Luki 22 - Gourmanchéma Bible

¹ Yaa dupen n ki pia *dabinli jaanma, yaama n yi mi *Pendima jaanma, den nagidi.

² Bi kopadicianba yudanba leni li *bali maama bangikaaba den lingi ban baa tieni maama ki kpa Jesu, kelima bi den jie ku niligu.

Judasa tuo ke o baa janbi Jesu

³ Sutaani den kua Judasa pali nni, wani ban go yi yua Isikalioto, yua n den tie bi piiga n niliediba siiga yendo.

⁴ O den gedi ki ban juogi leni bi kopadicianba yudanba leni U Tienu diegu jiidikaaba yudanba wan baa tieni maama ki janbi Jesu, ki teni ba ban cuo o.

⁵ Bi pala den mani boncianla, bi den niani o ke bi baa teni o i ligi.

⁶ O den tuo, ki di yaa lingi wan baa baa yaa folu ki janbi Jesu ki teni ba ke ku niligu ki bani.

Jesu teni ke bi ŋanbi mi Pendima jaanjiema

⁷ Yaa dupen n ki pia dabinli jaanma dana siiga, lan den bili ban kodi mi Pendima jaanma pebiga yaa daali den pundi.

⁸ Jesu den soani Pieli leni Jan ki yedi ba: «Gedi mani ki ban ŋanbi tipo mi Pendima jaanjiema tin je.»

⁹ Bi den buali o: «A bua tin ŋanbi ma le?»

¹⁰ O den goa ki yedi ba: «Diidi mani, yi yaa kua u dogu nni yaa yogunu, yi baa tuogi o ja ke o bugi li ñincuali. Yin ŋoadi o mani ki ban kua wan baa kua yaa diegu nni,

¹¹ ki yedi likani diedaano: ‹Canbaa yedi a daa: Mini leni n ŋoadikaaba n baa je mi Pendima jaanjiema yaa candieli nni ye le?›

¹² O baa waani yi li dietuadili, yaali n yaba ke yaala n dagidi kuli ye lienni. Yin ŋanbi mani lankani.»

¹³ Bi den gedi ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.

O Diedo jiema

¹⁴ U yogunu n den pundi Jesu den kali u saajekaanu kani, wani leni bi tondiba.

¹⁵ O den yedi ba: «N den bua hali boncianla ki taani leni yi ki je yaa Pendima jaanjiema n tie na hali ki daa laa fala.

¹⁶ Kelima n kadi ki waani yi ke n kan go je ma hali man baa tieni ki dudi *U Tienu diema nni.»

¹⁷ Lani o den taa ki tadiñokaaga ki tuondi U Tienu ki yedi: «Yikuli n ga mani li bonñokaala na ki boagidi.

¹⁸ N yedi yi, moala liiga n kan go ño duven, hali U Tienu diema n baa cua yaa yogunu.»

¹⁹ O go den taa dupen ki tuondi U Tienu, ki cabidi ki teni ba ki yedi: «Line tie n gbanandi min puni yaadi yipo. Yaa tiendi mani yeni ki yaa tiani npo.»

²⁰ Ban den dini ki gbeni, o go den taa ki tadiñokaaga ki teni ba ki yedi: «Yaa bonñokaala n tie na tie n soama yaama n wuli yipo ki teni ke U Tienu *ŋantaadipaano n kua.

²¹ Ama diidi mani, yua n baa janbi nni yaa nuu taani ki ye leni nni u saajekaanu na.

²² O *Ja Bijua caa nani lan diani ki bili opo maama. Ama fala baa ye leni yaa nilo n baa janbi o.»

²³ Bi den cili ki buali biyaba, bi siiga yua n baa tieni laa bonla.

Bi ŋoadikaaba siiga yua n cie

²⁴ Mi niama moko den fii bi siiga ke bi bua ki bandi bi siiga yua n cie bikuli.

²⁵ Jesu den yedi ba: «I nilanbuoli badiba die ba leni u paalu, yaaba n mabindi ba mo teni ke bi yi baa bi nitodikaaba.

²⁶ Lan da tie yeni yi yaa kani. Ama, yi siiga yua n cie yikuli n tua nani ki bonwaaga yeni, yua n tugi li yuli mo n tua nani o naacemo yeni.

²⁷ Ŋme n cie o yua, yua n ka u saajekaanu kani ki baa je bi, bi yua n tendi mi jieme? Yua n ka ki baa je kaa? Ama mini wani n ye yi siiga nani yua n tendi mi jiema yeni.

²⁸ Yinba, yi tie yaaba n den juuni ki ye leni nni n biigima kuli nni ki pundi hali moala.

²⁹ Lani yaa po nani n Baa n bili ke n baa je li bali maama, n moko bili ke li baa tua yipo yeni

³⁰ ke yi baa ti yaa di ki go ñu n saajekaanu kani n diema nni, ki ka i bali kalikaani po, ki jia Isalele piiga n buoliedi buudi.»

Pieli baa ti nia Jesu

³¹ Jesu go den yedi: «Simono, Simono, diidi, Sutaani den mia ke wan baa u sanu ki yagi yikuli nani ban yagini *ŋalikama maama yeni.

³² Die n mia U Tienu apo ke a *dandanli n da gbali. A yaa ti lebidi ki guani n kani, ŋan yaa paagidi a kpiiba pala.»

³³ Pieli den goa ki yedi o: «N Daano, n bogini ki baa ye leni a baa li kpaadidieli po leni mi kuuma po kuli.»

³⁴ Jesu den yedi o: «Pieli, n waani a, dinla ñiagu hali ke ku kootongu daa mua, a baa nia taalima taa ke ŋaa bani nni.»

³⁵ Lani Jesu den buali bikuli: «Min den soani yi ke yii kubi ligiboagili, kaa kubi sancenboagili leni cacaadi yeni, yi den luo liba bi?» Bi den goa ki yedi o: «Liba kuli.»

³⁶ O den yedi ba: «Ama moala liiga, yua n pia ligiboagili, wan taa li, yua n pia sancenboagili, wan mo n taa li, yua n kaa pia jugisiega, wan kuadi o kpalibu ki da.

³⁷ Kelima n yedi yaala n diani npo kuli baa tieni ki dudi: ‹Bi den coadi ki taani o leni bi nikpaba.› Li baa tieni ki dudi moala.»

³⁸ Bi den yedi o: «Ti Daano, diidi ki le, jugisiemu lie ye ne.» O den yedi ba: «Li dagidi.»

Jesu gedi ki ban jaandi Olifie Tiidi juali po

³⁹ Jesu den ñani ki gedi *Olifie Tiidi juali po nani wan yen maani ki caa maama. O ŋoadikaaba den yegi leni o.

⁴⁰ Wan den pundi likani, o den yedi ba: «Yaa jaandi mani ke yin da ti kua mi tulinma nni.»

⁴¹ Lani, o den piadi bikani nani o nilo n baa lugidi li tanli lin baa yaa bianu, ki gbaani ki jaandi ki tua:

⁴² «N Baa, a yaa tuo, ŋan ñani n kani yaa tadiñokaaga n tie na min da ño, die lan da tua mini ka n bua yaala, kali fine n bua yaala.» [

⁴³ Laa yogunu maleki den ñani tanpoli ki doagidi opo o yuli ki paagi o.

⁴⁴ Li paboancianli den kubi o ke o jaandi ki pugidi. O tontonjena den tua nani mi soama yeni ki condi tiipo.]

⁴⁵ Wan den jaandi ki gbeni, o den guani o ŋoadikaaba kani ki sua ke bi goagoa kelima bi paboanli po.

⁴⁶ O den yedi ba: «Be n teni ke yi goa? Fii mani ki yaa jaandi ke yin da kua mi tulinma nni.»

Bi cuo Jesu

⁴⁷ Jesu n da den maadi, ku niligu den cua, ke ban yi yua Judasa, bi piiga n niliediba siiga yendo, ye bi liiga. O den nagini Jesu ki baa gobini o.

⁴⁸ Jesu den yedi o: «Judasa, a baa gobini o Ja Bijua yene ki janbi o?»

⁴⁹ Yaaba n den ye leni Jesu n den laa yaala n baa tieni, bi den buali o ki yedi: «Ti Daano, tin pedi ba mu jugisiemu bi?»

⁵⁰ Bi siiga yendo den pedi ki joandi bi kopadicianba bado naacemo jientubili.

⁵¹ Jesu den yedi: «Cedi mani yeni.» O den sii o ja yeni tubili ki paagi li.

⁵² Lani Jesu den yedi bi kopadicianba yudanba leni U Tienu diegu jiidikaaba yudanba leni bi *nikpeliba, bani yaaba n den taani ki cua ki baa cuo o: «Yi cua ki kukubi mu jugisiemu leni i gbiami nani yi lingi o sanjialo yeni?

⁵³ Min den ye leni yi daali kuli U Tienu diegu nni, yii den cuo nni, ama moala yi di pia u folu, ke li *biigili paaciamu mo n die.»

Pieli nia ke waa bani Jesu

⁵⁴ Bi den cuo Jesu ki gedini bi kopadicianba bado diegu nni. Pieli den ŋua foagima.

⁵⁵ Ban den cuoni mi fantama u luolu siiga, ki taani ki ka ki yie, Pieli den kali leni ba.

⁵⁶ Yaa jafanba n tuuni ku diegu yeni niinni siiga yendo den laa o ke o ka mi fantama kani, ki noanli o ki yedi: «O ja na moko den ye leni o.»

⁵⁷ Pieli den nia ki yedi o: «A-a, pua ne, mii bani o.»

⁵⁸ Lan yen waamu, nitoa den laa o ki yedi: «A moko tie bi niba yeni siiga yua yo.» Pieli den goa ki yedi: «A-a, mii tie.»

⁵⁹ Lan den waagi waamu, nitoa moko den ñi ki yedi: «Moamoani lige, o ja na moko den ye leni o, kelima o tie *Galile yua yo.»

⁶⁰ Pieli den goa ki yedi o: «A-a, mii bani ŋan maadi yaala.» Lanyogunu hali ke o da maadi, ku kootongu den mua.

⁶¹ O Diedo den jigidi ki diidi Pieli. Pieli di den tiadi wani o Diedo n yedi o yaa maama na: «Ku naa ñiagu, hali ke ku kootongu daa mua, a baa nia taalima taa ke ŋaa bani nni.»

⁶² O den ñani ki ban mua leni li paboanli.

Bi sugi ki go pua Jesu

⁶³ Yaaba n den kubi Jesu den ñuadi o ki pua o

⁶⁴ ki fini o nunga li cabili ki tua: «Ŋme pua ŋa? Bandi o.»

⁶⁵ Bi go den sugidi o sugitoadi boncianla.

Jesu sedi bi cancannikpeliba nintuali

⁶⁶ Lan den yendi, Jufinba *cancannikpeliba taancianli, lani n tie bi kopadicianba yudanba leni li bali maama bangikaaba leni bi nikpeliba, den taani ki gedini Jesu bi taanli kani ki yedi o:

⁶⁷ «A yaa tie *U Tienu n Gandi Yua, ŋan waani ti.» Jesu den goa ki yedi ba: «N yaa waani yi la, yi kan dugi n maama po.

⁶⁸ N yaa buali yi liba mo, yi kan guani pu.

⁶⁹ Die moala liiga, o Ja Bijua baa yaaka U Paaciamu Kuli Daano U Tienu jienu po.»

⁷⁰ Bikuli den yedi o: «Lanwani, a tie U Tienu Bijua yo?» O den goa ki yedi ba: «Yinba yiba n yedi, n tie wane.»

⁷¹ Lani yaa po bi den yedi biyaba: «Siedinba ki go tie tiladi. Tinba tiba ti gbadi la o ñoabu nni.»