Levi 8 - Gourmanchéma Bible

¹ Li Miali Diedo go den yedi Musa:

² «Yini Alono leni o bijaba, ki taa ti tiayiekaadi, leni mi gagidima sogima yaa kpama, leni yaa naatonli n baa tua ti candandi yaa padili, ki go taa petona lie leni yaa baabuogu n gbie leni yaa dupen n ki pia *dabinli.

³ Ŋan go yini bi niba kuli mo ban taani u *Kadikaanu gbandieli buliñoabu kani.»

⁴ Musa den tieni Li Miali Diedo n yedi o yaala. Bi niba kuli den taani ki se u Kadikaanu gbandieli buliñoabu kani.

⁵ Musa den waani li nitaanli Li Miali Diedo n yedi wan tieni yaala.

⁶ O den teni ke Alono leni o bijaba nagini. O den wali ba.

⁷ O den lani Alono ki liadibiga, ki ñagini o ciaga li cabiñaginkaali ki lani o li liadicianli mo. Li yaa puoli o den lani o u *benŋuunu ki loli u leni li ñagidu.

⁸ O den joani bi kopadicianba bado benli po li*benliadili ki ŋuuni lienni *Ulima leni Tumima.

⁹ Lani o den yilini o ku yufinfingu ki go cibini o yaa fogiliga n tie wula mi gagidima maalima, nani Li Miali Diedo n den waani o maama.

¹⁰ Lanwani Musa den taa yaa kpama n tie mi gagidima sogima po ki sogi u Kadikaanu gbandieli leni yaala n ye lienni kuli ki gagidi likuli.

¹¹ O den miimii mi kpama li *padibinbinli po hali taalima lele. O den sogi li padibinbinli leni li tuonsoantiadi kuli. O go den sogi ku ñinniditiagu leni ku sedikaanu, ki gagidi likuli.

¹² Musa go den wuli mi kpama Alono yuli po ki sogi o ki gagidi o.

¹³ Musa go den teni ke Alono bijaba nagini. O den lani ba a liada ki ñagini bi ciamu a cabiñaginkaana, ki cibini ba mu fogilimu nani Li Miali Diedo n den waani Musa maama.

¹⁴ O den teni ke bi cuani li naatonli ti candandi padili po. Alono leni o bijaba den maani bi nii li naatonli yeni yuli po.

¹⁵ Musa den kodi ki ga mi soama ki tu ma leni o nubili ki tieni li padibinbinli ñoakunnaadi yi n yugidi po leni li lindima kuli, ki ŋanbi li padibinbinli yeni ke li ŋani cain. O den wuli mi soama li padibinbinli tiipo, ki gagidi li ti *tuonbiadi sugili miabu tuonli po.

¹⁶ O den taa yaa kpakaagu n ŋuagi ti nuadi kuli, leni li puali leni a cayaanlieda leni a kpama, ki sia likuli li padibinbinli po.

¹⁷ Ama o den teni ke bi ñani li naatonli yeni gbangu leni o nandi leni o nuadi kuli li nagili niini po ki sia ke li buodi cain nani Li Miali Diedo n den waani wani Musa maama.

¹⁸ Li yaa puoli o den teni ke bi cuani li padijuukaali petonli, Alono leni o bijaba den maani bi nii li petonli yeni yuli po.

¹⁹ Musa den kodi li ki wuli li soama li padibinbinli kaani kuli.

²⁰ O den paadipaadi li petonli yeni. Lani, o den sia li yuli leni a nanjena leni mi kpama.

²¹ Ama o den taa mi ñima ki ŋuudi ti nuadi leni a biana, ki sia ki buoni li petonli yeni kuli cain li padibinbinli po. Li den tie yaa padili n sia ki buodi cain, yaali yaa nuulu n mani Li Miali Diedo po, nani wani Li Miali Diedo n den waani o maama.

²² Musa go den teni ke bi cuani li petonlieli yaali n tie bi kopadicianba gagidima li tuonli po yaa padili po yeni. Alono leni o bijaba den maani bi nii li petonli yuli po.

²³ Musa den kodi li petonli yeni ki ga mi soama ki tu o nubili mi niinni ki tieni Alono jientubili tiipo, o jiennubijali po leni o jientajenbijali po.

²⁴ O den teni ke Alono bijaba mo nagini o kani. O go den tieni mi soama yua kuli jientubili tiipo, o jiennubijali leni o jientajenbijali, ki yuandi ki wuli mi soama li padibinbinli kaani kuli.

²⁵ Lanwani Musa den paadi ki ñani yaa nankpama n tie ne: li juoli leni yaa kpakaagu n ŋuagi ti nuadi kuli, leni mi pualanma leni a cayaanlieda leni a kpama leni li jienpanli.

²⁶ O go den tuuni ki taa yaa baabuogu n pia yaa dupen n ki pia dabinli ki se Li Miali Diedo nintuali yeni niinni, dupen yendo leni yaa maadili n pua leni mi kpama bonyenli leni yencangiyenli, ki maani mi kpama leni li panli po.

²⁷ O den taa laa bonla kuli ki tebini Alono leni o bijaba nii po ki tieni yaa bogidili n doagidi ke o teni la Li Miali Diedo.

²⁸ Li yaa puoli o den ga ki sia likuli li padibinbinli po, li padijuukaali tanpoli. Lini n tie li kopadician-tuonli kuama padili, yaa padili n sia ki buodi cain, yaali yaa nuulu n mani Li Miali Diedo po.

²⁹ Musa den taa li padipetonli yeni bengunli ki tieni yaa bogidili n doagidi ke o teni la Li Miali Diedo. Laa biinu tie o yaa biinu yo, nani Li Miali Diedo n den bili maama.

³⁰ Musa den taa mi gagidima sogima kpama leni yaa soama n den ye li padibinbinli po ki miimii Alono leni o tiadi po, ki go miimii o bijaba leni bi yaa tiadi mo yaa po. O den tieni yeni ki gagidi Alono leni o tiadi leni Alono bijaba leni bi yaa tiadi.

³¹ Musa den yedi Alono leni o bijaba: «Ŋaani mani ti nandi u Kadikaanu gbandieli buliñoatuogili kani. Yi baa ŋmani ti lankane. Yi baa ŋmani ti leni yaa dupen n ye li kopadician-tuonli kuama baabuogu nni yeni, nani min den waani yi maama, Alono leni o bijaba n baa ŋmani ti.

³² Dupen bi nandi yaa sieni, yi baa taa ki sia.

³³ Yi kan ña u Kadikaanu gbandieli buliñoabu kani hali dana lele, hali yi tuonkuama badu dana n pendi. Yi kopadician-tuonli kuama badu yeni baa yaa tie hali dana lele banlu.

³⁴ Yaala n tieni dinla ne, Li Miali Diedo n bili la ke yin baa yi tuonbiadi sugili.

³⁵ Lanwani yi baa yaa ye u Kadikaanu gbandieli buliñoabu kani hali dana lele, u yensiinu leni ku ñiagu kuli. Yin yaa kubi mani Li Miali Diedo *bali maama kuli ke yin da ti kpe. Lani n tie U Tienu n teni yaa ñoabona.»

³⁶ Alono leni o bijaba den tieni Li Miali Diedo n den teni Musa yaa ñoabona kuli.