Luki 6 - Gourmanchéma Bible

¹ Mi *fuodima daali dayenli Jesu n den tagi ki poandi *ŋalikama kuani nni, o ŋoadikaaba den jobidi ŋalikama siandi ki nugi ki ŋmani.

² *Falisieninba bi tianba den yedi ba: «Be n teni ke yi tiendi yaala n kua mi fuodima daali?»

³ Jesu den goa ki yedi ba: «Naani yii cogi Dafidi n den tieni yaala mi koma n den cuo o, wani leni yaaba n ye leni o kuli yoo,

⁴ ke o kua U Tienu diegu nni ki taa *dupen bilika ki ŋmani, baa ke li kua nitoa kuli n ŋmani dupen yeni li yaa tie kopadicianba yaaka? Ama Dafidi den taa ki ŋmani ki teni yaaba n yegi leni o moko.»

⁵ Jesu go den yedi ba: «O *Ja Bijua n die mi fuodima daali.»

Jesu paagi o ja yua yaa nuu n faani

⁶ Mi fuodima daali datoali Jesu den kua li *bali maama bangima dieli nni ki bangi bi niba U Tienu maama. O ja den ye likani ke o jienu faani.

⁷ Li *bali maama bangikaaba leni Falisieninba den kpaagi Jesu ki baa le o yaa baa paagi o mi fuodima daali, ke ban baa ban baa fidi ki kuli o leni yaala.

⁸ Jesu den bani ban bungi yaala ki yedi yua yaa nuu n faani: «Fii ki sedi siiga nne.» O den fii ki sedi.

⁹ Jesu den yedi ba: «N buali yi: Naani li pia u sanu tin tieni yaala n ŋani bi yaala n bia mi fuodima daali, ki faabi o nilo bi, ki bolini o yo?»

¹⁰ O den diidi ki lindi bikuli ki yedi o ja yeni: «Tandi a nuu.» O den tandi u ke u paagi.

¹¹ Bi pala den beni hali ke li pendi, ke bi juogi leni biyaba ban baa tieni Jesu yaala.

Bi piiga n tondiliediba

¹² Laa yogunu Jesu den gedi li juali po ki baan jaandi. O den tieni ñamungu ki jaandi U Tienu.

¹³ Lan den fii ki fa o den yini o ŋoadikaaba, ki gandi bi siiga nni piiga n niba lie, ki yini ba bi tondiba.

¹⁴ Bi yela n tie na: Simono, Jesu n den yini yua Pieli leni o waalo Andile, leni Jaka leni Jan, leni Filipi leni Batelemi,

¹⁵ leni Matiyu leni Toma, leni Alife bijua Jaka leni Simono, ban den yi yua o Yankuadaano,

¹⁶ leni Jaka bijua Jude, leni Judasa Isikalioto yua n den ti tua i janbi daano.

Jesu bangi ku niligu ki go paagi a yiama

¹⁷ Jesu den jiidi li juali po leni ba, ki sedi u tialu po. O ŋoadikaaba toaba boncianla den ye likani. Nitoaba moko den wuli ki ladi likani, ki ñani Jude nni kuli, leni Jelusalema, leni Tili leni Sidoni, yaa dogi n baali mi ñincianma. Bikuli den cua ki bua ki gbadi o maama, ki go bua wan paagi ba bi yiani po.

¹⁸ Mu cicibiadimu n den ye yaaba yaa niinni ki yagini bi yama moko den paagi.

¹⁹ Ku niligu siiga yua kuli den moandi ki bua ki sii o kelima u paalu den ña o niinni ki paagidi bikuli.

Li pamanmoanli leni o falabiado

²⁰ Lani Jesu den yaadi ki diidi o ŋoadikaaba ki yedi: «Li pamanli ye leni yinba yaaba n tie a luoda, kelima *U Tienu diema tie yi yaama.

²¹ Li pamanli ye leni yinba, mi koma n pia yaaba moala kelima yi baa guo. Li pamanli ye leni yinba yaaba n buudi moala na, kelima yi baa ti yaa laa.

²² Li pamanli ye leni yimo bi niba yaa nani yi, ki deli yi ki ñandi bi siiga, ki sugidi yi, ki sengi yi nani ti bonjoagindi yeni kelima o Ja Bijua yaa po.

²³ Li yaa tua yipo yeni yaa daali, yin mangi mani yi pala ki yaa yugi ki ciini li pamanli po kelima yaa panpaani n bili yipo tanpoli po yaba. Kelima bi yaajanba moko den tuuni bi sawalipuaba yene.

²⁴ Ama fala baa ye leni yinba a piada, kelima yi mali ki baa yi yemanma no.

²⁵ Fala baa ye leni yinba yaaba n pia ke li kandi moala na, kelima mi koma baa ti gbadi yi. Fala baa ye leni yinba yaaba n laa ti laadi moala na, kelima yi pala baa ti boandi yin yaa mua ti ninsiidi.

²⁶ Fala baa ye leni yi bi niba kuli yaa ti pagi yi, bi yaajanba moko den pagi bi sawalipua-faadanba yene.

Mi buama yibalinba po

²⁷ Yinba yaaba n cengi n maama, n yedi yi line: Yaa bua mani yi yibalinba, ki yaa tiendi yaala ŋani yaaba n nani yipo.

²⁸ Yaa gaaliti mani yaaba n solini yi ki yaa jaandi yaaba n sugidi yi po.

²⁹ Nilo yaa pabi a kpianyendu po, ŋan pegidi ki teni o wune mo. Nilo yaa fie a liadicianli, ŋan da yie ke o kan ga a liaditediga mo.

³⁰ Pa yua n mia ŋa kuli. Nilo yaa fie ŋa ŋan die yaala, da goa ki buali o la.

³¹ Yin yaa tiendi bi niba po nani yin bua ban yaa tiendi yipo maama.

³² Yi yaa bua yaaba n bua yi, bi baa pagi yi yeni mo lede? Baa ti *tuonbiadi danba moko bua yaaba n bua ba.

³³ Yi yaa ŋanbidi yaaba n ŋanbidi yipo yaa po, bi baa pagi yi yeni mo lede? Ti tuonbiadi danba moko tiendi yene.

³⁴ Yi yaa ledi yin daani ke yaaba n baa goa ki pa yi yi ligi, bi baa pagi yi yeni mo lede? Ti tuonbiadi danba moko ledi bi tuonbiadi-danlieba bi ligi, ke ban goa ki pa ba.

³⁵ Ama yin yaa bua mani yi yibalinba, yaa ŋanbidi mani bi niba po, ki yaa ledi ba ki da daani ke yi baa goa ki ga bikani liba. Yeni yi panpaani baa yaba, yi baa tie U Tienu yua n ye hali Tanpojoma bila, kelima wani, o ŋanbidi bi ŋanwaadanba leni bi nibiadiba kuli po.

³⁶ Yin yaa tiendi mani mi ŋanma nani yi Baa moko n tiendi mi ŋanma maama yeni.

Ŋan da ja ti buudi

³⁷ Yin da ja mani ti buudi ke U Tienu n da ti jia leni yi mo ti buudi. Yin da bu ki cuo oba ke ban da bu ki cuo yi mo. Lani bi kan jia ki bili yi mo yaa cuonu. Yaa tiendi mani yi nisaalilieba po sugili bi tagili po, lani bi baa tieni yi mo yaa po sugili yi yaa tagili po.

³⁸ Yaa puuni mani, lani bi baa puuni yi mo ki bigidi yipo bonŋanla, ki ñiigi ki yegini ki kuodi hali lan cuudi. Bi baa taa yin bigidi nitoaba po leni yaa *bonbiigikaala, ki biigi yi mo yaa po.»

³⁹ Jesu den pua ba mi kpanjama moko ki yedi: «Naani o juamo baa fidi ki dadi o juamo bii? Bani niba lie yeni kuli kan baa ku buogu nni te?

⁴⁰ O ŋoadika ki cie o canbaa, ama yaa ŋoadika n bangi ki gbeni, o baa naani leni o canbaa.

⁴¹ Be yaa po ke a nua yaa muagu n ye a lielo nunbu nni, ki naa nua yaa dajengu n ye a yaabu nni?

⁴² Li ga lede ke a baa yedi a kpiilo: ‹N kpiilo, cedi min ñani yaa muagu n ye a nunbu nni,› fini yua n ki nua yaa dajengu n duogi a yaabu nni? Fini pala lie daano, ŋan kpa ñani yaa dajengu n ye a yaa nunbu nni, lane a baa fidi ki le bonŋanla ŋan baa ñani yaa muagu n ye a lielo yaabu nni maama.

Bu tibu leni bu bonluonkaala

⁴³ Tiŋanbu kan luoni yaa bonluonkaala n ki ŋani. Yaa tibu n ki ŋani mo kan luoni yaa bonluonkaala n ŋani.

⁴⁴ Bi bandi tibu kuli kelima bu bonluonkaala poe. Bi kan sobidi a kankana ku konkongu po, bi kan go sobidi i cabi u naakpanyuanu po.

⁴⁵ O niŋamo ñandi o pali bonŋanla nni yaala n ŋani, o nibiado mo ñandi o pali bonbiadila nni yaala n bia, kelima o nilo maadi yaala n gbie o pali nne.

A dielieda

⁴⁶ Be n teni ke yi yi nni: ‹O Diedo, o Diedo,› ki naa tiendi min yedi yaala?

⁴⁷ N baa waani yi yua n cua n kani ki gbadi n maama ki tiendi min yedi yaala kuli n naani leni yua.

⁴⁸ O tie nani yaa nilo n den bua ki maa li dieli. O den gbiidi hali ke li ñuagi ki pundi ku tangu, ki pu li tanpuuli ku yaa po ki maa o dieli. Li ñingocianli n den cua ki puubi ki tudi li dieli yeni, maa den fidi ki ŋmiagi li kelima li den maa ku tangu po.

⁴⁹ Ama yua n gbadi n maama ki naa tiendi man yedi yaala, o mo tie nani yaa nilo n maa li dieli ki naa kpa gbiidi ki pu li tanpuuli, ama ki pu ki tinfanga po. Li ñingocianli n puubi ki tudi li yaa yogunu liga, li den baa. Li dieli yeni mudima den bia.»