LOMA YAABA 3 - Gourmanchéma Bible

¹ Lanwani, Jufinba pia be ke li teni ke bi cie yaa ni buoli n sieni? Bi koanciagu mo pia bee fuome?

² Lankuli pia mayuli boncianla li bonla kuli po. Li bonkpiala tie ke U Tienu den piani bani yo o maama.

³ Baa bi siiga bi tianba yaa den tie dugikaaba, naani li baa teni ke U Tienu kaa tie dugika ki kan tieni wan den niani yaala bi?

⁴ Lani ki ye. Tiladi U Tienu tie moamoandaano, baa nilo kuli yaa tie tuofaadaano, nani lan diani maama: «Li tie tiladi ban bandi Ke a tiegi a maama nni, A yaa buni leni bi niba mo, A baa paadi.»

⁵ Lanwani, li yaa tie ke tin tieni yaa biadima teni ke U Tienu *teginma doagidi, ti baa yedi lede? Naani U Tienu ki tiegi o pali yaa beni kelima ti biadima yeni po bi? Min maadi yeni, n maadi nani bi nisaaliba n nua maama.

⁶ Yeni ka. U Tienu yaa tiegi, o baa ga lede ki jia ti buudi leni ŋanduna?

⁷ Li yaa tie ke mini yaa faama teni ke U Tienu moamoani doagidi ki tie o kpiagidi po, be yaa po ke o baa bu ki cuo nni nani n tie ti *tuonbiadi daano yeni?

⁸ Bi nitianba tabi ki tua ke ti yieni: «Tin yaa tiendi yaala n bia kelima li baa teni yaala n ŋani n yuandi ki cua.» U Tienu baa cuo ba lipo nani lan pundi maama.

Niloba kuli ki tiegi U Tienu nintuali

⁹ Lanwani ti baa yedi lede? Naani tinba Jufinba tie nimoanba ki cie nibuotoe bi? Baa waamu. Kelima ti maadi ki doagidi ke bi niba kuli, Jufinba leni bi nilanba kuli tie ti tuonbiadi n die yaaba.

¹⁰ Nani lan diani maama: «Oba kuli ki tiegi, baa niyendo,

¹¹ O yanfodaano naa ye, Niloba ki lingi U Tienu. Bikuli yaadi, Bikuli biidi bi yula.

¹² Yua n tiendi yaala n ŋani naa ye, Baa niyendo.

¹³ Bi niabonma kuli tie nani yaa kuli n yaa yeni Bi landi gbie leni i boandi. Yaa maama n ña bi ñoacuuna nni bia Nani o duduun loabidi yeni.

¹⁴ Bi ñoana gbie leni ti solindi leni ki nanga.

¹⁵ Bi taana jaligi mi soama wulima po.

¹⁶ Ban tagini naankani kuli, Bi ŋa diegbendi leni falabiado.

¹⁷ Baa bani mi yanduanma sanu.

¹⁸ Baa diidi U Tienu leni li fangili.»

¹⁹ To, ti bani ke U Tienu *bali maama n bili yaala kuli tie li bali maama n die yaaba po, ki baa teni nilo kuli ñoabu n mubini, bi niba kuli n tuo ke bi pia i tagili U Tienu nintuali.

²⁰ Kelima niloba kuli kan baa li *moamoansaali U Tienu kani kelima o tiendi li bali maama n yedi yaala. Kelima li bali maama n teni ke o nilo bandi ti tuonbiadi.

U Tienu n tindi bi nisaaliba maama

²¹ Moala po, U Tienu n saa i moamoani maama ke bi nisaaliba tiegi doagidi, ke li naa ;noadi li bali maama kubima. Li bali maama leni bi sawalipuaba kuli tieni lipo siedi.

²² U Tienu saagi i moamoani bi niba po ke bi tiegi kelima li *dandanli Jesu Kilisiti nni yaa po, bani yaaba n tuo ki daani kuli yaa po. Mi gagidima ki ye bi niba siiga,

²³ kelima bikuli tieni ti tuonbiadi ki poadi U Tienu kpiagidi.

²⁴ Ama kelima U Tienu *ŋanbili-paabu yaa po, bi baa li moamoansaali kelima Jesu Kilisiti *daafaabima yaa po.

²⁵ U Tienu den tuodi ki bili ke wani Jesu baa tua i candanbaani padili yaaba n pia li dandanli o soama po kuli yaa po. U Tienu tieni yeni ke wan fidi ki doagidi o teginma, kelima o den juuni leni bi niba n den tieni yaa tuonbiadi u yogunkpelu kaa cuo ba tipo.

²⁶ O den bua ki doagidi o teginma moala po, ke bi niba n bandi ke o tiegi ki go tie yua n puuni li moamoansaali yua n daani Jesu kuli.

²⁷ Lanwani o nisaalo baa kpiagi o yuli kelima be yaa po? Waa go pia li sanu. Mi laa bali maama po? A tuona po bi? A-a, ama li dandanli yaa po.

²⁸ Kelima ti sua ke o nilo baa baa li moamoansaali kelima li dandanli yaa po, ke laa tie li bali maama kubima yaa po.

²⁹ U Tienu tie U Tienu Jufinba bebe po bi? Naani waa tie U Tienu bi nilanba moko yaa po? O tie U Tienu bi nilanba moko po saa.

³⁰ Kelima Tienyendu bebe n ye, yua n baa saa i moamoani yaaba n kua ku koanciagu po kelima bi dandanli po, ki go saa yaaba n tie jifola po moamoani kelima bi moko yaa dandanli yaa po.

³¹ Naani tin wangi li dandanli maama yeni, li bua ki yedi ke ti teni ke U Tienu bali maama ki go pia mayuli bi? Kalam, ti doagidi li bali maama n pia yaa mayuli moamoani.