Luki 24 - Gourmanchéma Bible

¹ A danleleeda cilima daali, ku tiŋapanpangu, bi puoba yeni den taa ban tuodi ki bogini yaa tibidi ke ti pia u nuulimanu yeni, ki goa ki gedi li kuli po.

² Bi den sua ke yaa tanpabigu n bii li kuli ñoabu bindi ki pigidi.

³ Bi den kua li kuli nni ki lingi, baa den laa o Diedo Jesu o kpiemo.

⁴ Ban kaa den bani ban baa maali yaala, jaba lie yaaba n laa yaa tiadi n ñuliti den doagidi ki sedi bikani.

⁵ Ti jawaanciandi den cuo ba ke bi tibini bi nunmu ki nua tiipo. Bi jaba yeni den yedi ba: «Be yaa po ke yi lingi yua n fo yaaba n kpe siiga?

⁶ Waa go ye ne, o fii bi tinkpiba siiga. Tiadi mani ke wan den ye *Galile po

⁷ o den yedi yi: ‹Li tie tiladi ban cuo o *Ja Bijua ki teni ti *tuonbiadi danba nuu nni, ban joani o li *dapoanpoanli po, ke li dataali daali o baa fii bi tinkpiba siiga.› »

⁸ Lani bi puoba yeni den tiadi Jesu maama.

⁹ Bi den ñani li kuli kani, ki kuni ki ban togidi laa bonla bi piiga n niyendiba leni yaaba n sieni kuli.

¹⁰ Yaa puoba n den togidi Jesu tondiba laa bonla den tie Magidala dogu yua Maliyama, leni Jana, leni Jaka naa Maliyama, leni potoaba yaaba n den ye leni ba.

¹¹ Jesu tondiba den tama ke ban togidi yaala tie mafanma. Baa den dugi bi maama po ke mi tie moamoani.

¹² Ama Pieli den fii ki sani ki gedi li kuli po. O den buani ki noanli lienni, ki laa ban den finfini o kpiemo yaa cabipiena bebe bili. O den lebidi ki kuni, ke yaala n tieni paki o boncianla.

Yaala n tieni Emayusa sanu nni

¹³ Laa daali bi ŋoadikaaba siiga niba lie den caa Emayusa dogu ke li foagi leni Jelusalema nani piiga n kilo dajenbiyenga,

¹⁴ ki cuoni ki maadi leni biyaba yaala n den tientieni kuli.

¹⁵ Ban den maadi ki nia leni biyaba yaa yogunu, Jesu wani oba den nagini ki yegi leni ba.

¹⁶ Bi den laa o, ama li den duagi bipo ke baa bandi o.

¹⁷ O den yedi ba: «Yi cuoni ki boe be ke yi pala biidi nanda?»

¹⁸ Bi siiga yendo ke bi yi o Kileyopasa den goa ki yedi o: «Yaaba n ye Jelusalema siiga kuli fini bebe n ki bani yaa bonla n tieni u niinni a dana ne?»

¹⁹ O den buali ba: «Be n yeni?» Bi den goa ki yedi o: «Yaa bonla n tieni Nasaleti yua Jesu, yua n den tie U Tienu leni bi niba kuli yaa nintuali yaa sawalipualo pia u paaciamu a tuona po leni mi maama po kuli,

²⁰ bi kopadicianba yudanba leni ti yudanba den cuo o ki teni bi jia o buudi ki bili ke ban kpa o, ki den joani o li dapoanpoanli po.

²¹ Tinba, ti den sugini ke wani n tie yua n bi baa faabi Isalele buolu yaaba. Ama dinla n tie dana taa leni laa bonla n tieni.

²² Ti siiga puoba mo bi potianba maadi ke li paki ti. Bi bi yagidi ki gedi li kuli po dinla ku tiŋaapanpangu,

²³ kaa ban laa o kpiemo. Bi guani ki yedi ti ke bi laa malekinba yaaba n doagidi bi yula bikani ki waani ba ke Jesu fo.

²⁴ Ti lieba bi tianba gedi li kuli po ki ban sua ke li bonla kuli tie nani bi puoba n yedi maama, die baa laa wan wani.»

²⁵ Lani Jesu den yedi ba: «Yinba bi yanpiidanba na, yaaba n ki jaligi ki baa daani bi sawalipuaba n den yedi yaala kuli po.

²⁶ Nani laa den tie tiladi ke *U Tienu n Gandi Yua n le fala yeni ki kua o kpiagidi kaanu bi?»

²⁷ Lani Jesu den cili leni Musa yaa maama ki pundi bi sawalipuaba yaa maama ki bundi bipo i Diani nni kuli yaala n den maadi o yaa po.

²⁸ Ban den nagini ban caa yaa dogu, Jesu den tieni nani o bua ki pendi ki suagi liiga.

²⁹ Ama bi den yie opo ki yedi: «Sedi leni ti kelima ku jofangu pundi, u yienu di bua ki kua.» Lani o den kua ki sedi leni ba.

³⁰ Wan den ka u saajekaanu kani leni ba, o den taa dupen ki tuondi U Tienu ki cabidi ki teni ba.

³¹ Lani bi nuni den ŋubidi ke bi bandi o, ama o den yindi bi siiga ke baa go laa o.

³² Bi den yedi biyaba: «Wan bi maadi leni ti u sanu nni ki bundi tipo i Diani n yedi yaala yeni, laa bi tie nani mi fantama n co ti pala nni yeni ka?»

³³ Lanyogunu liga bi den fii ki guani Jelusalema, ki laa ke bi piiga n niyendiba leni bi ŋoadikalieba taani ki ka,

³⁴ ki yedi: «O Diedo fii bi tinkpiba siiga moamoani lige. O doagidi o yuli Simono po mo.»

³⁵ Bani bi niliediba yeni mo den togidi yaala n tieni u sanu po, leni ban bandi Jesu maama wan cabidi dupen yaa yogunu.

Jesu doagidi o yuli o ŋoadikaaba po

³⁶ Ban den maadi laa bonla yaa yogunu, Jesu wani oba den doagidi ki sedi bi siiga ki yedi ba: «Mi yanduanma n yaa ye leni yi.»

³⁷ Li pakili leni ti jawaanciandi den cuo ba kelima bi den tama ke bi laa jiingoe.

³⁸ Jesu den yedi ba: «Be n teni ke yi yama yagi yeni, be yaa po ke yi pia laa yanmaalibuolu yi pala nni?

³⁹ Diidi mani n nii leni n taana, mini lige. Sii mani n nii ki le, jiingu naa pia gbanandi leni kpaba nani yin nua ke n pia maama.»

⁴⁰ Wan den maadi yeni, o den waani ba o nii leni o taana.

⁴¹ Nani li pamancianli po n den teni ke bi daa den daani o maama ki go ye leni li pakili, o den buali ba: «Yi pia li bonjekaala nekanba bi?»

⁴² Bi den teni o li janjenŋoabidili.

⁴³ O den ga ki ŋmani bi nintuali.

⁴⁴ Lani o den yedi ba: «Line n tie min da den ye leni yi ki wangi yi yaala, ke li tie tiladi ke yaala n diani ki bili npo Musa *bali maama nni leni bi sawalipuaba tila nni leni Pisominba tila nni kuli n tieni ki dudi.»

⁴⁵ Lanwani o den libidi bi yantiali ke ban fidi ki gbadi I Diani n yedi yaala.

⁴⁶ Lani o den yedi ba: «Li diani ki yedi ke U Tienu n Gandi Yua baa le fala yeni, ki yuandi ki fii bi tinkpiba siiga li dataali daali,

⁴⁷ ke bi baa cili Jelusalema na ki yadi ki gedi i nibuoli kuli po ki ban yaa wangi ke bi niba n lebidi bi yama ki baa sugili bi tuonbiadi po.

⁴⁸ Yinba n tie laa bonla yaa siedinba.

⁴⁹ Mini nba baa soani yipo n Baa n niani yaala. Ama yin yaa ye mani u naa dogu nni hali tanpoli paaciamu n baa jiidi yipo.»

Jesu doni tanpoli po

⁵⁰ Lani yaa puoli Jesu den ñani ba u dogu nni ki gedini ba hali ki ban kuli Betani, ki yugidi o nii ki gaali ba.

⁵¹ Wan den gaaliti ba yaa yogunu, o den paadi leni ba ki doni tanpoli po.

⁵² Bani yaa po, ban den kpiagi o, bi den lebidi ki guani Jelusalema leni li pamancianli.

⁵³ Bi den ye U Tienu diegu nni daali kuli, ki pagi U Tienu.