LOMA YAABA 1 - Gourmanchéma Bible

I fuondi

¹ Mini Polo yua n tie Jesu Kilisiti naacemo, U Tienu n den yini ki gandi yua ke n tua o tondo ki baa wangi o Laabaaliŋamo, n diani li tili yinba yaaba n ye Loma po.

² Hali yogu U Tienu den niani u ñoanianu o Laabaaliŋamo po, ki teni ke o sawalipuaba diani o i Diani yi n gagidi ki ŋani niinni.

³ O Laabaaliŋamo yeni maadi o Bijua maama fuuli. A yaa diidi wan mali yaa buolu nni po, o tie Dafidi puoliŋuanu.

⁴ Ama li doagidi leni U Tienu Fuoma Yua paaciamu po, ke o tie U Tienu Bijua kelima o fiima bi tinkpiba siiga yaa po. Wani n tie ti Diedo Jesu Kilisiti.

⁵ Kelima wani yaa po ti den baa li *ŋanbili ki tua o tondiba, ke tin yaa gobidi i nibuoli kuli ban daani o ki tuo o maama.

⁶ Yi moko tie laa niba siiga yaaba, yinba Jesu Kilisiti n yini yaaba.

⁷ N diani yipo, yinba yaaba n ye Loma ki tie U Tienu buakaaba kuli, wan yini yinba yaaba ke yi gagidi opo. Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

Polo sugini ki gedi ki le Loma yaaba

⁸ N kpa tuondi n Tienu yikuli po, Jesu Kilisiti yaa yeli nni, kelima bi maadi yi *dandanli maama ŋanduna nni kuli.

⁹ U Tienu, min ŋua yua leni li payenli, ki wangi o Bijua yaa Laabaaliŋamo, tie n siedo ke n tiadi ki taagi yikuli yela yogunu kuli

¹⁰ n jaandi nni ki naa cedi. N miadi o ke li yaa tie o yanbuama, min baa u sanu moala wani ki cua yikani.

¹¹ Kelima n bua hali bonŋanla ki le yi, ki boagidi leni yi U Tienu Fuoma n puni yaa paabu, ke yin yaa se ki pa,

¹² bi mo, n yaa cua yikani, tikuli n baa li papaali, kelima mini leni yinba n taani ki pia yaa dandanli yaa po.

¹³ N kpiiba, n bua ke yin bandi ke yaa yogini n yaba n den jagi ki baa cua yikani, ke min fidi ki baa bonluonkaalaba yi siiga nani min de baa nibuotoe siiga maama. Ama hali moala bonlaba yen pigini n sanu ke mii fidi ki cua.

¹⁴ Li tie npo tiladi ke min gedi bi nunfandanba leni bi yanboandanba po, yaaba n bani u cogu leni yaaba n ki bani kuli po.

¹⁵ Lani yaa po n bua hali boncianla ki yaa wangi yinba yaaba n ye Loma moko o Laabaaliŋamo.

O Laabaaliŋamo paalu

¹⁶ Kelima mii jie i fe o Laabaaliŋamo wangima po. Li tie U Tienu paalu yaaba n daani kuli yaa *tindima po, ki cili Jufinba, ki ŋoadi bi nilanba.

¹⁷ O Laabaaliŋamo yeni doagidi U Tienu n saa bi nisaaliba po i moamoani ke bi tiegi maama kelima li dandanli yaa po, leni li dandanli bebe yaa po, nani lan diani maama: «O niteginka baa ye kelima o dandanli yaa po.»

Bi nisaaliba n pia yaa tagili U Tienu kani

¹⁸ U Tienu pabienli doagidi tanpoli po, ki baa cuo yaaba n yie o ki tiendi yaala n ki tiegi kuli, bani yaaba n moandi ki ñii i moamoani leni bi biadima.

¹⁹ Kelima o nilo n baa fidi ki bandi yaala wani U Tienu po doagidi. U Tienu doagidi bipo la.

²⁰ U Tienu paaciamu yu n ki pia gbenma leni wan tie maama naa tie bi nisaaliba n baa fidi ki le yaala. Ama hali ŋanduna tagima yogunu laa bonla kuli doagidi wan tagi yaala yaa niinni. Lani n teni ke baa pia ban baa fidi ki tabi yaala ki ga bi yula.

²¹ Kelima baa ke bi bani wani U Tienu, baa kpiagidi o ki go tuondi o nani lan pundi maama, ama bi yaadi bi yankpaagifana nni. Bi yanpiima teni ke bi kua li *biigili nni.

²² Baa ke bi kpiagidi bi yula ke bi tie yanfodanba, bi tua yanluodanba.

²³ Bi lebidi U Tienu yua n kan kpe yaa kpiagidi, ki kpiagidi a nannana, ya n naani leni o nisaalo yua n baa kpe, leni ti bonyugiditi, leni ti yandi, leni li bonbalinkaala.

²⁴ Li tie lani yaa po yo ke U Tienu mo ŋa ba ke bi pala n bua ban yaa tiendi yaa bonjoagindi kuli diedi ba. Lani, bi jigidi bi yula hali ki tiendi yaala n pia i fe bi gbanandi po.

²⁵ Bi lebidi ki ŋa U Tienu n tie maama moamoani, ki ŋua mi faama. Bi kpiagidi U Tienu n den tagi yaala, ki ŋa wani o Tagido oba, yua n pundi ki yaa baadi ti pagidi hali yaa yogunu kuli. Amina.

²⁶ Li tie lani yaa po ke U Tienu mo ŋa ba ke bi gbanandi fiima, yaama n tie ti cagindi ki jigidi ba, n paadi ba. Baa bi puoba ŋa U Tienu n bili bipo yaala ki cagini bi yula.

²⁷ Bi jaba moko ŋa U Tienu n bili ke ban yaa taagi leni bi puoba maama. Bi gbanandi fiima co nani mi fantama yeni jatoaba po, ki teni ke bi cagini leni jatoaba. Lanwani bi baadi bani biba yaa panpaani n dagidi bi yaadima yeni po.

²⁸ Nani bi nisaaliba n den sua ke laa pundi ban bandi U Tienu yeni, U Tienu mo ŋa ba ke bi yantiabiada paadi ba, ke ban yaa tiendi yaala n ki pundi.

²⁹ Yaala n kaa tiegi kuli gbie bi pala nni, yaala n bia, leni mi ŋaliŋabuama, leni mi biadima. Bi pala go gbie leni li nunponli, leni mi kukpama leni li koanli leni mi niama kuli, leni bu nunfanbiadibu leni ku tugutongu.

³⁰ Bi go tie bi ñoakpalidanba ki maadi bi lieba po yaala n bia leni U Tienu yiekaaba leni bi yusiedanba, leni bi japaadanba, leni yaaba n pagi bi yula. Bi go cili yaa biadima n kaa den kpa ye, ki tie bi danyiekaaba moko.

³¹ Baa pia yanfuoma, baa kuandi ban niani yaa ñoaniani, baa pia nitoaba po padingili leni niñingbadima.

³² Baa ke bi bani U Tienu mabilikaama yaama n tiegi ki yedi ke li pundi ke yaaba n tieni laa bonbiadi buolu n kpe. Ama bi tiendi la bani biba, ki go saagi yaaba n tiendi yeni po i moamoani.