Luki 13 - Gourmanchéma Bible

¹ Laa yogunu bi nitianba den cua ki togidi Jesu yaala n den tieni *Galile yaaba, yaaba n den cua ki baa padi U Tienu po, ke Pilata den teni ke bi ku ba, ki wuli bi soama ke mi taani ki kali leni bi pada yaa yaama.

² Jesu den goa ki yedi: «Yi tama ke laa niba den laa laa fala kelima bi tieni ti *tuonbiadi ki cie Galile yaaba kuli bi?

³ N yedi yi, yeni ka baa. Yi yaa lebidi yi yama, yi moko yikuli baa bodi yene.

⁴ Bi, Silowe diefoagili n den baa ki ku yaa piiga n niniidiba yeni, yi tama ke bi den tudi U Tienu po ki cie Jelusalema yaaba kuli bi?

⁵ N yedi yi, yeni ka baa. Yi moko yaa lebidi yi yama, yikuli baa bodi yene.»

Yaa kankanbu n kaa luoni yaa maama

⁶ Lani, Jesu den pua mi naa kpanjama ki yedi: «O ja den ŋu bu kankanbu o duven tiidi kuanu nni. O den cua bu kani ki lingi a kankana kaa laa pu.

⁷ Lanwani o den yedi o koaguudo: ‹Diidi ki le, bina taa nna ke n kpendi ki lingi bu kankanbu na po a kankana, mii laadi pu. Pedi bu. Be yaa po ke bu miabi u kaanu fanma fanma?›

⁸ O koaguudo den goa ki yedi o: ‹Canbaa, cedi bu dunla da goga. N baa ko ki lindi bu ki tieni ti bugidi.

⁹ Daalinba jeli po bu baa luoni, lan yaaka, ŋan pedi bu.› »

Jesu paagi o pua mi fuodima daali

¹⁰ Mi *fuodima daali dayenli Jesu den bangi bi niba li *bali maama bangima dieyenli nni.

¹¹ O pua den ye lienni ki pia ki cicibiadiga, yaaga n den teni ke o yia hali piiga n bina nii, ke o ciaga poali ke o gunbi ki kan fidi ki yaadi ki sedi.

¹² Jesu n den laa o, o den maadi leni o ki yedi o: «O pua na, a paagi ki faabi leni a yianu.»

¹³ O den maani opo o nii ke lanyogunu liga o pua yeni den yaadi ki sedi ki kpiagi U Tienu.

¹⁴ Ama li bali maama bangima dieli yudaano pali den biidi Jesu n paagi o nilo mi fuodima daali yeni po, ke o yedi ku niligu: «Yi pia dana luoba ki baa tuuni yi tuona, yin yaa kpendi mani laa danluobida yaa niinni ban paagi yi, ki da cua mi fuodima daali ke ban paagi yi.»

¹⁵ O Diedo den goa ki yedi o: «Yinba pala lie danba, naani mi fuodima daali yi siiga yua kuli ki yen loti o nua yaaka o ŋunbo ki ñani o li yandieli nni ki ban ñuni o?

¹⁶ O pua yua n tie Abalahama puoliŋuanu ke Sutaani luo o hali piiga n bina nii na mo te, laa pundi min loti laa lolima mi fuodima daali?»

¹⁷ Wan den maadi yeni yaa yogunu, i fe den cuo o koanginkaaba kuli. Ama ku niligu kuli yaa pali den mangi leni wan tiendi yaa banma ke mi pia ti kpiagidi kuli.

Mutaadi leni li dabinli kpanjama

¹⁸ Jesu go den yedi: «*U Tienu diema naani be? N baa nandi ma leni be?

¹⁹ Mi tie nani yaa kpintiigu yaa bonbibu n wa ki cie ki yi mutaadi ke o nilo buli bu o kpintiidi kuanu nni ke bu pudi ki kpedi ki tua tibu. Ti bonyugiditi den tiendi bi tiana bu beni po.»

²⁰ O go den yedi: «N baa nandi U Tienu diema leni be?

²¹ Mi naani leni li *dabinli ke o pua taa ki buuni yonyiemu taa, ki sieni hali likuli n pili.»

Yaa buliñoabu n miabi

²² Jesu den suagi liiga ki poandi i dociami leni i dowaali nni, ki bangi bi niba o Laabaaliŋamo ki caa Jelusalema.

²³ O nilo den yedi o: «O Diedo, naani niba waamu bebe n baa tindi?» O den goa ki yedi yaaba n ye likani:

²⁴ «Moandi mani ki kua yaa buliñoabu n miabi kani, kelima n tuodi ki waani yi ke bi niba boncianla baa ti moandi ki baa kua lankani ki nan kan fidi.

²⁵ O diedaano yaa ti fii ki luoni bu buliñoabu yaa yogunu, ke li sua ke yi sieni niinpo, yi baa cili ki yaa pua bu buliñoabu kani ki tua: ‹Canbaa, luodi tipo.› O baa goa ki yedi yi: ‹Mii bani yin ñani naani.›

²⁶ Lanwani yi baa goa ki yedi o: ‹Ti den dini ki go ñuni a kani, a go den bangi ti ti dogi sani nni moko.›

²⁷ O go baa goa ki yedi yi: ‹N yedi yi, mii bani yin ñani naani, fuadi mani n kani, yinba yaaba n tiendi mi biadima.›

²⁸ Lankane yi yaa ti laa Abalahama leni Isaaka leni Jakobo leni bi sawalipuaba kuli ke bi ye U Tienu diema nni ke yinba wani nan ye niinpo, yi baa buudi ki cegini yi ñina.

²⁹ Bi niba baa ti ña nintuali leni puoli po leni niganu leni nijienu po ki taani ki kali u saajekaanu kani U Tienu diema nni.

³⁰ Diidi, bi tianba yaaba n tie puoli yaaba moala baa ti tua liiga yaaba, bi tianba yaaba n tie liiga yaaba mo baa ti tua puoli yaaba.»

Jesu kadi ki waani ke o baa kpe Jelusalema

³¹ Laa yogunu *Falisieninba bi tianba den cua o kani ki yedi o: «Ña ne ki gedi potogu kelima *Elodo bua ki kpa ŋa.»

³² O den goa ki yedi ba: «Gedi mani ki ban yedi o, wani o colo yeni, ke n deli ki ñandi mu cicibiadimu bi niba niinni ki go paagidi bi niba dinla leni saala, li dataali daali n baa soani ki dudi.

³³ Li tie tiladi min suagi liiga dinla leni saala leni yaa daali n ŋua, kelima laa dagidi sawalipualo n kpe kaanto kaa tie Jelusalema.

³⁴ Jelusalema, Jelusalema, fini yua n ku bi sawalipuaba, ki lugidi U Tienu n tuuni a kani yaaba a tana, taalima ŋa yo ke n den bua ki gobidi ki taani a niba n kani nani o kooñua n yen wuugi o koobila o fiabi nni maama, ama yii den bua.

³⁵ Lani yaa po, yi diegu baa tua diegbengu. N waani yi, yi kan go le nni hali yin baa ti yedi yaa yogunu: ‹U Tienu n seligi yua n kpendi wani o Diedo yeli nni.› »