Luki 18 - Gourmanchéma Bible

¹ Jesu den pua ba mi kpanjama ki baa waani ba ke li pundi ban yaa jaandi yogunu kuli ki da cedi bi gbani n wudi.

² O den yedi: «O bujialo den ye u dogu nni kaa jie U Tienu, kaa fangi niloba mo.

³ Li kpepuoli moko den ye u dogu yeni niinni ki yen kpendi ki miadi o ki tua: ‹Ŋan tuu npo n koanginka n panli.›

⁴ O bujialo den waagi ki yiedi. Li yaa puoli o den ti maadi o yuli ki yedi: ‹Baa ke mii jie U Tienu kaa fangi niloba mo,

⁵ li kpepuoli na n coagini nni maama na, n baa tuu opo o panli, yeni yaaka, o li baa kpendi ki coagini nne.› »

⁶ O Diedo den pugini ki yedi: «Yi gbadi o bujiabiado yeni n yedi yaala.

⁷ N buali yi, naani U Tienu kan tuu wan gandi yaaba po bi panli, bani yaaba n kpaani ki miadi o u yensiinu leni ku ñiagu kuli bi? Naani o baa waagi ki kan todi ba?

⁸ N kadi ki waani yi, o baa jaligi ki tuu bipo bi panli. Ama naani o *Ja Bijua yaa goa ki cua ŋanduna nni, naani o baa le li *dandanli bi?»

Falisieni leni o lubigaalo kpanjama

⁹ Jesu go den pua mi naa kpanjama kelima bi nitianba yaaba n pagi bi yula ke bi tiegi, ki fali yaaba n sieni yaa po.

¹⁰ O den yedi: «Niba lie den gedi U Tienu diegu nni ki baa jaandi. O yendo den tie *Falisieni, o lielo mo lubigaalo.

¹¹ Falisieni yeni den sedi ki jaandi o pali nni ki yedi: ‹U Tienu, n tuondi a kelima mii taa leni yaa niba n sieni ki tie concona, leni bi nibiadiba, leni mi conconma danba, n tuondi a ke mii taa leni yaa lubigaalo n tie na moko.

¹² Dana lele kuli siiga, n luo bu ñoabu taalima lie. N ñandi n *dim n bonbaakaala kuli nni.›

¹³ O lubigaalo yeni mo den poadi ki sedi foagima, kaa tuo ki baa yaadi ki noanli tanpoli. O den pua o benli ki yedi: ‹U Tienu, gbadi npo mi niñima, mini yua n tie ti *tuonbiadi daano.› »

¹⁴ Jesu den pugini ki yedi: «N waani yi i moamoani ke wani n den kuni o denpo ke U Tienu saa opo i moamoani ke o tiegi, ama Falisieni yeni wani ki den baa. Kelima yua n fiini o yuli kuli, U Tienu baa jiini o, yua n jiini o yuli mo, U Tienu baa fiini o.»

Jesu gaali a biwaala

¹⁵ Bi niba den kpendinni a canpanda Jesu kani ke wan sii ba. O ŋoadikaaba n den laa lani, bi den fu leni yaaba n kpendinni ba.

¹⁶ Ama Jesu den teni ke bi cuani ba ki yedi: «Cedi mani a biwaala n cua n kani ki da deli ba, kelima *U Tienu diema tie yaaba n tie nani a biwaala yene po.

¹⁷ N waani yi i moamoani ke yua n kaa tuo U Tienu diema nani ki biwaaga yeni kan kua lienni.»

O jawapiado

¹⁸ Jufinba yudaano yendo den buali Jesu ki yedi o: «O canbaaŋamo, n baa tieni be ki baa yaa miali n kan gbeni?»

¹⁹ Jesu den goa ki yedi o: «Be yaa po ke a yini nni niŋamo? U Tienu bebe yaaka, oba kuli ki ŋani.

²⁰ A bani li *balimaama n bili yaala: ‹Ŋan da conbi, ŋan da kpa nilo, ŋan da su, ŋan da tieni mi siedi-faama, ŋan jigini a baa leni a naa.› »

²¹ O ja yeni den goa ki yedi: «N kubi lankuli hali n biwaama nni.»

²² Jesu n den gbadi lani o den yedi o: «Bonyenla n da go poadi a po. Ŋan kuadi ŋan pia yaala kuli, ki boagidi a luoda li ligi, lane a baa pia ŋalimani tanpoli po. Lani ŋan cua ki ŋoadi nni.»

²³ O ja n den gbadi laa maama, o pali den biidi kelima o piama den yaba.

²⁴ Jesu den laa ke o pali biidi ki yedi: «Li pa hali boncianla a piada n baa ki kua U Tienu diema nni.

²⁵ Ku yuoyuogu n tagini mi kpalipienbonma nni dingi ki cie o piado n kua U Tienu diema nni.»

²⁶ Yaaba n den cengi o maama yeni den yedi: «Li yaa tie yeni, ŋme nan baa fidi ki tindi?»

²⁷ O den goa ki yedi: «Bi nisaaliba n kan fidi yaala, U Tienu wani n baa fidi la.»

²⁸ Lani, Pieli den yedi o: «Diidi ki le, tinba ti den fii ki ŋa tin pia yaala kuli ki ŋua ŋa.»

²⁹ Jesu den yedi ba: «N waani yi i moamoani ke laa pia yaa nilo n fii ki ŋa o dieli, yaaka o pua, yaaka o kpiiba, yaaka o danba, yaaka o bila kelima U Tienu diema po,

³⁰ ki kan baa moala na boncianla ki cie wan den ŋa yaala kuli. Yaa yogunu n kpendi mo, o baa baa yaa miali n kan gbeni.»

Jesu waani mi tataama ke o baa kpe ki go fii

³¹ Jesu den taa bi piiga n niliediba ki piadi leni ba ki yedi: «Cengi mani, ti do ki caa Jelusalema ke bi sawalipuaba n den diani yaala ke li maadi o Ja Bijua maama kuli baan tieni ki dudi.

³² Bi baa cuo o ki teni o bi nilanba. Bi baa ñuadi o ki faligi o, ki sii opo ti ñinsandi,

³³ ki pua o i baliji ki yuandi ki kpa o. Ama li dataali daali o baa fii bi tinkpiba siiga.»

³⁴ Bi ŋoadikaaba ki den ga liba kuli laa maama nni. O maama yeni den boani ba. Baa den ga Jesu n maadi yaala n bua ki yedi yaala.

Jesu noadi o juamo

³⁵ Jesu n den nagidi Jeliko, li sua ke o juamo ka u sankunu ki miadi.

³⁶ O den gbadi ke ku niligu pendi ke o buali lan tie yaala.

³⁷ Bi den waani o ke Nasaleti yua Jesu n tagini ki baa pendi.

³⁸ O den kpaani: «Jesu, Dafidi Bijua, gbadi npo mi niñima.»

³⁹ Yaaba n den cuoni Jesu liiga den funi leni o ke wan suoni, ama o go den kpaani ki pugini ki tua: «Dafidi Bijua, gbadi npo mi niñima.»

⁴⁰ Jesu den sedi ki yedi ban cuani o o kani. O juamo n den nagini, Jesu den buali o ki yedi:

⁴¹ «A bua min tieni apo be?» O den goa ki yedi: «N Daano, n bua ŋan teni min go yaa nua.»

⁴² Jesu den yedi o: «A nuni n go yaa nua, a dandanli paagi a.»

⁴³ Lanyogunu o nuni go den noadi, ke o ŋoadi Jesu ki kpiagidi U Tienu. Bi niba kuli den laa lani ki pagi U Tienu.