Levi 9 - Gourmanchéma Bible

¹ Dana nii n den pendi, Musa den yini Alono leni o bijaba ki go yini Isalele yaaba nikpela.

² O den yedi Alono: «Ŋan baa naatonbili ti candandi padili po, ki go baa petonli li padijuukaali po, bikuli n yaa ŋani cain ki da pia poadi. A baa cuani ba Li Miali Diedo nintuali.

³ Ŋan go yedi Isalele yaaba n baa li ŋuabuali ti candandi padili po, ki go baa li padijuukaali mo yaa po naabiga leni pebiga, ban pundi binyenli yenli kaa pia poadi.

⁴ Ban go baa mi taanyenma padili yaa naatonli leni li petonli ki padi ba Li Miali Diedo nintuali, leni yaa padili n tie jiema ki kali leni mi kpama. Kelima dinla Li Miali Diedo baa doagidi o yuli yipo.»

⁵ Bi den taa Musa n den waani ba yaala yeni kuli ki cuani u *Kadikaanu gbandieli buliñoabu kani. Li nitaanli kuli den cua ki sedi Li Miali Diedo nintuali.

⁶ Musa den yedi: «Tieni mani Li Miali Diedo n waani yi yaala, lani, wani Li Miali Diedo kpiagidi baa doagidi yipo.»

⁷ O den yedi Alono: «Nagini li *padibinbinli kani ki padi a candandi padili leni a padijuukaali. Tieni yeni ki mia sugili fini aba po leni bi niba kuli po. Lani, ŋan padi bi niba po li padili ki mia bimo yaa po sugili nani Li Miali Diedo n bili maama.»

⁸ Lanwani Alono den nagini li padibinbinli kani ki kodi o*tuonbiadi sugili miabu naatonbili yeni.

⁹ O bijaba den ga mi soama ki teni o, o den tu o nubili mi soama nni ki tieni li padibinbinli yina po, ki wuli yaama n sieni li padibinbinli tiipo.

¹⁰ O den sia ti tuonbiadi sugili padiyanga yeni kpama leni a cayaana, leni mi pualanma li padibinbinli po, nani Li Miali Diedo n den waani Musa maama.

¹¹ Ama o den taa ki ñani ti nandi leni ku gbangu hali li nagili niini po ki sia ki buoni likuli.

¹² Lanwani o den kodi li padijuukaali padiyanga, o bijaba den ga mi soama ki teni o, ke o wuli ma li padibinbinli kaani kuli.

¹³ Bi go den teni o ki padiyanga yeni ke ki jiajia bonjenajena leni li yuli ke o sia li padibinbinli po.

¹⁴ O den ŋuudi a biana leni ti nuadi ki go maani li padijuukaali tanpoli ki sia likuli li padibinbinli po.

¹⁵ Li yaa puoli o den padi bi niba po bi yaa padili. O den taa ti candandi yaa ŋuabuali ki kodi li, ki padi ki mia bipo sugili bi tuonbiadi po, nani wan bi kodi ki padiyankpiaga maama.

¹⁶ O den padi bi niba po li padijuukaali yanliediti yeni ki ŋoadi lan bili maama.

¹⁷ O go den padi yaa padili n tie jiema. O den yidi mi yoma nukuli ki sia ma li padibinbinli po kaa taa leni tiŋaagu kuli yaa padijuukaali.

¹⁸ Lani o den kodi li naatonli leni li petonli ke li tua bi niba po taanyenma padili. Wani Alono bijaba den ga mi soama ki teni o ke o wuli ma li padibinbinli kaani kuli.

¹⁹ Bi den teni o li naatonli yeni kpama leni li petonli yeni juoli leni yaa kpakaagu n ŋuagi ti nuadi leni a cayaana leni mi pualanma.

²⁰ Bi den maani mi kpama yeni a benguna po. Alono den sia mi kpama yeni li padibinbinli po.

²¹ Lani Alono den yua ti padiyandi yeni benguna leni li jienpanli ki tieni yaa bogidili n doagidi ke o teni la Li Miali Diedo, nani Musa n den waani o maama.

²² Alono n den padi ti candandi pada, leni a padijuukaana, leni mi taanyenma pada yeni ki gbeni, o den yugidi o nii ki gaali bi niba. Li yaa puoli o den jiidi ki ñani li padibinbinli kani.

²³ Musa leni Alono den kua u Kadikaanu gbandieli nni. Ban den goa ki ñani, bi den gaali bi niba. Li Miali Diedo kpiagidi yendima den doagidi Isalele yaaba kuli po.

²⁴ Mi fantama den ñani Li Miali Diedo nintuali ki sia a padijuukaana leni yaa pada n sieni kpama kuli li padibinbinli po. Bi niba kuli n den laa lani, bi den kpaani li pamanli kpaani ki baa ki labinilabini.