Luki 21 - Gourmanchéma Bible

¹ Jesu den diidi ki laa ke a piada kpiendi bi paabu U Tienu diegu ligitiagu nni.

² O go den laa ke o kpepoluodo mo kpieni falino lie lienni.

³ O den yedi: «N waani yi i moamoani, o kpepoluodo na puni ki cie yaaba n sieni kuli.

⁴ Kelima bikuli ñani bi ŋalimani nni bi ligijodi ki kpieni, ama wani, leni o luoma kuli o ñani wan pia yaala kuli ki baa je, ki kpieni.»

Jesu pua sawali ke bi baa bolini U Tienu diegu

⁵ Bi nitianba den maadi U Tienu diegu maama, ban den maa leni yaa tanŋama, leni bi niba n den puni U Tienu yaa paabu ki bogidi gu. Jesu den yedi:

⁶ «A dana baa ti cua ke yin nua yaala na, bi kan ti ŋa baa tanyenli kan sieni ki yaa maa li lieli po, ke a kuli naa padi ki baa.»

Yaa fala n baa ti cua mi juodima yogunu

⁷ Bi den buali o: «Canbaa, u laa yogune ke li baa cua? Be n baa tua li sinankeeno ke li yogunu bua ki pundi?»

⁸ Jesu den goa ki yedi: «Fangi mani yi yula ke ban da boandi yi, kelima bi niba boncianla baa ti cua n yeli nni ki yedi: ‹Mini n tie *U Tienu n Gandi Yua›, ki go yedi: ‹U yogunu nagini.› Yin da ŋoadi ba mani.

⁹ Yi yaa ti gbadi ke bi maadi ke bu toabu maama, ki go gbadi ke bi maadi mi janjanma maama, yin da tuo lan jieni yi, kelima laa bonla baa kpa cua tiladi, ama lanyogunu da ka baa tua mi juodima.»

¹⁰ O go den yedi ba: «U nibuolu baa fii ki tuogi leni nibuoto, mi diema mo baa fii ki tuogi leni dietoama.

¹¹ Mi tindigibicianma baa tiendi, mi koncianma leni i yianbiadipuodike moko baa tiendi i kaantiami, li bonlidikacianla yaala n pia i jeje leni yaa sinankeeni n yaba baa ña tanpoli ki tiendi.

¹² Ama hali ke lankuli daa tieni, bi baa cuo yi ki waani yi fala, ki teni yi li *bali maama bangima diena yudanba nu nni, ki kuani yi a kpaadidiena nni, ki gedini yi bi badicianba bujiali kani leni gufeneelinba bujiali kani kelima n yeli po.

¹³ Likuli baa pa yi u sanu yin tieni npo siedi.

¹⁴ Ama yin yaa bani yi yama nni ke laa tie yin tuodi ki kpaagi yin baa ti maadi yaala ki ga yi yula.

¹⁵ Kelima mini nba baa ti pa yin baa maadi leni yaa yanfuoma ke yi koanginkaaba siiga baa yendo kan fidi ki nia ki yie ma.

¹⁶ Baa yi danba leni yi kpeliba leni yi waamu leni yi kpiiba leni yi danlinba baa janbidi yi ki tendi yi yi yibalinba nuu nni, bi baa kpa yi siiga bi tianba.

¹⁷ Bi niba kuli baa nandi yi kelima n yeli po,

¹⁸ die yi yudi baa yuyengu kan baa tiipo.

¹⁹ Kelima yi juunli po yi baa ga yi miana.

Jesu waani Jelusalema bolinma

²⁰ Yi yaa ti laa ke bi toatieba lindi ki cebini Jelusalema, yin bandi mani laa yogunu ke u bodima nagidi.

²¹ Laa yogunu yaaba n baa ye Jude nni n sani ki gedi a juana po, yaaba n baa ye Jelusalema tugu nni n ña lienni ki foagidi, yaaba n ye i kuani po n da kua u dogu nni.

²² Kelima laa dana baa tie li pantuuli yaa dana, ke yaala n den diani kuli n tieni ki dudi.

²³ Fala baa ye leni yaa puoba n punbi leni yaaba n da ŋaandi laa dana nni, kelima o falaciamo baa tieni mi diema na niinni, U Tienu pabienli cuonu baa jiidi u naa nibuolu po.

²⁴ Bi yibalinba baa kpa ba leni mu jugisiemu, ki gedini yaaba n sieni ti yonbidi i nibuoli kuli nni. I nilanbuoli yaaba baa paadi Jelusalema, ki ŋmaa u hali U Tienu n bili bipo yaa yogunu n dudi.

U Tienu bebe n bani o Ja Bijua cuama yogunu

²⁵ Sinankeeninba baa tieni u yienu nni leni o ŋmaalo nni leni a ŋmabila nni kuli. Tinga nni mo ti yanyagiciandi baa teni i nibuoli kuli n jie ki womi, kaa bani ban baa tieni yaala kelima mi ñincianma fuciangu po leni mi ñinguona fiipuama po.

²⁶ Tanpoli paaciami mo baa digibi, lani yaa po bi niba yaa kpaagi yaala n baa tieni ŋanduna nni, bi baa pabi ti jawaandi po.

²⁷ Lani, bi baa le ke o *Ja Bijua ye ku tawaligu nni ki kpendi leni u paaciamu leni ti kpiagiciandi.

²⁸ Laa bonla yaa cili ki tiendi, yin sedi mani ki yaadi yi yula kelima yi *faabima nagidi.»

Bu kankanbu kpanjama

²⁹ Lani Jesu den pua ba mi kpanjama ki yedi: «Diidi mani bu kankanbu leni yaa tiidi n sieni kuli.

³⁰ I beni yaa bundi yaa yogunu, yi bani ke ku siagu nagini no.

³¹ Li go tie yene, yi yaa laa ke laa bonla tiendi, yin bandi ke *U Tienu diema nagini.

³² N waani yi i moamoani ke mi naa nifiima kuli kan pendi ke lankuli ki tieni.

³³ Tanpoli leni ki tinga kuli baa pendi, ama n maama kan pendi hali abada.

Guudi mani o Ja Bijua cuama

³⁴ Fangi mani yi yula, ki da tuo mi jekandikaama leni li dañokandikaali leni mi yema yanyagidi n fie yi yantiana ki guli yi ke laa daali n da cua ki ludi yi.

³⁵ Kelima laa daali baa cua nani ku diagu yeni ki ludi ki cuo yaa niba n ye ŋanduna nni kuli.

³⁶ Lani yaa po yin yaa ji mani ki yaa jaandi U Tienu yaa yogunu kuli, ke yin fidi ki ña yaa bonla n baa cua kuli nni, ki sedi o Ja Bijua kani.»

³⁷ Daali kuli Jesu den bangi bi niba U Tienu diegu nni, ku ñiagu mo kuli o den ña ki caa ki ban dua ki ye *Olifie Tiidi juali po.

³⁸ Bi niba kuli den yagidi ki kpendi o kani U Tienu diegu nni ki baa cengi o maama.