LOMA YAABA 16 - Gourmanchéma Bible

¹ N bua ki waani yi ke ti kpiilo Febe, Kilisiti n yini yaaba Sankile dogu nni todika, tie yin baa fidi ki dugi yua yaa po.

² Yin ga o cangu o Diedo nni nani lan pundi bi nigagidiŋanba n yaa tiendi maama, ki todi o leni wan baa bua yi todima yaa bonla nni kuli, kelima wani oba todi niba boncianla leni mini moko.

³ Yin fuondi mani Pilisila leni Akilasa, yaaba n tie n tuonsoanlieba Jesu Kilisiti tuonli nni.

⁴ Bi den luni bi yula ki ga n miali. Laa tie mini bebe n tuondi ba lipo, Kilisiti n yini yaaba nitaana bi nilanba siiga kuli tuondi ba lipo.

⁵ Yin fuondi Kilisiti n yini yaaba yaaba n taagi bi yaa diegu nni moko. Yin fuondi mani n buado Epayineta, yua n den kpa daani Jesu Asi diema nni, ki tie wani Kilisiti bonluonka-kpiala likani.

⁶ Yin fuondi mani Maliyama yua n den soani ki todi yi boncianla.

⁷ Yin fuondi mani n kpiiba Andonikusa leni Juniasa, mini leni yaaba n den taani ki ye li kpaadidieli nni. Jesu tondiba siiga bi tie ban jigindi yaaba boncianla. Bi den daani Kilisiti hali ke mini daa daani o.

⁸ Yin fuondi mani Anpiliatusa wani yua n tie n buado o Diedo nni.

⁹ Yin fuondi mani Ulibana, ti tuonsoanlielo Kilisiti nni, leni n buado Sitakisa.

¹⁰ Yin fuondi mani Apelesa wani yua n doagidi ke o se Kilisiti nni ke li pa. Yin fuondi mani Alisitobula denpo yaaba.

¹¹ Yin fuondi mani n kpiilo Elodiono. Yin fuondi mani Nasisa denpo yaaba yaaba n tie o Diedo yaaba.

¹² Yin fuondi mani Tilifena leni Tilifosa, yaa puoba n tuuni o Diedo tuonli boncianla. Yin fuondi mani Pesida ti danlimoano, yua n soani O Diedo tuonli hali boncianla.

¹³ Yin fuondi mani Lufusa o Diedo n gandi yua, leni o naa yua n tie n moko yaa naa.

¹⁴ Yin fuondi mani Asinkilita, Filego, Emesa, Patilobasa, Emasa leni ti kpiiba yaaba n ye leni ba.

¹⁵ Yin fuondi mani Filologa leni Julia, leni Nele leni o naataanpuoga Olinpa leni yaa nigagidiŋanba n ye leni ba kuli.

¹⁶ Yin fuondi mani yiyaba ki gobini yiyaba leni mi buamoanma. Kilisiti n yini yaaba nitaana kuli fuondi yi.

I tundijuodike

¹⁷ N kpiiba, n tundi yi ke yin fangi mani yi yula leni yaaba n fiindi mi paadima ki go tie tingbali bonla yi siiga, ki naa ŋua yin den baa yaa bangima. Yin foagidi mani leni ba.

¹⁸ Kelima laa nibuolu naa tuuni ti Diedo Kilisiti po ka, bi tuuni bi tugiceli po yo. Bi maadi mi madingima leni mi mamanma ki boandi yaaba n ki fani.

¹⁹ Ama yinba wani bi niba kuli bandi yi tuoma. Lani yaa po n mangi n pali yipo. N bua yin yaa fani yaala n ŋani tienma po, ki da pia tagiliba kuli yaala n bia yaa tienma nni.

²⁰ Li kan waagi ke mi yanduanma Tienu baa paadi Sutaani ki madi o yi taana tiipo. Ti Diedo Jesu yaa *ŋanbili n yaa ye leni yi.

²¹ N tuonsoanlielo Timote fuondi yi. N kpiiba Lusiyusa, Jasono leni Sosipateli moko fuondi yi.

²² Mini Tetiyusa yua n diani li naa tili o Diedo nni, n mo fuondi yi.

²³ Min cani yua, Gayusa, Kilisiti n yini yaaba n taagi yua yaa diegu nni, fuondi yi. Elasita, yua n kubi u naa dogu ligi tuonli, fuondi yi, wani leni ti kpiilo Kalitusa kuli. [

²⁴ Ti Diedo Jesu Kilisiti ŋanbili n yaa ye leni yikuli. Amina!]

Ti pagijuodikaadi

²⁵ Tin yaa kpiagidi mani U Tienu, Wani yua n baa fidi ki teni yin yaa se Ke li pa o sanŋoadima nni Nani min wangi yaa Laabaaliŋamo Ki maadi Jesu Kilisiti maama n yedi maama. N wangi o nani U Tienu bondoaginkaala, Yaala n den duagi ŋasiili nni hali yogu, N doagidi maama moala.

²⁶ U Tienu yua n ye yogunu kuli Ñani o ñoabonli Ki yedi ke o bondoaginkaala N doagidi i nibuoli kuli po Kelima o sawalipuaba n diani yaa tila yaa po. U Tienu tieni yeni ki bua Ke i nibuoli kuli n tuo li *dandanli.

²⁷ Tin yaa kpiagidi U Tienu, Wani yua bebe n pia mi yanfuoma kuli, Kelima Jesu Kilisiti po. Tin yaa kpiagidi o hali yaa yogu n tu yaa yogu. Amina!