Luki 20 - Gourmanchéma Bible

¹ Dayenli ke Jesu ka ki bangi bi niba U Tienu diegu nni ki wangi ba o Laabaaliŋamo, bi kopadicianba yudanba leni li *balimaama bangikaaba leni bi nikpeliba den cua o kani

² ki yedi o: «Waani ti yaa bali yaa po ke a tiendi li naa bonla. Ŋme n puni a li bali?»

³ Jesu den goa ki yedi ba: «N moko baa buali yi bonyenla, yin waani nni.

⁴ Jan n den *batisi bi niba yeni, o den baa li bali tanpoli po bi, bi bi nisaaliba kane?»

⁵ Bi den bungi bi pala nni ki tua: «Ti yaa yedi ke o den baa li tanpoli po, o baa yedi: ‹Be yaa po ke yii den daani o maama?›

⁶ Ti yaa yedi: ‹Bi nisaaliba yaa kane› mo, bi niba kuli baa lugidi ti a tana kelima bi nua ke Jan den tie sawalipualo.»

⁷ Lani yaa po bi den goa ki yedi Jesu ke baa bani Jan bali n ñani naani.

⁸ Jesu den yedi ba: «N moko kan waani yi yaa bali yaa po ke n tiendi laa bonla.»

Bi koaguudiba kpanjama

⁹ Lani yaa puoli Jesu den pua bi niba mi naa kpanjama ki yedi: «O ja den ŋu duven tiidi kuanu, ki guuni o kuanu bi koaguudiba ki fii ki gedi u dogu ki baan waagi lipo.

¹⁰ Li yogunu n den pundi, o den soani naacenyendo bi koaguudiba yeni kani, ke ban teni o o biinu o kuanu bonbaakaala nni. Ama bi koaguudiba den pua o i gbiami, ki yaadi o nukuomu.

¹¹ O go den soani naacentoa, bi den pua o moko i gbiami, ki fiagi o ki yaadi o nukuomu.

¹² O go den soani o naacentaalo mo. Bi den poagili o, ki deli o.

¹³ O koadaano den yedi o yuli: ‹N baa tieni lede? To, n baa soani n bijabuadiga, daalinba bi baa fangi wani wani.›

¹⁴ Ama bi koaguudiba n den laa o bi den yedi biyaba: ‹One n tie o faajielo, tin kpa o mani li faali n tua ti yaa yaali.›

¹⁵ Bi den luni o u kuanu puoli po ki ku o. Lanwani o koadaano baa soani ba lede?

¹⁶ O baa cua ki bolini laa koaguudiba ki teni o kuanu nitoaba.» Ban den gbadi lani bi den yedi: «U Tienu n da tuo line n tieni.»

¹⁷ Jesu den diidi ba ki yedi: «Lanwani yaala n diani na bundi be? Bi tanmaaba n den yie yaa tanli Lini n tua li tanpuuli tanjigi.»

¹⁸ Jesu den juodi ki yedi: «Yua n baa laa tanli po kuli baa kuakua, lin baa yua yaa po mo baa tua wagima.»

¹⁹ Lanyogunu liga bi kopadicianba yudanba leni li bali maama bangikaaba den moandi ki baa cuo Jesu, kelima bi den bandi ke o pua mi kpanjama yeni ki bagi bane, die bi den jie bi niba.

Loma badiciamo Sesa lubili

²⁰ Bi den kpaagi Jesu, ki soani yaa niba n kpali ke bi tiegi ki buali o moamoani, ke ban dia o ku madiagu ki cuo o leni maamaba, ki teni o bi bujiaba leni gufeneeli nuu nni wan bu ki cuo o.

²¹ Laa niba den buali o ki yedi: «Canbaa, ti bani ke ŋan maadi ki bangi yaala tiegi, ŋaa gagidi oba bi niba siiga, a bangi bi niba U Tienu sanŋoadima leni i moamoani.

²² Naani li pia u sanu tin pa Loma badiciamo *Sesa li lubili bi, bi laa pia?»

²³ Jesu den bandi bi fanu ki yedi: «Min le li kujapienli.

²⁴ Ŋme yaa nannanli leni ŋme yaa diani n maa lipo na?» Bi den goa ki yedi o: «Sesa yaali yo.»

²⁵ O den yedi ba: «Lanwani pa mani Sesa, yaala n tie Sesa yaala, ki pa U Tienu mo, yaala n tie U Tienu yaa yaala.»

²⁶ Baa den fidi ki cuo o o maama nni bi niba nintuali. O maguankaama yeni den paki ba ke bi ŋmini suo.

Sadusieninba buali, bi tinkpiba fiima po

²⁷ *Sadusieninba yaaaba n tua ke bi tinkpiba fiima ki ye, bi tianba den cua Jesu kani ki buali o ki yedi:

²⁸ «Canbaa, Musa den diani ki bili tipo li *bali maama nni ki yedi: ‹O nilo kpelo yaa kpe, ki pia pua kaa pia biga, wan taa o kpelo yeni pua ki baa o kpelo po u buolu.›

²⁹ To, jaba lele den ye ki taa baa. O bonkpelo den taa o pua ki kpe kaa baa biga.

³⁰ O bonlielo den taa o kpepuoli ki kpe. O bontaalo mo den taa o.

³¹ Li den tua yeni, ke bani bonba lele yeni kuli den kpekpe kaa baa biga.

³² Li yaa puoli o pua mo den ti kpe.

³³ Lanwani bi tinkpiba fiima yogunu, o pua yeni baa tua ŋme yaa yua yo? Kelima bani bonba lele yeni kuli yendo yendo den taa o ke o tua o pua.»

³⁴ Jesu den yedi ba: «Ŋanduna na jaba taani bi puoba, bi puoba mo kuni bi jaba,

³⁵ ama yaaba n dagidi ki baa fii bi tinkpiba siiga ki kua yaa yogunu n kpendi yaa yema nni, bi jaba kan go taa puoba, bi puoba mo kan go kuni jaba,

³⁶ kelima bi baa tie nani malekinba yeni, ki kan go kpe. Bi tie U Tienu bila, wan fiini yaaba bi tinkpiba siiga.

³⁷ Yaala n tie bi tinkpiba fiima maama fuuli, Musa den maadi li maama wan togidi yaa fatuugu n den co mi fantama yaa yogunu, wan den yini o Diedo yaa yeli n na: Abalahama Tienu, Isaaka Tienu leni Jakobo Tienu.

³⁸ To, U Tienu naa tie kpiema Tienu, o tie yaaba n fo yaa Tienu yo. Kelima o yaa po wani, bikuli fo.»

³⁹ Li balimaama bangikaaba siiga bi tianba den yedi: «Canbaa, a maadi bonŋanla.»

⁴⁰ Baa go den pia papaali ki go buali o bualiba kuli.

Kilisiti n tie yua

⁴¹ Jesu go den yedi ba: «Li ga lede ke bi niba tua ke *U Tienu n Gandi yua tie Dafidi Bijua?

⁴² Dafidi wani oba maadi Pisoma tili nni ki yedi: ‹O Diedo den yedi n Diedo: Kali n jienu po,

⁴³ Hali min baa teni a yibalinba N tua a taaŋmaakaanu.›

⁴⁴ Dafidi oba yini o o Diedo, li nan go ga lede ke o tie wani Dafidi bijua?»

Jesu jagili li bali maama bangikaaba

⁴⁵ Ku niligu kuli n den cengi, Jesu den yedi o ŋoadikaaba:

⁴⁶ «Fangi mani yi yula leni li bali maama bangikaaba, bani yaaba n bua ki yaa laa a liadiciama, ki go bua ban yaa fuondi ki kpiagidi ba mu daamu nni, ki go bua ki yaa ka i niciankali-kaani li *bali maama bangima diena nni, ki go bua yaa kaani n gagidi mi jecianma kani.

⁴⁷ Bi go janbidi a kpepuona ki fenli bi diena, ki go jaandi i jaandifoagi ki kpali ke bi tie jajaandimoana. Ti buudi yaa yogunu, bi yaa cuonu baa gagidi ki yaa bia ki cie.»