Luki 17 - Gourmanchéma Bible

¹ Jesu den yedi o ŋoadikaaba: «Laa pia ke yaala n baa teni bi niba ban yaa tiendi ti *tuonbiadi kan yaa kpendi, ama fala baa ye leni yaa nilo n cuani la.

² Bi yaa lani o li naacianli ki lu o mi ñincianma nni wan bodi, lani n cie wan teni yaa bonwaamu n tie na siiga baa yendo n tieni ti tuonbiadi.

³ Fangi mani yi yula. A kpiilo yaa tieni ti tuonbiadi, ŋan tundi o. O yaa lebidi o yama, ŋan pa o sugili.

⁴ O yaa tudi apo taalima lele dayenli, ke taalima lele yeni o cua a kani ki yedi: ‹N lebidi n yama› ŋan pa o sugili.»

⁵ Jesu tondiba den yedi o: «Ti Daano, pugini ti *dandanli.»

⁶ O Diedo den goa ki yedi: «Yin pia yaa dandanli yaa pundi baa mutaadi bonbibu n wa ki da maama, yi bi baa fidi ki yedi bu naa sikomoli tibu: ‹Ŋabi aba ki ban ŋu aba mi ñincianma nni,› bu baa tuo.

⁷ Yi siiga ŋme baa pia o naacemo ke o ko, yaaka o kpaa i pe, o yaa ñani u kuanu po ki kpeni, naani o canbaa baa yedi o: ‹Cua moala ki je?›

⁸ Ama o baa yedi o: ‹Ŋanbi npo mi jiema, ki bogidi aba ki yaa tendi nni ma hali min je ki go ño ki gbeni no. N yaa gbeni, a mo baa je ki go ño.›

⁹ Naani o baa pagi o o naacemo yeni kelima o tieni wan puogi o yaala bii?

¹⁰ Li tie yene yinba yiba moko yaa po, yi yaa tieni ban puogi yi yaala kuli, yin yedi mani: ‹Ti tie yaa naacenba n soani ti tuonli bebe, ti tieni lan pundi tin tieni yaala.› »

Jesu paagi gbaada piiga

¹¹ Jesu n den kubi o sancenli ki caa Jelusalema, o den poandi Samali leni *Galile diema siiga.

¹² O den baa kua doyendu nni ke *gbaada piiga den kpendi ki baa tuogi o. Bi den sedi foagima ki kpaani:

¹³ «Canbaa Jesu, gbadi tipo mi niñima.»

¹⁴ Wan den laa ba o den yedi ba: «Gedi mani ki ban waani yi yula bi kopadicianba.» Ban den caa yaa yogunu bi den paagi ki ŋanbi.

¹⁵ Bi siiga yendo n den laa ke o paagi, o den lebidi ki goa ki kpaani ki pagi U Tienu.

¹⁶ O den labini Jesu taana kani ki tuondi o. O den tie Samali yua.

¹⁷ Jesu den yedi o: «Niba piiga yeni kuli ka paagi? Bi niyiadiba ye le?

¹⁸ Naani oba ki lebidi ki cua ki baa pagi U Tienu kali o *nilamo na bebe?»

¹⁹ Lani o den yedi o ja yeni: «Fii ki gedi. A dandanli paagi a.»

U Tienu diema

²⁰ *Falisieninba den buali Jesu *U Tienu diema n baa cua yaa yogunu. O den goa ki yedi ba: «U Tienu diema naa tie maama ke bi niba baa fidi ki le ma ka.

²¹ Bi kan yedi: ‹Mi ye ne,› yaaka: ‹Mi ye nepo.› Kelima U Tienu diema ye yi siiga baa moala.»

²² Lani Jesu den yedi o ŋoadikaaba: «A dana kpendi ke yi baa bua hali boncianla ki le o *Ja Bijua dana siiga baa dayenli, ki nan kan le.

²³ Bi baa ti yedi yi: ‹O ye ne,› yaaka: ‹O ye nepo,› yin da gedi mani, yin da sani ki ŋoadi ba mani.

²⁴ Kelima nani mi tañigima n yen ñuliti ki pelini nepo tinbianu, ki poandi ki yaa caa hali une maama yeni, li baa tua yene o Ja Bijua daali yaa cua.

²⁵ Hali ke li daa tieni, li tie tiladi wan le fala boncianla, moala na niba mo n yie o.

²⁶ Lan den tie maama Nowe yogunu, li go baa tie yeni o Ja Bijua yaa dana nni.

²⁷ Bi nisaaliba den di ki go ñu, ki taani bi puoba ki puuni bi bisiaba bi jaba, hali Nowe n den ti kua ku ñinbiaciangu nni yaa daali. Ki tabolinkaaga den cua ki bolini bikuli.

²⁸ Lan den tie maama *Loto yogunu, li go baa ti tie yene. Bi niba den di ki go ñu, ki da ki kuadi, ki coagi ti jaadi, ki maa a diena.

²⁹ Ama Loto n den ñani Sodoma nni yaa daali, mi fantama leni li cidibili den ñani tanpoli ki mini nani ki taaga yeni ki bolini bikuli.

³⁰ Li go baa tua yene o Ja Bijua n baa doagidi o yuli yaa daali.

³¹ Laa daali yua n ka o doangu yuli po, ke o tiadi ye deenni, wan da jiidi ki kua ki baa taa ti, yua n ye u kuanu po mo n da lebidi ki guani o denpo.

³² Tiadi mani Loto pua po.

³³ Yua n bua ki ga o miali baa biani li, ama yua n baa biani li baa ga li.

³⁴ N yedi yi, laa daali ñiagu niba lie baa dua duanyendu, bi baa taa yendo ki ŋa o yua.

³⁵ Puoba lie baa taa ki naani, bi baa taa yendo ki ŋa o lielo.

³⁶ Jaba lie baa taa ki ye u kuanu nni, bi baa taa yendo ki ŋa o yua.»

³⁷ Bi ŋoadikaaba den yedi o: «Ti Daano, line baa tieni hali le?» O den goa ki yedi: «Li bonkpienla n ye naani, i kaabi baa taani lankane.»