedi ŋanduna kuli ke o miali nan bodi, bi ki bolini o yuli, li baa ŋanbi opo be?

²⁶ Yua n jie i fe mini leni n maama kuli po, o Ja Bijua moko baa ti jie opo i fe o yaa cua leni o kpiagidi leni Baa yaa kpiagidi ki yegi leni yaa malekinba n gagidi.

²⁷ N waani yi moamoani, yaaba n ye nekanba, bi tianba kan kpe kaa laa U Tienu diema.»

Jesu lebidi cain

²⁸ Jesu n den maadi laa maama ke dana nii pendi, o den taa Pieli leni Jan leni Jaka ki doni li juali po ki baa jaandi.

²⁹ Wan den jaandi yaa yogunu, o nunga n naani maama den lebidi, o tiayiekaadi moko den lebidi ki pendi hali ki ñuliti.

³⁰ Jaba lie den maadi leni o. Li den tie, Musa leni Elia, ke bi doagidi bi yula ke,

³¹ tanpoli kpiagidi lindi ba, ke bi maadi leni Jesu wan baa kpe yaa kuuma Jelusalema nni po.

³² Mi guama den gbadi Pieli leni o lieba, ama bi den yie mi guama po ki laa Jesu kpiagidi leni yaa jaliediba n se leni o.

³³ Bi jaba yeni n den baa ña Jesu kani yaa yogunu, Pieli den yedi o: «Canbaa, li ŋani tin yaa ye ne. Tin tii suga taa, fini yenli, Musa yenli, Elia mo yenli.» Waa den bani wan maadi yaala.

³⁴ Wan den maadi yeni yaa yogunu, ku tawaligu den jiidi ki libini ba. Bi ŋoadikaaba n den laa ke bi kua ku tawaligu nni, ti jawaandi den cuo ba.

³⁵ U nialu den maadi ku tawaligu nni ki yedi: «One n tie n Bijua, min gandi yua, cengi mani o.»

³⁶ U nialu yeni n den maadi ki gbeni, bi sua ke Jesu ye obebe. Bi ŋoadikaaba den muubi bi ñoana, baa togidi oba laa yogunu ban laa yaala.

Jesu ñani ki cicibiadiga o jawaalo niinni

³⁷ Lan den fii ki fa, bi den jiidi li juali po, yaa niligu n yaba den tuogi Jesu.

³⁸ O ja den kpaani ku niligu siiga ki yedi: «Canbaa, n mia ŋa ŋan diidi npo n bijua na, kelima o tie n bonjayenyenga.

³⁹ Ki cicibiadiga n fii opo yaa yogunu kuli, lanyogu liga o yen kuudi, gan yaa digini o leni u paalu ki kpalini o ti ñinsanpunpudi ki faligidi o. Ki ñama o niinni pa opo.

⁴⁰ N bi mia a ŋoadikaaba ke ban deli ki ñani ga o kani, ke baa fidi.»

⁴¹ Jesu den goa ki yedi: «Yinba, yaa nibuolu n luo li dandanli ki go bia, n baa taa ki ye leni yi ki go juuni yipo ki pundi u laa yogunu? Cuani a bijua na.»

⁴² Ki biga n den nagini Jesu kani yaa yogunu, ki cicibiadiga den guli o ki go digini o leni u paalu. Jesu den funi leni ga, ki paagi ki biga, ki teni o o baa.

⁴³ U Tienu kpiagidi leni o paaciamu den paki yaaba n ye likani kuli. Bi niba kuli n den laa Jesu n tieni yaala kuli ke li fangicianli leni li pakili cuo ba, o den yedi o ŋoadikaaba:

Jesu go pua sawali ke o baa kpe

⁴⁴ «Yinba, yin diadi mani yi tuba ki cengi mani mi naa maama bonŋanla: Bi niba baa janbi o Ja Bijua ki teni o bi nisaaliba nuu nni.»

⁴⁵ Ama bi ŋoadikaaba ki den ga laa maama n bua ki yedi yaala. Li den duagi bipo ke ban da ga ma. Bi den jie, baa buali Jesu lipo.

Yua n tugi li yuli Jesu ŋoadikaaba siiga

⁴⁶ Mi niama den fii bi ŋoadikaaba siiga, ke ban bandi bi siiga yua n tugi li yuli.

⁴⁷ Jesu den bani ban maliti yaala bi pala nni, ki taa ki biwaaga ki sieni o o kani

⁴⁸ ki yedi ba: «Yua n ga ki naa biga n yeli nni o ga mini nba yo, yua n ga mini mo, o ga yua n soani nni. Yi siiga yua n wa ki cie yikuli, wani n tugi li yuli.»

Yua n kaa yie Jesu kuli tie ti yua

⁴⁹ Jan den yedi: «Canbaa, ti den laa yaa ja n deli mu cicibiadimu a yeli nni ke ti yie opo, kelima waa taani leni ti ki ŋua ŋa.»

⁵⁰ Jesu den goa ki yedi o: «Da go yie mani opo ke wan da tieni la, kelima yua n kaa yie yipo kuli taa yipo.»

Samali doyendu yaaba naa ga Jesu cangu

⁵¹ U yogunu n den nagini ke U Tienu baa ñani Jesu ŋanduna nni ki duoni o tanpoli, Jesu den jagi ki bili ke o baa gedi Jelusalema.

⁵² O den soani bi tondiba ke bi kua o liiga. Bi den gedi ki ban kua Samali doyendu nni ki baa lingi o po ku candiegu.

⁵³ Ama baa den tuo Jesu cangu, kelima wan caa Jelusalema yeni yaa po.

⁵⁴ O ŋoadikaaba Jaka leni Jan n den laa lani bi den yedi: «Ti Daano, a bua tin yedi mi fantama n ña tanpoli po ki bolini ba bi?»

⁵⁵ Jesu den jigidi ki noanli ba ki funi leni ba. Kelima o Ja Bijua naa cua ki baa bolini bi nisaaliba miana ka, ama ki faabi ba yo.

⁵⁶ Bi den suagi liiga ki gedi dotogu.

Yaaba n bua ki ŋoadi Jesu

⁵⁷ Ban den ye u sanu nni o nilo den yedi Jesu: «N baa ŋua ŋa ŋan caa naani kuli.»

⁵⁸ Jesu den goa ki yedi o: «I coli pia i fali, ti bonyugiditi mo pia a tiana, ama o Ja Bijua wani naa pia wan baa dua naani.»

⁵⁹ Jesu den yedi nitoa mo: «Ŋoadi nni.» O den goa ki yedi o: «N Daano, pa nni min da kpa gedi ki ban piini n baa no.»

⁶⁰ Jesu den yedi o: «Cedi bi tinkpiba n piini bi tinkpiba, ama fini, gedi ki ban yaa wangi U Tienu diema maama.»

⁶¹ Nitoa go den yedi o: «N Daano, n baa ŋoadi a, ama pa nni min da kpa gedi ki ban cabi n denpo yaaba.»

⁶² Jesu go den yedi o: «Yua n mubini li naakuuli ki baa yaa ko, ki go gbagidi ki nua puoli, waa dagidi U Tienu diema po.»