LOMA YAABA 11 - Gourmanchéma Bible

¹ Lanwani n buali, naani U Tienu luni o nibuolu Isalele yaaba bi? Kalam. Mini nba, n tie Isalele buolu, Abalahama puoliŋuanu leni Benjamina buolu yua.

² U Tienu naa luni o niba cain, wan den tuodi ki bani yaaba hali yogu. Yii bani i Diani n yedi yaala naankani ke *Elia den yenbidi U Tienu kani Isalele buolu yaaba po ki yedi:

³ «N Diedo, bi ku a sawalipuaba, ki go tudi ki luni a *padibinbina. Mini bebe n sieni, ke bi moandi ki baa ñani n moko yaa miali.»

⁴ U Tienu den guani o be? O den goa ki yedi o: «N kubi n yuli po niba tudalele (7 000), yaaba n daa gbaani ki pugi *Baali.»

⁵ Li go tie yeni moala na, Isalele buolu yaaba siiga nitianga sieni, U Tienu n gandi yaaba kelima o *ŋanbili po.

⁶ Lanwani li yaa tie ke o gandima yeni ŋua o ŋanbili, laa ŋua a tuona. Lani yaaka o ŋanbili ki go tie ŋanbili moamoani.

⁷ Lankuli doagidi be? Isalele buolu yaaba naa baa ban den lingi yaala leni li yankuali. Ama bi siiga nni U Tienu n gandi yaaba bebe n baa la, yaaba n sieni kuli yaa pala den juagi.

⁸ Nani lan diani maama: «U Tienu kuani bi niinni Mi guama yantiali ke bi gonbidi. Bi pia i nuni ki naa nua liba, Bi pia a tuba moko ki naa gba liba Ki taa ki pundi hali dinla.»

⁹ Dafidi moko yedi: «Bi saajekaanu n tua bipo diagu Leni taalu leni tingbali bonla, Ban baa bi biadima panpaani.

¹⁰ Bi nuni n tadigi ki da go nua, Bi ciamu n poali ki buani yaa yogunu kuli po.»

¹¹ Lanwani n buali: Naani Isalele buolu yaaba tuudi ki baa yaa yogunu kuli po ki kan go fii bi? Yeni ka. Bi tingbali teni ke bi nilanba fidi ki baa mi *tindima ke lan yaa ñundi bani Isalele buolu yaaba li mutuoli.

¹² To, Isalele buolu tingbali yaa cuani a sela ŋanduna kuli po, ke bi gbalima mo teni ke bi nilanba baa a sela, laa pia kuli tama ke bi yaa guani U Tienu kani li baa cuani ŋanduna kuli po yaa sela n yaba ki cie.

Yaaba n kaa tie Isalele buolu yaa tindima

¹³ Moala n maadi leni yinba bi nilanba kelima n tie U Tienu tondo bi nilanba po. N jigini min pia yaa tuonli bi nilanba siiga,

¹⁴ ke li yaa baa tuo min yaa ñundi n buolu yaaba li mutuoli ke min fidi ki faabi bi siiga bi tianba.

¹⁵ U Tienu n da den yie Isalele buolu yaaba yeni yaa den teni ke ŋanduna yaaba mangi leni o, o yaa goa ki tuo bipo li baa tua lede? Li baa tie nani bi tinkpiba n goa ki baa li miali yeni.

¹⁶ A yaa buuni ti yonbudi ki yidi waamu ki puni U Tienu nani li bonluonka-kpiala yeni, yaadi n sieni moko gagidi U Tienu po. Bu tibu jiinu yaa gagidi U Tienu po, bu beni moko gagidi opo.

¹⁷ Ama li yaa tie ke i bentiami jia ki ñani, ke fini yua n tie *olifie tilianbu yaa benu tugini bi yaa kaanu ki baadi olifie tiŋuukaabu yaa jiini n puuni yaa sinma,

¹⁸ da kpiagi a yuli ki fali ban den jia ki ñani yaa beni. A yaa kpiagidi a yuli, ŋan kpaagi line, a tie benu bebe, fini ka tugi u jiinu, u jiinu n tugi a.

¹⁹ Daalinba a baa goa ki yedi: «Bi den jia ki ñani i benmoani ki baa tugini mini.»

²⁰ Li tie moamoani. Bi den jia ki ñani bani, kelima bi dandanluoma po, fini mo ye lienni kelima li *dandanli yaa po. Lanwani ŋan da kpiagi a yuli, ama ŋan yaa jie.

²¹ Kelima U Tienu yaa den cedi i benmoani yi n den ye i kaanceli, o kan cedi fini moko.

²² Lani yaa po ŋan kpaagi U Tienu ŋanbili leni o mabinli po. O den mabini yaaba n den baa, ki ŋanbi a yaa po, ama se ŋan yaa ye o ŋanbili nni, yaaka o baa jia ki ñani a moko.

²³ Bani Isalele buolu yaaba mo yaa cedi ki naa go suagi liiga bi dandanluoma nni, U Tienu baa goa ki tugini ba bu tiŋanbu nni, kelima wani U Tienu pia u paalu ki baa fidi ki goa ki tugini ba.

²⁴ Li yaa tie ke fini yua n bi tie olifie tilianbu yaa benga den jia ki tugini yaa olifie tibu n tie tiŋuukaabu ki naa tie a yaa buolu kani, lanwani laa pia kuli tama ke bani moko baa fidi ki goa ki tugini bani biba yaa tibu kani nani bi buolu n tie maama.

U Tienu baa juodi ki faabi Isalele buolu

²⁵ N kpiiba, mii bua yaa bondoaginkaala n tie na n yaa boani yi, ke yin da nua yi yula ke yi tie yanfodanba. Laa bondoaginkaala tie ke Isalele buolu siiga bi tianba pala juagi hali bi nilanba n baa kua U Tienu tindima nni ki pundi ki dagidi cain.

²⁶ Li tie yeni ke Isalele buolu kuli baa tindi nani lan diani maama: «O faabika baa ña Siyono po, Ki ñani U Tienu yiema kuli Jakobo puoliŋuani pala nni.

²⁷ Lani n baa tie n *ŋantaado leni ba, Min ñani bipo bi *tuonbiadi yaa yogunu.»

²⁸ A yaa kpaagi Isalele buolu yaaba n yie o Laabaaliŋamo maama, bi tie U Tienu yibalinba yinba bi nilanba yaa ŋamu po. Ama a yaa kpaagi U Tienu gandima po, bi tie U Tienu buakaaba kelima bi yaajanba po.

²⁹ Kelima U Tienu yiinu leni o paabu naa pia lebidima.

³⁰ Puoli po yinba bi nilanba den yie ki naa tiendi U Tienu n bili yaala. Ama moala yi baa ke o gbadi yipo mi niñima kelima bani Isalele buolu yaaba yiema yaa po.

³¹ Li go tie yeni, Isalele buolu yaaba yie ki naa tiendi U Tienu n bili yaala ke bani moko n baa U Tienu n gbadi bipo mi niñima nani wan gbadi yi mo yaa po mi niñima maama.

³² Kelima U Tienu luoni bi nisaaliba kuli bi yiema nni nani li kpaadidieli yeni ke wan yuandi ki gbadi bikuli po mi niñima.

Polo pagi U Tienu

³³ U Tienu ŋalimani yaba, o banma leni o yanfuoma yaba ki ñua ki pendi bi nisaaliba bandima kuli. O yanjaga pendi bi nisaaliba n fidi ki kpaagi yaala. Baa fidi ki bandi yaala yaa po ke o tieni wan tiendi yaala.

³⁴ Kelima li diani: «Ŋme n bani o Diedo kpaagili Ŋme n fidi ki tua o juoginka?

³⁵ Ŋme n den kpa puni U Tienu bu paabu Ke wani U Tienu mo baa guani o tiladi?»

³⁶ Li bonla kuli ñani o yaa kani, wani n kubi likuli, likuli mo ye o yaa po. Wani n yaa baadi ti kpiagidi hali yaa yogunu kuli. Amina!