Luki 4 - Gourmanchéma Bible

¹ Jesu den ñani Judana kani ki gbie leni U Tienu Fuoma Yua. Wani U Tienu Fuoma den gedini o mi fanpienma po

² ke lankani, Sutaani den tulini o hali dana piinaa. Waa den dini liba laa dana nni. Laa dana n pendi mi koma den cuo o.

³ Lani, Sutaani den yedi o: «A yaa tie U Tienu Bijua, ŋan yedi li tanli na n tua jiema.»

⁴ Jesu den goa ki yedi o: «Li diani: O nisaalo kan yaa ye kelima mi jiema bebe yaa po.»

⁵ Sutaani den gedini o yaa kaanu n kpedi ki teni ke o laa ŋanduna diema kuli yenma,

⁶ ki yedi o: «N baa pa ŋa laa bali kuli leni laa diema leni mi kpiagidi, kelima bi puni nni likuli, n mo baa pa la min bua yua kuli.

⁷ Lanwani a yaa gbaani n nintuali, likuli baa tua a yaala.»

⁸ Jesu den goa ki yedi o: «Li diani nni: A baa jigini o Diedo a Tienu, Ki yaa kpiagidi wani bebe.»

⁹ Sutaani den gedini o Jelusalema, ki sieni o U Tienu diegu yuli po. O den yedi o: «A yaa tie U Tienu Bijua, ŋan yugi ki ci tiipo, kelima li diani:

¹⁰ O baa puogi o malekinba Ke ban guudi a.

¹¹ Bi baa tiebi a leni bi nii Ke a taali n da tuudi tanli.»

¹² Jesu den goa ki yedi o: «Li go yedi: Da biigi o Diedo a Tienu.»

¹³ Sutaani n den tulini o laa tulinma kuli ki gbeni, o den foagidi o kani ki ŋa o hali yogunuba.

Jesu cili o tuonli Galile diema nni

¹⁴ Jesu den guani *Galile leni mi Fuoma paaciamu. O yeli den ñani laa diema nni kuli.

¹⁵ O den bangi li *bali maama bangima diena nni ke bi niba kuli pagi o.

Nasaleti dogu yaaba yie Jesu

¹⁶ Jesu den gedi Nasaleti wan den fandi naani. *U Tienu fuodima daali o den kua li bali maama bangima dieli nni, nani wan den maani ki tiendi maama. O den fii ki baa cogi U Tienu maama,

¹⁷ ke bi teni o o sawalipualo *Esayi yaa tili, wan den gbabidi li, o den laa lan diani naankani yaa maama n tie na:

¹⁸ O Diedo Fuoma ye n niinni Kelima o gandi nni Ke min yaa wangi a luoda o Laabaaliŋamo. O soani nni ke min kpaani i yonbi *faabima. Ke min pa a juama mi nunnualima. O soani nni ke min yaa faabidi ban miabi yaaba,

¹⁹ Ki kpaani ke o Diedo *ŋanbili binli cua.

²⁰ Jesu n den cogi laa maama, o den goa ki gbabi li tili ki teni li o jiidika, ki goa ki kali. Yaaba n den ye li bali maama bangima dieli nni kuli den diidi o.

²¹ O den yedi ba: «Yin gbadi i Diani maama yaama ne tieni dinla.»

²² Bikuli den tiendi opo siedi ki pagi o leni wan maadi yaa maŋanma, ki nua o leni li pakili. Bi den tua: «Laa tie Josefi bijua kaa?»

²³ Jesu den yedi ba: «Laa pia kuli tama ke yi baa pua nni yaa kpanjama n tie na: ‹Fini lotoli, paagi a yuli,› ki go yedi: ‹Ti gbadi ŋan tieni yaala Kapenayuma po kuli, ŋan tieni la nekanba mo a dandogu nni.› »

²⁴ O den pugini ki yedi: «N waani yi moamoani, bi kan ga sawalipualoba kuli bonŋanla o dandogu nni.

²⁵ N go waani yi moamoani ke *Elia yogunu, tanpoli n den luoni ke ki taaga ki mi hali bina taa leni ŋmaali luoba ke mi koncianma den ye mi diema nni kuli, a kpepuona den ye Isalele diema nni boncianla.

²⁶ Ama baa yeni, U Tienu ki den soani Elia bi niinni oba kuli kani se Sidoni diema dogu Salepita yaa kpepuoli kani.

²⁷ A gbaada boncianla den ye Isalele diema nni o sawalipualo Elise yogunu. Baa yeni, bi niinni oba ki den paagi se Naama Sili diema yaa ja.»

²⁸ Yaaba n den ye li bali maama bangima dieli nni n den gbadi laa maama bi pala den beni boncianla.

²⁹ Bi den fii ki deli ki ñani o u dogu nni, ki gedini o bi dogu n ye yaa juali yuli po, ki baa lu o li yidima kani.

³⁰ Ama Jesu den tagini ki cuoni bi siiga nni ki ñani ki ban caa.

Jesu paagi ki cicibiadiga n ye yua yaa niinni

³¹ Jesu den gedi Galile dogu Kapenayuma. Mi fuodima daali o den bangi bi niba.

³² O bangima den paki ba kelima o den maadi leni li bali.

³³ Li den sua ke ki cicibiadiga n ye yaa ja yaa niinni ye li bali maama bangima dieli nni. O den tiani boncianla ki yedi:

³⁴ «Ŋain, fini Nasaleti yua Jesu, be n ye tinba leni fini siiga? A cua ki baa bolini ti. N bani ŋan tie yua. A tie U Tienu n *Nigagidiŋamo.»

³⁵ Jesu den funi leni ga ki yedi: «Suoni ki ña o ja yeni niinni.» Ki cicibiadiga den guli o ja yeni li nitaanli siiga ki ñani o niinni kaa tieni o bonbiadiliba kuli.

³⁶ Li den paki yaaba n ye likani kuli ke bi yieni biyaba: «Mi naa maama te? O maadi mu cicibiadimu leni li bali leni u paalu ke mu ña mun ye yaaba niinni.»

³⁷ O yeli den ñani laa gaani lindima tinbuona nni kuli.

Jesu paagi a yiama boncianla

³⁸ Jesu den fii ki ñani li bali maama bangima dieli nni ki gedi Simono denpo. Li den sua ke Simono cuadinaa dua likani ke o gbanandi beni boncianla. Bi den mia Jesu ke wan paagi o.

³⁹ O den gedi o kani ki yini opo, ki funi leni ti gbananbiendi leni li bali ke u kagidi opo. Lanyogunu o den fii ki ga bi cangu.

⁴⁰ Ku jofangu, yaaba n den pia a yiama kuli den cuani ba Jesu kani. Bi yianbuoli den kandi. Jesu den maani o nii yendo yendo kuli po ki paagi ba.

⁴¹ Mu cicibiadimu moko den ñani bi niba boncianla niinni ki tangi ki tua: «A tie U Tienu Bijua.» Ama Jesu den fu leni mu kaa tuodi ke mu maadi, kelima mu den bani ke o tie *U Tienu n Gandi Yua.

Jesu gedi kaantoe ki ban wangi o Laabaaliŋamo

⁴² Lan den fii ki fa Jesu den ñani ki gedi li fuali po. A nigola den lingi o. Ban den pundi o kani, bi den bua wan yaa ye leni ba ki da ña bi kani.

⁴³ Ama o den yedi ba: «Li tie tiladi min yaa wangi dotoe mo *U Tienu diema Laabaaliŋamo kelima o den soani nni lani yaa po.»

⁴⁴ O den wangi o Laabaaliŋamo li balimaama bangima diena nni ya n ye mi diema nni kuli.