Luki 10 - Gourmanchéma Bible

¹ Lani yaa puoli o Diedo go den gandi ŋoadikaaba piilele n bilie ki soani ba niba lielie ke bi kua o liiga, ki gedi wani oba n den baa gedi yaa dogi leni yaa kaani kuli.

² O den yedi ba: «U jetaagu yaba ama bi tuonsoanba nan wa. Lanwani yin mia mani u jetaagu Diedo wan soani bi tuonsoanba o jetaagu po.

³ Gedi mani! Diidi ki le, n soani yi nani a pebila yeni i fuasangbanli siiga.

⁴ Yin da taa mani ligiboagili, baa sancenboagili, baa cacaadi, ki da sedi u sanu nni ki fuondi oba.

⁵ Yin kua yaa diegu nni kuli, kpa fuondi mani ki yedi: ‹Mi yanduanma n yaa ye ku naa diegu nni.›

⁶ Yua n bua mi yanduanma yaa ye lienni, yin gaali o yaa yanduanma yeni baa ye leni o. Yua n bua mi yanduanma yeni yaa ye likani mo, yi gaali n guani yi yaa kani.

⁷ Yin yaa ye laa diegu nni ki di ki go ñu ban puuni yi yaala kuli, kelima o tuonsoanlo pundi ki baa o panpaani. Yin da ña diegu nni ki tuadi dietoagu.

⁸ Yin kua yaa dogu nni ke bi ga yi cangu kuli, yin je mani ban puni yi yaala,

⁹ ki paagi yaa yiama n ye likani ki yedi ba: ‹*U Tienu diema nagini yi kani.›

¹⁰ Ama yin kua yaa dogu nni ke baa ga yi cangu kuli, yin ña ki sedi bi sani nni ki yedi:

¹¹ ‹Ti kpia baa yi dogu tama yaama n tabini ti taana yeni. Ama yin bandi bonŋanla ke U Tienu diema nagini.› »

¹² Jesu den pugini ki yedi o ŋoadikaaba: «N yedi yi ke ti buudi daali, Sodoma yaa buudi kaa bia ki pundi laa dogu yaaba buudi.

Yaa dogi n yie Jesu maama

¹³ Fala baa ye leni fini Kolasini dogu. Fala baa ye leni fini Betisayida dogu, kelima yaa bancianma n tieni a niinni ne yaa den tieni hali yogu Tili leni Sidoni dogi nni, bi den baa laa li paboanli tiadi leni mi fantanpienma ki lebidi bi yama.

¹⁴ Lani yaa po, ti buudi daali Tili leni Sidoni dogi yaa fala kan yaa bia ki pundi yi yaa fala.

¹⁵ Fini, Kapenayuma dogu moko, a tama ke a baa fiini a yuli hali tanpoli po bi? Kalam, bi baa jiini a hali bi tinkpiba diema.»

¹⁶ Jesu go den yedi o ŋoadikaaba: «Yua n cengi yi maama cengi n yaama, yua n yie yi mo yie mini, yua n yie mini mo yie yua n soani nni.»

Ŋoadikaaba piilele n bilie guani Jesu kani

¹⁷ Ŋoadikaaba piilele n bilie yeni den guani Jesu kani leni li pamanli ki yedi: «Ti Daano, baa mu cicibiadimu moko tuodi ti maama a yeli nni.»

¹⁸ Jesu den yedi ba: «N den laa ke Sutaani ñani tanpoli ki peli nani mi tañigima yeni ki baa.

¹⁹ N puni yi u paalu ke yi baa fidi ki yaa ŋmaadi i we leni i nami, ki yaa paani yibali paaciamu kuli. Liba kuli kan fidi ki tieni yi yaala n bia.

²⁰ Baa yeni, yin da mangi mani yi pala kelima mu cicibiadimu tuo yi maama, ama yin mangi mani yi pala kelima bi diani yi yela tanpoli po.»

U Tienu Fuoma Yua mangi Jesu pali boncianla

²¹ Lanyogunu liga U Tienu Fuoma Yua den teni ke Jesu pali mangi hali boncianla ke o yedi: «Baa, fini yua n tie tanpoli leni ki tinga kuli Diedo, n pagi a kelima a doagini li naa bonla bi yanfodanba leni bi nunfandanba kuli po, ki doagidi la yaaba n tie nani a biwaala yeni yaa po. Yeni de, Baa, li tie yeni kelima li ŋua a yanjagiŋanli.»

²² Jesu den pugini ki yedi: «N Baa puni nni li bonla kuli bali. Oba kuli ki bani Bijua n tie yua kali Baa bebe, oba kuli mo ki bani Baa n tie yua kali Bijua leni wani Bijua n bua ki doagidi o yua yaa po.»

²³ Lani Jesu den jigidi ki noanli o ŋoadikaaba ki maadi leni bani bebe ki yedi: «Li pamanli ye leni yi kelima yin laa yaala po.

²⁴ Kelima n yedi yi ke bi sawalipuaba leni bi badiba boncianla den bua ki le yin nua yaala na, ki naa laa la, bi den bua ki gbadi yin gba yaala na, ki naa gbadi.»

Samali niŋamo

²⁵ U Tienu *bali maama bangikaciamo yendo den fii ki bua ki biigi Jesu ki yedi o: «Canbaa, n baa tieni lede ki baa yaa miali n kan gbeni?»

²⁶ Jesu den yedi o: «Be diani li *bali maama nni? A cogi be lienni?»

²⁷ O den goa ki yedi o: «Ŋan bua o Diedo a Tienu leni a pali kuli leni a miali kuli leni a fidu kuli leni a yantiali kuli, ki go bua a nisaalilielo nani ŋan bua a yuli maama.»

²⁸ Jesu den yedi o: «A guani ke li tiegi. Yaa tiendi yeni, a baa yaa ye.»

²⁹ Li balimaama bangikaciamo yeni den bua ki saa o yuli po i moamoani ki yedi Jesu: «Ŋme nan tie n nisaalilielo?»

³⁰ Jesu den goa ki yedi o: «O ja den ñani Jelusalema, ki jiidi ki caa Jeliko. O den baa bi sanjiaba siiga, ke bi bibi o, ki fie wan pia yaala ki go pua pua o ki ŋa o ke wani leni mi kuuma ki foagi, ki ban caa.

³¹ Li sua ke bi kopadicianba siiga yendo moko den jiidi ki tagi laa sanu. Wan den laa o ja yeni, o den jadi ki balini ki pendi.

³² Lefi buolu yua moko n den jiidi ki pundi likani ki laa o ja yeni, o den jadi ki pendi.

³³ Ama, Samali yua, den caa u dogu ki cua likani. Wan den laa o ja yeni, mi niñima den cuo o opo.

³⁴ O den nagini ki tieni o nala mi kpama leni duven ki finfini a a caba, ki jagini o wani oba yaa bonjaginkaala po, ki gedini o ki ban baa opo ku candiegu ki kubi o.

³⁵ Lan fii ki fa o den ñani kujapiena lie ki teni ku candiegu daano ki yedi o: ‹Yaa kubi o, ŋan baa biani opo yaala ki pugini line po, n yaa lebidi ki guani, n baa pa ŋa.› »

³⁶ Lani Jesu den buali o ki yedi: «A yaa yama po, bi nitaadiba yeni siiga ŋme tie yua n den baa bi sanjiaba siiga yeni nisaalilielo?»

³⁷ O den goa ki yedi o: «Yua n gbadi opo mi niñima yene.» Jesu den yedi o: «A mo n gedi ki ban yaa tiendi yeni.»

Jesu cani Malata leni Maliyama

³⁸ Jesu go den taa u sanu, wani leni o ŋoadikaaba. O den kua doyendu nni. Yaa pua n yi Malata den ga o cangu.

³⁹ O pua yeni den pia o waalo ke o tie pua ki yi Maliyama. Wani Maliyama den kali Jesu taana kani ki cengi o maama.

⁴⁰ Ku diegu tuonli den yagi Malata yama ke o cuoni ki lindi. O den cua ki yedi Jesu: «N Daano, naani n waalo n ŋa nni ke n tuuni nbebe yeni, laa yia ŋa? Yedi o wan todi nni.»

⁴¹ O Diedo den goa ki yedi o: «Malata, Malata, a yagini a yama ki cuoni ki lindi li bonla boncianla po.

⁴² Ama bonyenla n tie tiladi, Maliyama gandi li bonŋanla, ban kan fie o yaala.»