Luki 7 - Gourmanchéma Bible

¹ Jesu n den maadi yaa niba n cengi opo yaa maama n tie na kuli ki gbeni, o den kua Kapenayuma dogu nni.

² Minteela kobiga yudaano yendo den ye ki pia o naacemo ke o tie opo nimoano, ke o yia hali ki bua ki kpe.

³ O yudaano yeni n den gbadi ke bi maadi Jesu maama, o den soani Jufinba *nikpeliba bi tianba o kani ke ban mia o wan cua ki faabi o naacemo.

⁴ Bi den pundi Jesu kani ki mia o ki moandi ke wan da yie ki yedi: «O ja yeni pundi ŋan ŋanbi opo,

⁵ kelima o bua ti buolu. Wani n maa tipo li *bali maama bangima dieli.»

⁶ Jesu den yegi leni ba ki caa. Wan den kuli a minteela yudaano diegu, o den tuogi wan den soani o danlinba yaaba o kani ke ban yedi o: «N Daano, da coagi a yuli, mii pundi ŋan kua n dieli nni.

⁷ Lani yaa po moko n teni ke mii sua ke li pundi min cua a kani mini nba. Maadi a maama bebe, n naacemo baa paagi.

⁸ Mini yua ke toaba die nni, n moko pia min die yaa minteela. N yen yedi one: ‹Gedi,› wan gedi, ki yedi o yua mo: ‹Cua na,› wan cua. N yen yedi n naacemo: ‹Tieni line,› wan tieni.»

⁹ Jesu n den gbadi laa maama, li den tie opo bonlidikaala, die ki mangi o. O den jigidi ki yedi yaa niligu n ŋua o: «N waani yi ke baa Isalele yaaba siiga, n daa laa yaa dandancianli n yene buolu.»

¹⁰ Wan den soani yaaba n den lebidi ki pundi denpo, bi den sua ke yaa naacemo n bi yia yeni pia laafia.

Jesu fiini li kpepuoli bijua bi tinkpiba siiga

¹¹ Lani n pendi Jesu den gedi Nayina dogu. O ŋoadikaaba leni nigocianli den yegi leni o.

¹² Jesu n den nagini u dogu bilinciamu buliñoajabu, o den tuogi yaaba n ñani lienni ki tugi o kpiemo ki baan piini. Yua n kpe yeni den tie o naa tugu nni bonjayenyenga, ke o naa mo tie kpepuoli. U dogu yaaba boncianla den yegi leni o.

¹³ O Diedo n den laa o, mi niñima den cuo o opo ke o yedi: «Da buudi.»

¹⁴ O den nagini ki sii ku tinkpikpagu. Yaaba n tugi den sedi. O den yedi: «O jawaalo na, n yedi a: ‹Fii.› »

¹⁵ Lani yua n kpe yeni den fii ki kali ki maadi. Jesu den teni o o naa.

¹⁶ Li fangicianli den cuo laa niba kuli, bi den kpiagidi U Tienu ki tua: «O sawalipuaciamo fii ti siiga. U Tienu goandi o nibuolu.»

¹⁷ Jesu n den tieni yaala yeni kuli yaa maama den yadi Jude kuli nni leni yaa tinmu n lindi kuli.

Jan Batisi soani o tondiba Jesu kani

¹⁸ Jan ŋoadikaaba den togidi o laa bonla kuli.

¹⁹ O den yini bi siiga ŋoadikaaba lie ki soani ba Jesu kani, ke ban yedi o: «Naani a tie yua n den baa cua bi, bi ti da go baa guu nitoa yo?»

²⁰ Bi jaba yeni n den pundi Jesu kani bi den yedi o: «Jan Batisi n soani ti a kani ke tin buali a fini n yaa tie tin gu yua yaa cuama bi, bi ke ti da go yaa baa daani nitoa yo?»

²¹ Lanyogunu Jesu den paagi a yiama leni a tadima leni mu cicibiadimu n die yaaba kuli boncianla, ki go noadi a juama moko boncianla.

²² O den goa ki yedi Jan tondiba: «Guani mani ki ban togidi Jan yin gba ki go nua yaala: A juama noadi, a waba cuoni, a gbaada ŋanbidi, a woma gba, bi tinkpiba fiidi, a luoda mo gba o Laabaaliŋamo.

²³ Li pamanli ye leni min kaa tie yua yaa po tingbali bonla.»

²⁴ Jan tondiba n den ñani Jesu kani yaa yogunu, o den maadi ku niligu Jan maama ki yedi: «Yi den gedi mi fanpienma po ki baan le be? Yua n tie nani u faalu n liebi yaa ñinmuagu bi?

²⁵ To, yi nan den gedi ki baan le be? Yua n bobi ti tiaŋandi bi? Diidi ki le mani, yaaba n yie ti tiaŋandi ke bi yema kuli ŋani wani ye bi badicianba diedi nni.

²⁶ Yi nan den li gedi ki baan le be? O sawalipualo bi? Yeni de, ama n waani yi ke yin ban laa yua cie baa sawalipualo.

²⁷ Wani yaa po yo ke li diani ki yedi: ‹Diidi, n soani n tondo a liiga, Ke wan ŋanbi a sanu.›

²⁸ N go yedi yi ke pua n mali yua kuli, yua n cie Jan ki ye. Ama yua n wa ki cie bikuli U Tienu n diema nni, wani n yaba ki cie o.

²⁹ Yaa niba n den cengi o kuli leni bi lubigaaba kuli den saa U Tienu po moamoani ki cedi ke Jan *batisi ba.

³⁰ Ama *Falisieninba leni li *bali maama bangikacianba n den yie ke Jan kan batisi ba yeni, bi den yie U Tienu n den jagi ki bili bipo yaala.»

³¹ Jesu den pugini ki yedi: «N baa nandi moala na niba leni be? Bi naani leni be?

³² Bi naani leni yaa bila n ka ki daaga nni ki yi biyaba ki tua: ‹Ti piebi yipo mu yelimu, Ke yii jeli ki ciaga. Ti yini yipo i kuyani, Yi naa mua.›

³³ Kelima Jan Batisi cua, waa di jiema, waa ñu duven mo, ke yi tua: ‹O pia ki cicibiadiga.›

³⁴ O *Ja Bijua mo cua ki di ki go ñu ke yi tua: ‹Diidi ki le, o tie jiejiedo leni dañolo, ki tie bi lubigaaba leni i tagibiadi danba kuli yaa danli.›

³⁵ Yaaba n tuo U Tienu yanfuoma kuli saa i moamoani ke mi tiegi.»

Yaa pua yaa tuona n bia baa sugili

³⁶ Falisieninba siiga yendo den yini Jesu wan je leni o. Jesu den kua o diegu nni ki kali u saajekaanu kani.

³⁷ O pua den ye u dogu nni ke o tagu bia. Wan den bandi ke Jesu ye Falisieni yeni deni ki di, o den taa yaa tanli n yi alibati yaa buteliga ke ki gbie leni tulale,

³⁸ ki cua ki sedi Jesu puoli po o taana kani ke o kpaagi li bonkalikaala po. O pua yeni den buudi ke o ninsiidi cuudi ki soangi Jesu taana ke o duuni a leni o yudi ki waliti ŋa ki sogi a tulale.

³⁹ Yaa Falisieni n den yini Jesu n den laa lani, o den yedi o yama nni: «One yaa bi tie sawalipualo moamoani o bi baa bandi yaa pua n siigi o na n tie yua, leni o tagu n tie maama, ke o tie tagibiadu daano.»

⁴⁰ Lani Jesu den yedi Falisieni yeni: «Simono, n pia mi maama ki baa maadi a.» Simono den goa ki yedi o: «Canbaa, maadi.»

⁴¹ Jesu den yedi: «O pandinlo den ye ki pia pandanba lie. One den kubi opo kujapiena kobi muu, o lielo mo kujapiena piimuu.

⁴² Ban kaa den pia liba ki baa pa, o den cabi bani niba lie yeni kuli bi pana. Bani niba lie yeni siiga, ŋme baa bua o ki cie o yua?»

⁴³ Simono den goa ki yedi o: «N tama wan cabi yua ke o panli yaba ki cie yene.» Jesu den yedi o: «A saa i moamoani.»

⁴⁴ Lani o den gbegi ki diidi o pua yeni ki go yedi Simono: «A laa o pua na? Min kua a dieli nni, ŋaa puni nni ñima ke n nigidi n taana, ama wani, o nigidi n taana leni o ninsiidi ki go duuni a leni o yudi.

⁴⁵ Ŋaa gobini nni leni mi buama, ama wani, hali min kua, o li waliti n taana yo, waa cedi.

⁴⁶ Ŋaa wuli n yuli po kpama, ama wani, o sogi n taana tulale yua yaa dunga n pa.

⁴⁷ Lani yaa po n yedi a ke wan bua nni boncianla yeni doagidi ke o baa sugili o *tuonbiadi yaadi n yaba po. Yua n baa sugili yaa tuonbiadi n wa po mo bua waamu bebe.»

⁴⁸ O den yedi o pua mo: «A baa a tuonbiadi sugili.»

⁴⁹ Yaaba n den taani ki di leni o den maliti bi pala nni: «One tie ŋme ki puuni sugili ti tuonbiadi po?»

⁵⁰ Jesu go den yedi o pua yeni: «A *dandanli faabi a, fii ki yaa caa leni mi yanduanma.»