Luki 2 - Gourmanchéma Bible

¹ Laa yogunu *Sesa Ogusita den ñani li ñoabonli ke li yadi i kaani kuli ki yedi ke ban coadi Loma diema yaaba kuli.

² Laa coadikpiali den tieni Kilinusi n den tie Sili diema gufeneeli yaa yogunu.

³ Yua kuli den caa ke ban coadi o o dandogu nni.

⁴ Josefi moko den fii Nasaleti dogu yu n ye *Galile diema nni, ki gedi Jude diema Dafidi maadogu Betelema nni kelima o den tie Dafidi puoliŋuanu, leni o diegu nni yua.

⁵ O den gedi ke ban ban coadi wani leni o toginaa Maliyama, yua n den punbi.

⁶ Ban den ye Betelema, o maayogunu den pundi.

⁷ O den mali o posabiga, bonjaga. O den bobini o ti canpandi tiadi ki duani o ku yankpaku nni, kelima kaanu ki den ye bipo ku candiegu nni.

Bi yankpaaba leni malekinba

⁸ Laa tinkunu nni bi yankpaaba den ye ku muagu nni ki gu bi yandi ku ñiagu.

⁹ O Diedo maleki den doagidi o yuli bikani. O Diedo kpiagidi mo den yendi ki lindi ba, ke ti jawaandi cuo ba boncianla.

¹⁰ Maleki den yedi ba: «Da jie mani. Kelima n cuani yipo o laabaaliŋamo, yua n baa tua bi niba kuli po pamancianli.

¹¹ Lani n tie ke dinla, Dafidi dogu nni, bi mali yipo o Candaano, yua n tie Kilisiti, o Diedo.

¹² Line n baa tie yaa maalima n baa teni yin bandi o, yi baa le ki canpandiga ke bi bobini o ti canpandi tiadi ki duani o ku yankpaku nni.»

¹³ Lanyogunu malekinba boncianla den doagidi bikani ki taani leni maleki yeni ki pagi U Tienu ki tua:

¹⁴ «U Tienu n baa ti kpiagidi hali tanpojoma, Yaa niba n mangi o pali ki tinga nni N yaa pia mi yanduanma.»

Bi yankpaaba gedi Betelema

¹⁵ Malekinba n den ñani bikani ki goa tanpoli po, bi yankpaaba den yedi biyaba: «Tin gedi mani tonma hali Betelema ki ban le yaala n tieni, o Diedo n waani ti yaala.»

¹⁶ Bi den jaligi ki gedi ki lingi ki laa Maliyama leni Josefi, ki go laa ki canpandiga ke o dua ku yankpaku nni.

¹⁷ Ban den laa likuli bi den togidi maleki n den waani ba yaala ki canpandiga po.

¹⁸ Bi yankpaaba n den togidi yaala den paki yaaba n den gbadi kuli.

¹⁹ Maliyama den kubi laa togida kuli o pali nni ki kpaagi lipo.

²⁰ Bi yankpaaba den lebidi ki goa ki kpiagidi U Tienu, ki go pagi o ban gbadi ki go laa yaala kuli po, ke likuli den tie nani maleki n waani ba maama.

Bi kuani Jesu ku koanciagu

²¹ Ki canpandiga yeni madi daniili daali n den pundi, bi den kuani o ku koanciagu, ki cili o yeli Jesu, maleki n den waani ba yaa yeli hali ke o naa daa punbi o.

Jesu danba cuani o U Tienu diegu nni

²² Bi waliŋanbima dana n den pundi nani Musa balimaama n bili maama, bi den gedini ki canpandiga Jelusalema, ki baa gagidi o o Diedo po,

²³ nani lan diani maama o Diedo *bali maama nni: bonjakpiaga kuli, bi baa gagidi o o Diedo po.

²⁴ Bi go den cuani nani o Diedo bali maama n bili ban baa padi U Tienu po, lani n tie kpaajefanmu lie, yaaka kpaajenawuundi lie.

²⁵ Li yogunu o ja den ye Jelusalema ke bi yi o Simeyono. O den tie niteginka ki go fangi U Tienu, ki gu yua n baa baagi Isalele buolu yaaba. U Tienu Fuoma Yua den ye leni o.

²⁶ Li den sua ke U Tienu Fuoma Yua tuodi ki doagidi ki waani o ke o kan kpe kaa laa o Diedo n *Gandi Yua.

²⁷ U Tienu Fuoma den fiini o ke o cua U Tienu diegu nni. Ki canpandiga Jesu danba n den cuani o ki baa tieni opo U Tienu bali maama n bili yaala,

²⁸ Simeyono den ga o ki ŋmabi, ki pagi U Tienu ki yedi:

²⁹ «Moala n Diedo, Ŋan pa mini a naacemo N kuni leni mi yanduanma, Kelima a kuani a ñoanianu,

³⁰ Kelima n nuni laa Ŋan soani tipo yaa *faabima,

³¹ Ŋan bogini yaama Ke ŋanduna nibuoli kuli baa le,

³² Yaama n tie yenma ki baa yendi I nibuoli kuli ki teni ban bandi a, Ki go tie ti kpiagidi A niba Isalele buolu yaaba po.»

Simeyono n pua yaa sawalo

³³ Li den paki Jesu baa leni o naa leni Simeyono n maadi yaa maama opo.

³⁴ Simeyono den gaali ba ki yedi o naa Maliyama: «Diidi ki le, U Tienu bili ke ki naa biga baa teni ke Isalele buolu yaaba siiga boncianla n baa, boncianla mo n fii. O go baa tie U Tienu sinankeeni bi nitianba n baa yie yua,

³⁵ kelima o baa teni bi niba boncianla n jagi yaala bi pala nni n doagidi. Fini mo, yaa paboanli n tie nani ki jugisiega n baa muu a pali.»

O sawalipualo Hana maama

³⁶ O sawalipualo den ye ki yi Hana ki tie Fanueli yaa bisalo Asela buolu yua, ki den kpeligi boncianla. O den tieni bina lele leni o calo hali o jafandi nni.

³⁷ O di den tie kpepuoli ki pia piinii n bina naa. Waa den ña U Tienu diegu nni, o den tuuni U Tienu po u yensiinu leni ku ñiagu kuli leni mi ñoalolima leni i jaandi.

³⁸ Lanyogunu liga, o den nagini bikani ki pagi U Tienu ki maadimaadi yaaba n gu Jelusalema *daafaabima kuli Jesu maama.

Josefi leni o niba lebidi ki guani Nasaleti

³⁹ Josefi leni Maliyama n den tieni o Diedo bali maama n bili yaala kuli ki gbeni, bi den lebidi ki guani Galile nni bi dogu Nasaleti po.

⁴⁰ Ki biga den fandi ke o gbanmanu pugidi. O den pia mi yanfuoma boncianla, U Tienu *ŋanbili mo den ye leni o.

Jesu n den pia piiga n bina lie ki cua U Tienu diegu nni

⁴¹ Jesu danba den maani ki caa Jelusalema binli kuli mi *Pendima jaanma yogunu.

⁴² Jesu n den pia piiga n bina lie, bi den gedi Jelusalema laa jaanma po nani ban maani ki tiendi maama.

⁴³ Mi jaanma dana n den pendi ke bi goa ki kuni, ki biga Jesu den sedi Jelusalema. O danba ki den faami.

⁴⁴ Nani ban den tama ke o ye leni bi santagilieba yeni, bi den cuoni damunli ki lingi o bi kpiiba leni bi bankaaba kuli kani.

⁴⁵ Ban ki den laa o, bi den lebidi ki guani Jelusalema ki baan lingi o.

⁴⁶ Li dataali daali bi den laa o U Tienu diegu nni, ke o ka U Tienu *bali maama bangikacianba siiga, ki cengi bi maama ki go buali ba i buali.

⁴⁷ Li den paki yaaba n gba o maama kuli kelima o yanfuoma leni o maguankaama po.

⁴⁸ O danba n den laa o, li den paki ba boncianla, ke o naa yedi o: «N biga, be n teni ke a tieni ti line? Diidi, a baa leni mini kuli den ye leni ti yanyagiciandi ki lingi a.»

⁴⁹ O den yedi ba: «Be n teni ke yi lingi nni? Yii bani ke li tie tiladi min yaa ye n Baa dieli nni?»

⁵⁰ Ama baa den ga wan yedi ba yaala.

⁵¹ O den yegi leni ba ki kuni Nasaleti, ki tuo ki ŋua bi maama. O naa den kubi laa bonla kuli o pali nni.

⁵² Jesu den fandi ki go kpedi ke o yanfuoma pugidi. U Tienu pali leni bi niba yaa pala kuli den mani opo ki pugidi.