Luki 11 - Gourmanchéma Bible

¹ Dayenli Jesu den jaandi kaanuba. Wan den jaandi ki gbeni, o ŋoadikaaba siiga yendo den yedi o: «N Daano, bangi ti tin baa jaandi maama, nani Jan n bangi o yaa ŋoadikaaba maama.»

² Jesu den yedi ba: «Yi yaa yen baa jaandi yin yedi: ‹Ti Baa, a yeli n baa mi gagidima. A diema n cua.

³ Pa ti daali kuli yaa jiema banlu n dagidi.

⁴ Tieni tipo sugili ti *tuonbiadi po Kelima ti moko tiendi sugili yaaba n tudi tipo kuli po. Da tuo tin baa mi tulinma nni.› »

⁵ O go den yedi ba: «Yi siiga yendo yaa pia o danli ki gedi o kani ku yagisiigu ki yedi o: ‹N danli, ledi nni dupen bonba taa,

⁶ kelima n danli yendo fii li sancenli ki cua ki cani nni ke n naa pia liba ki baa candi o.›

⁷ O danli yua n ye o dieli tugu nni yeni yaa goa ki yedi o: ‹Da yagini n yama, n luoni bu buliñoabu no, mini leni n bila kuli mo duani, n kan go fidi ki fii ki pa ŋa.›

⁸ N yedi yi, baa o yaa kan fii ki pa o kelima o tie o danli, o baa fii kelima o tigini po, ki pa o wan luo yaala yeni kuli.

⁹ Lani yaa po n yedi yi, mia mani, bi baa pa yi, lingi mani, yi baa le, yedi mani: ‹Gafala,› bu buliñoabu kani, bi baa luodi yipo.

¹⁰ Kelima yua n mia kuli baa baa, yua mo n lingi kuli mo baa le, bi baa luodi yua yedi: ‹Gafala,› ki bua ki kua kuli po mo.

¹¹ Yinba bibaanba siiga, ŋme yaa bijua n baa mia o dupen, wan teni o li tanli, bi o yaa mia o o jamo, wan teni o o wa?

¹² Bi o baa mia li jenli, wan teni o o namo?

¹³ Yinba yaaba n bia yaa bani ki pa yi bila li bonŋanla, lanwani laa pia kuli tama ke ti Baa yua n ye tanpoli baa pa yaaba n mia o o Fuoma Yua.»

Jesu n deli mu cicibiadimu yaa paalu po

¹⁴ Jesu den deli ki ñandi o nilo niinni yaa cicibiadiga n teni ke o tie muulo. Ki cicibiadiga yeni n ñani yaa yogunu, o muulo den maadi ke li pakili leni li fangili cuo ku niligu.

¹⁵ Ama bi tianba den yedi: «Mu cicibiadimu bado *Belisebu n puni o u paalu ke o fidi ki deli mu cicibiadimu bi niba niinni.»

¹⁶ Bi tianba mo den bua ki dia Jesu ku madiagu, ki mia o ke wan tieni yaa bancianma n baa doagidi ke o paalu ñani U Tienu kani.

¹⁷ Jesu den bani ban maliti yaala ki yedi ba: «Yaa diema n boagidi ki tuogi leni mi yuli kuli baa bodi, mi diena kuli mo baa baali aya po.

¹⁸ Sutaani yaaba mo yaa deli ki ñani Sutaani yaaba, o diema baa tieni lede ki yaa ye? N yedi yeni kelima yi yedi ke mu cicibiadimu bado Belisebu puni nni u paalu ke n deli mu cicibiadimu.

¹⁹ Belisebu n yaa puni nni u paalu ke n deli mu cicibiadimu, yi yaa ŋoadikaaba mo deli mu ŋme yaa yeli nne? Lani yaa po bi baa jia yi leni ti buudi.

²⁰ Ama li yaa tie U Tienu nubili n puni nni u paalu ke n deli mu cicibiadimu, lanwani *U Tienu diema pundi yi kani.

²¹ O gbanmandaano yaa kubi o jatiadi ki gu o diegu, wan pia yaala kuli, waa bangi lipo.

²² Ama yua n pa ki cie o yaa cua ki baa o ki paadi o, o baa fie o jatiadi wan bi dugi yaadi yaa po kuli, ki taa o fagidi ki boagidiboagidi.

²³ Yua n ki taa npo kuli tie n yieka. Yua n ki todi nni ke n taandi nan yadi wani.

Ki cicibiadiga guanma

²⁴ Ki cicibiadiga yaa ñani o nilo niinni, ki yen gedi ki ban yaa gaandi yaa fuali n ki pia ñima nni, ki lingi mi fuodima. O yaa laa, ki baa yedi: ‹N baa lebidi ki guani n dieli po min den ñani naani.›

²⁵ O yaa pundi o baa sua ke li pidi ki ŋanbi.

²⁶ Lanwani o baa gedi ki ban taa cicibiadimu lele yaamu n bia ki cie kani kiba, mun yegi ki ban kua li niinni ki yaa ye. Laa nilo yeyuankaama baa bia ki cie mi kpiama.»

Mi yemanmoanma maama fuuli

²⁷ Jesu n den maadi yeni yaa yogunu, o pua den kpaani ku niligu siiga ki yedi o: «Li pamanli ye leni yaa pua n mali a leni yaa biina n ŋaani a kuli.»

²⁸ Jesu den goa ki yedi o: «Li pamanli ye leni yaaba cengi U Tienu maama ki kubi ma ki cie.»

Bi mia Jesu wan tieni mi bancianma

²⁹ A nigola n den taani boncianla ki ŋabi ki mabindi Jesu, o den yedi: «Moala na niba tie nibiadiba. Bi miadi yaa bancianma n tie sinankeeni, ama bi kan tieni bipo sinankeentoa li yaa tie Jonasa yua yaaka.

³⁰ Nani Jonasa n den tie sinankeeni Ninife dogu yaaba po maama, o *Ja Bijua moko baa tua sinankeeni moala niba po yene.

³¹ Yaa diema n ye niganu po pobado baa taani ki sedi leni moala na niba ti buudi daali, ki bu ki cuo ba, kelima o den ñani hali hali foagima, ki cua ki cengi Salomono yanfuoma maama, ama moamoani, yaala n cie Salomono ye ne.

³² Ninife dogu yaaba moko baa taani ki fii ki sedi leni moala na niba ti buudi daali ki bu i cuo ba, kelima Jonasa n den waani ba U Tienu maama, bi den lebidi bi yama. Ama moamoani, yaala n cie Jonasa ye ne.

Ti gbanandi yenma

³³ Niloba kan cuoni fidisanga ki kuani ga yaa kaanu n wuo, yaaka ki taa li sancianli ki ŋoagini ga. Ama o baa taa ki tuani ga u fidisantuankaanu ke yaaba n kua li dieli nni kuli n yaa nua mi yenma.

³⁴ A nunbu tie a gbanandi fidisanga. A nunbu yaa ŋani, a gbanandi nni kuli baa yieni bonŋanla. Ama a nunbu yaa ŋani, a gbanandi kuli baa ye li *biigili nni.

³⁵ Lani yaa po ŋan fangi a yuli ki da teni ke yaa yenma n ye a niinni n tua biigili.

³⁶ A gbanandi nni kuli yaa yieni bonŋanla ke li biigili ki ye kaanuba kuli nni, tikuli baa yieni nani ki fidisanga n yen yendi apo ki yenma maama.»

Jesu jaligi mi jaanma yudanba

³⁷ Jesu n den maadi yaa yogunu, *Falisieni yendo den yini o ke wan kua ki je o deni. O den kua ki kali u saajekaanu kani.

³⁸ Falisieni yeni den laa ke waa nidi ki baa je, li den paki o.

³⁹ O Diedo den yedi o: «Yinba Falisieninba, yi yen ŋuudi ki ŋanbi ki tadiñokaaga leni ku saajetadigu kuli puoli po, ama yi tugu nni nan gbie leni yin fenli yaala leni yin tiendi yaa biadima.

⁴⁰ Yinba, bi yanpiidanba yeni, yua n tagi puoli po, wan ka tagi tugu nni mo?

⁴¹ Pa mani a luoda yaala n ye yi pala tugu nni lani, yaala n sieni kuli baa ŋanbi yipo.

⁴² Fala baa ye leni yi, yinba Falisieninba, kelima yi coadi yaa kpinfaadi n yi menti leni lu, leni kpinfatoadi kuli, ki ñandi *dim. Ama yi ŋa mi *teginma leni U Tienu yaa buama. Li pundi yin yaa bi tiendi lani, ki nan da cedi yin maani ki tiendi yaala yeni mo.

⁴³ Fala baa ye leni yi, yinba Falisieninba, kelima yi bua ki yaa ka i niciankali-kaani li *bali maama bangima diena nni, ki go bua bi niba n yaa fuondi ki kpiagidi yi mu daamu nni.

⁴⁴ Fala baa ye leni yi kelima yi tie nani yaa kula n ki ñi ke bi niba cuoni apo kaa faami.»

⁴⁵ Li *balimaama bangikacianba siiga yendo den goa ki yedi o: «Canbaa, ŋan maadi maama na, a sugidi ti moko.»

⁴⁶ Jesu den goa ki yedi: «Fala baa ye leni yi moko, yinba li balimaama bangikacianba, kelima yi tungi bi niba a tugikpiaga, ya ke yinba yiba kan tuo ki sii ŋa leni yi nubiyenli.

⁴⁷ Fala baa ye leni yi, kelima yi goa ki maa ki ŋanbidi yi yaajanba n den ku yaa sawalipuaba yaa kula.

⁴⁸ Yeni yi tiendi siedi ke yi yama dagidi leni yi yaajanba tuona, kelima bani, bi den ku bi sawalipuaba, ke yi mo maa bi kula po li bontiadikaala.

⁴⁹ Li tie lani yaa po ke wani U Tienu yanfuoma po o maadi Jufinba maama ki yedi ke wani U Tienu n baa soani bikani o sawalipuaba leni o tondiba. Bi baa kpa bine ki faligi bine.

⁵⁰ Lani yaa po U Tienu baa tuu moala na niba bi yaajanba n den ku yaa sawalipuaba ki wuli bi soama panli, ki cili leni Abela soama hali ŋanduna tagima yogunu,

⁵¹ ki pundi hali Sakali yaa soama, ban den ku yua U Tienu diegu nni, li *padibinbinli leni u *kaangagidiŋamu siiga. Yeni de, n yedi yi ke U Tienu baa tu moala na niba laa kuuma kuli panli.

⁵² Fala baa ye leni yi, yinba li bali maama bangikacianba, kelima yi tuudi ki ñani mi bandima buliñoabu sendabiga. Yii kua yiba, yi go yie yaaba n bua ki kua mo yaa po.»

⁵³ Jesu n den ñani lankani, li bali maama bangikaaba leni Falisieninba den tigini o leni mi mapaama, ki buali o yaa bonla n yaba,

⁵⁴ ki dia o ku madiagu, ki bua ki baa o ñoabu nni yaa maama ke bi baa fidi ki gedini ma li bali danba kani.