Luki 19 - Gourmanchéma Bible

¹ Lani n pendi Jesu den kua Jeliko dogu nni ki cuoni ki poandi u niinni.

² O ja den ye likani ki tie piado ke bi yi o Sake, ki tie bi lubigaaba yudanba siiga nni yendo.

³ O den moandi ki baa bandi yua n tie Jesu, ama wan koabi maama ke ku niligu mo nan yaba, waa den fidi ki laa Jesu.

⁴ Lani o den sani ki ga liiga ki doni yaa tibu n yi sikomoli ke o baa le Jesu, kelima o den baa tagi ki pendi lankane.

⁵ Jesu n den pundi likani, o den yaadi ki diidi o ki yedi: «Sake, jiidi tontoni kelima li tie tiladi min tundi a denpo dinla.»

⁶ O den jaligi ki jiidi ki ga o cangu leni li pamanli.

⁷ Bi niba kuli den laa lani ki yenbidi ki tua: «O ja na gedi ki ban cani u tagibiadu daano.»

⁸ Sake den sedi O Diedo nintuali ki yedi o: «Canbaa, diidi, n baa pa a luoda n piama boagidima. N yaa den janbi yua ki ga o kani bonlaba mo, n baa guani o la figilima naa.»

⁹ Jesu den yedi o: «Mi *faabima kua ku naa diegu nni dinla, kelima one moko tie Abalahama puoliŋuanu.

¹⁰ Kelima o *Ja Bijua cua ki baa lingi ki go faabi yaaba n yaadi.»

Naacenba taa kpanjama

¹¹ Bi niba n den cengi laa maama, Jesu go den pua mi kpanjama, kelima o den nagi leni Jelusalema ke bi niba tama ke *U Tienu diema baa doagidi lanyogunu liga.

¹² Lani yaa po o den yedi: «O badija den gedi yaa dogu n foagi, ki baan je li bali ki goa ki kpeni.

¹³ Hali ke o daa gedi, o den yini o naacenba siiga bonba piiga ki teni ba wula kujapiena piiga ki yedi ba: ‹Yaa kpendi mani hali min baa goa ki kpeni na.›

¹⁴ Ama o dogu nni yaaba den nani o ki yuandi ki soani o puoli bi tondiba ke ban ban yedi: ‹Tii bua yaa ja n tie na n yaa die ti.›

¹⁵ To, bi den dini o badija yeni li bali, ke o goa ki kpeni o dogu nni. O den yini bi naacenba yaaba ke o den teni i ligi yeni, ki baa bandi ban den kpendi ki baa yaala.

¹⁶ O nikpialo den cua ki yedi: ‹N daano, a wula kujapienli cuani ti ñuadi wula kujapiena piiga.›

¹⁷ O bado yeni den yedi o: ‹Li ŋani, n naacenŋamo, a teni ke n fidi dugi apo li bonwaala nni, lanwani, n dini a li bali ŋan yaa die dociami piiga.›

¹⁸ O naacenlielo den cua ki yedi: ‹N daano, a wula kujapienli cuani ti ñuadi wula kujapiena muu.›

¹⁹ O canbaa den yedi o: ‹N dini a moko li bali ŋan yaa die dociami muu.›

²⁰ Naacentoa moko den cua ki yedi: ‹N daano, ga a wula kujapienli, n den gbini li li cabili nni ki bili.

²¹ N den jie ŋa kelima a pia ki mabinga, a taani ŋan kaa bili yaala, ki yendi ŋan kaa buli yaala.›

²² O bado den yedi o: ‹O naacenbiado na, n cuo ŋa a maceli nni. A den bani ke n tie yaa nilo n pia ki mabinga, ki taani min kaa bili yaala, ki go yendi min kaa buli yaala.

²³ Be nan teni ke ŋaa den bili n ligi ku ligidiegu nni ke n goakpenma min bi ga yi leni ti ñuadi?›

²⁴ Lani o den yedi yaaba n ye likani: ‹Ga mani o kani li wula kujapienli yeni ki teni yua n pia wula kujapiena piiga yeni.›

²⁵ Bi den goa ki yedi o: ‹Ti daano, o pia wula kujapiena piiga no.›

²⁶ O den goa ki yedi: ‹N waani yi i moamoani ke bi baa pa ki pugini yua n pia kuli, ama yua n kaa pia, bi baa ga o kani baa wan pia yaala.

²⁷ N yibalinba mo, bani yaaba n kaa den bua nni leni li bali yeni, cuani ba mani ki kpa ba n nintuali.› »

Jesu kua Jelusalema

²⁸ Jesu n den maadi laa maama, o den ga liiga ki do ki caa Jelusalema.

²⁹ Wan den nagidi Betifaje leni Betani yaa dobila, ki kuu *Olifie Tiidi juali, o den soani o ŋoadikaaba siiga bilie ki yedi ba:

³⁰ «Suagi mani ki gedi yaa dobiga n ye liiga na. Yi yaa baa kua lienni yaa yogunu, yi baa le yaa ŋunbisaagili ke oba daa jagini li, ke li luo. Yin loti li mani ki cuani na.

³¹ Nilo yaa yedi yi: ‹Be n teni ke yi loti o?› Yin yedi o mani daa: ‹Ti Daano n bua o.› »

³² Bi tondiba yeni den gedi ki ban sua ke likuli tie nani Jesu n bi yedi ba maama.

³³ Ban den loti li ŋunbisaagili yaa yogunu, li danba den yedi ba: «Be n teni ke yi loti li ŋunbisaagili na?»

³⁴ Bi den goa ki yedi: «Ti Daano n bua o.»

³⁵ Lani bi den cuani o Jesu kani ki lu ki maani bi kpaliti opo, ki teni ke Jesu jagini.

³⁶ Jesu den jagi ki suagi liiga, ke bi niba ladi bi tiadi u sanu nni.

³⁷ Wan den nagidi Jelusalema ki ji Olifie Tiidi juali, o ŋoadikaaba yaaba n yaba den ye leni li pamanli ki kpaani ki pagi U Tienu kelima ban laa yaa bancianma kuli po.

³⁸ Bi den tua: U Tienu n seligi o bado Yua n kpendi wani o Diedo yeli nni. Mi yanduanma n yaa ye tanpoli po. U Tienu yua n ye hali tanpojoma n baa ti kpiagidi.

³⁹ Ama *Falisieninba bi tianba yaaba n den ye ku niligu siiga den yedi Jesu: «Canbaa, fu leni a ŋoadikaaba ban suoni.»

⁴⁰ Jesu den goa ki yedi ba: «N waani yi, bi yaa suoni, a tana baa kpaani.»

Jesu buudi Jelusalema po

⁴¹ Jesu n go den nagidi Jelusalema ki pugidi ki laa u, o den buudi upo

⁴² ki yedi: «A moko yaa bi bani dinla daali yaa bonla n baa teni ŋan baa mi yanduanma. Ama moala li nan duagi a nuni po.

⁴³ Fala dana baa cua apo, a yibalinba baa kpa li nagili ki lindi ki cebini a ki baa ŋa,

⁴⁴ ki bolini a, fini u dogu yeni leni a niba kuli, ki mudi a diena, ki kan ŋa baa tanyenli n yaa maa liyali po. Lankuli baa tieni kelima ŋaa den bani U Tienu n den cua ki baa faabi a yaa yogunu.»

Jesu kua U Tienu diegu nni

⁴⁵ Jesu den kua U Tienu diegu luolu nni ki deli ki ñani yaaba n kuadi

⁴⁶ ki tua ba: «Li diani ki yedi: ‹N diegu baa tie li jaandieli, ama yinba wani n teni ke li tua a concona wuonkaanu.› »

⁴⁷ Daali kuli Jesu den bangi bi niba U Tienu diegu nni. Bi kopadicianba yudanba leni li *bali maama bangikaaba leni bi yudanba den lingi ki baa kpa o.

⁴⁸ Ama baa den bani ban baa ga maama ki kpa o kelima bi niba kuli den cengi o maama leni li fangili boncianla.