Luki 23 - Gourmanchéma Bible

¹ Lani bi *cancannikpeliba taanli kuli den fii ki gedini Jesu gufeneeli Pilata po.

² Bi den cili ki kuli o ki yedi: «Ti den laa one ke o yaandi ti niba, ki tua ke ban da pa o badiciamo *Sesa li lubili, ki go tua ke wani oba n tie *U Tienu n Gandi Yua, o bado.»

³ Pilata den buali Jesu: «A tie Jufinba bado bi?» Jesu den goa ki yedi o: «Fini n yedi yeni.»

⁴ Pilata den yedi bi kopadicianba yudanba leni ku niligu: «Mii laa ke o ja na tieni tagiliba kuli.»

⁵ Bi den nia ki yedi: «O den cili hali *Galile po ki tagi Jude nni kuli ki pundi hali ne, ki bangi bi niba ki tigini ba ke ban yie li bali.»

Pilata soani Jesu Elodo po

⁶ Pilata n den gbadi ke bi maadi Galile maama, o den buali o ja yeni yaa tie Galile yua.

⁷ Wan den gbadi ke o tie *Elodo yaa diema yua, o den soani o Elodo po. Li sua ke Elodo ye Jelusalema laa dana.

⁸ Wan den laa Jesu, o pali den mangi boncianla kelima hali yogu o den bua ki le o, kelima o den gba ke bi maadi o maama ke o sugini wan tieni mi bancianma wan le.

⁹ O den buali Jesu i buali boncianla, ama waa den guani o maamaba kuli.

¹⁰ Bi kopadicianba yudanba leni li *bali maama bangikaaba den ye likani ki kuliti Jesu boncianla kaa cedi.

¹¹ Elodo den taani leni o minteela ki fali o, ki ñuadi o ki lani o ti tiakpiagidi, ki guani o Pilata po.

¹² Hali yogu ti yibalindi den ye Elodo leni Pilata siiga, laa daali liga bi den danli leni biyaba.

Pilata jia ki kadi ke ban kpa Jesu

¹³ Pilata den taani bi kopadicianba yudanba leni Jufinba yudanba leni ku niligu kuli

¹⁴ ki yedi ba: «Yi den cuani n kani o ja na ki yedi ke o yaandi bi niba ki tua ke ban yie li bali. To, n buali o yi nintuali ki sua waa tieni liba yin kuli o yaala kuli siiga.

¹⁵ Elodo moko naa sua ke o pia tagiliba, lane ke o guani o ti kani. O ja na ki tieni liba kuli yaala n pundi tin kpa o.

¹⁶ Lani yaa po n yaa teni ke bi pua o, n baa ŋa o.» [

¹⁷ Li den sua ke mi *Pendima jaanma kuli li tie tiladi Pilata n faabi kpaadiyenli ku niligu po.]

¹⁸ Ku niligu kuli den taani ki tiani: «Teni ban kpa o ja na, ki faabi tipo Balabasa.»

¹⁹ Bi den kuani Balabasa li kpaadidieli nni kelima o den fiini mi janjanma u dogu nni ki go ku o nilo moko.

²⁰ Pilata den bua ki faabi Jesu. Lani yaa po o go den maadi leni ku niligu.

²¹ Ama bi den tangi ki tua: «Joani o li *dapoanpoanli po, joani o li dapoanpoanli po.»

²² Pilata go den maadi ba mi tataama ki yedi: «O tieni be ke li bia? Mii laa ke o tieni yaa bonbiadila n pundi mi kuuma. Lanwani n baa teni ban pua o, ki ŋa o.»

²³ Bi go den ñi ki tangi ki tua ke ban joani o li dapoanpoanli po, hali ke bi tantani den paadi Pilata.

²⁴ Lani yaa po Pilata den jia ti buudi ki kadi ke ban mia ban tieni Jesu yaala yeni baa tieni.

²⁵ O den ŋa ban den kuani yaa ja li kpaadidieli nni kelima mi janjanma leni mi nikpama kuli yaa po yeni nani ku niligu n mia maama, ki taa Jesu ki teni ba ke ban tieni o ban bua yaala.

Bi joani li dapoanpoanli po

²⁶ Ban den ñani Jesu likani ki caani o ki baan kpa o, bi den tuogi Silena dogu yua ke bi yi o Simono ke o ñani i kuani po. Bi den cuo o ki bugini o li dapoanpoanli wan yaa bugi ki ŋua Jesu.

²⁷ Li nigocianli den ŋua o, bi siiga bi puoba den ye, ki pua bi bena ki mua Jesu po.

²⁸ O den jigidi ki yedi ba: «Yinba, Jelusalema puoba, da mua mani mini yaa po, yaa mua mani yi yaa yula po leni yi bila po.

²⁹ Kelima a dana baa ti cua ke bi baa yedi: ‹Li pamanli ye leni mu poŋoalimu, yaaba n ki mali leni yaaba n ki ŋaani biga kuli po.›

³⁰ Laa yogunu bi niba baa maadi leni a joaciama ki tua: ‹Baa mani tipo,› ki go yaa miadi a joabila ki tua: ‹Ŋoagini mani ti.›

³¹ Kelima bi yaa tieni ku dasoangigu yeni, bi baa tieni ku dakuongu mo lede?»

³² Bi go den gedini nikpaba lie ki baa taani ki kpa ba leni Jesu.

³³ Ban den pundi ban yi yaa kaanu ku Yukuokuogu, bi den joani Jesu li dapoanpoanli po, ki go joani bi nibiadiliediba yeni moko a dapoanpoana po, yendo Jesu jienu po, o yua mo o ganu po.

³⁴ Jesu den yedi: «N Baa, tieni bipo sugili kelima baa bani ban tiendi yaala.» Bi den toani tiatia ki boagidi o tiayiekaadi.

³⁵ Ku niligu den se likani ki diidi. Jufinba yudanba den ñuadi Jesu ki tua: «O den ga nitoaba, o yaa tie Kilisiti U Tienu n Gandi Yua, wan ga o yuli.»

³⁶ A minteela moko den ñuadi o ki cua o kani ki teni o mi ñinmiligima ki yedi:

³⁷ «A yaa tie Jufinba bado, ŋan ga a yuli.»

³⁸ Yaa diani n tie na den taabi ki yiini o yuli po: One n tie Jufinba bado.

³⁹ Bi nibiadiliediba yaaba n den juani a dapoanpoana po yeni siiga yendo den sugidi Jesu ki yedi: «Ŋaa tie U Tienu n Gandi Yua kaa? Ga a yuli ki nan ga ti mo.»

⁴⁰ Ama o lielo den funi leni o ki yedi: «Ŋaa jie U Tienu, fini yua n taa cuonu leni o ja na?

⁴¹ Tinba yaa po, yaa cuonu n tie na tiegi, kelima ti ga ti tuona panpaani, ama one naa tieni bonbiadiliba kuli.»

⁴² Lani o den yedi: «Jesu ŋan tiadi npo a yaa ti cua ki diedi diema yaa yogunu.»

⁴³ Jesu den goa ki yedi o: «N waani a moamoani, dinla liga a baa ye leni nni *ŋalijani.»

Jesu kuuma

⁴⁴ Lan den bua ki pundi u yensiicocolu u yienu den biigi, ke li *biigili tieni ki tinga nni kuli ki yaa caa hali li yenlebidili.

⁴⁵ U Tienu diegu *kpalidoaginkaabu den padi siiga nni ki boagidi boaga lie.

⁴⁶ Jesu den kpaani ki yedi: «N Baa, n teni miali a nuu nni.» Wan den yedi yeni, o den fuo ki jiidi.

⁴⁷ Minteela kobiga yudaano n den laa yaala n tieni, o den pagi U Tienu ki yedi: «Moamoani, o ja na den tiegi lige.»

⁴⁸ Yaa nigola n den taani likani ki diidi, n den laa yaala n tieni, bi den lebidi ki kuni ki pua bi bena.

⁴⁹ Yaaba n den bani Jesu kuli leni yaa puoba n den ciani o hali Galile, den se foagima ki nua yaala n tiendi.

Jesu piinma

^50-51 Jufinba cancannikpeliba taancianli yaaba siiga yendo den ye ke bi yi o Josefi, yaa nilo n ŋani ki tiegi, ki tie Jufinba dogu Alimate yua. O den gu ke *U Tienu diema n pundi. Waa den taani leni o lieba bi jagili nni, leni ban den tieni yaala kuli nni.

⁵² Laa ja den gedi Pilata kani ki mia o ke wan teni o Jesu o kpiemo.

⁵³ O den jiini o li dapoanpoanli po, ki bobini o bu kpalipienbu, ki duani o li kuli nni. Li den sua ke bi kpiedi li kuli yeni ku tangu po ki daa duani kpiemo kuli lienni.

⁵⁴ Laa daali den tie li boginli daali *U Tienu fuodima daali po, ke U Tienu fuodima daali cilima yogunu bua ki pundi.

⁵⁵ Bi puoba, yaaba n den ñani Galile ki ciani Jesu yeni, den ŋoadi Josefi ki laa likuli leni wan duani Jesu o kpiemo maama.

⁵⁶ Lani bi den goani bi denpo ki bogini yaa tibidi n pia u nuulimanu, leni tulale. Mi fuodima daali bi den fuodi, nani li *bali maama n bili maama.