Levi 7 - Gourmanchéma Bible

¹ Line n tie mi tudima goaŋanbima padili yaa *balimaama. Li tie yaa bonla n gagidi ki ŋani cain.

² Ban kodi a padijuukaana padiyandi naankani yeni, bi baa kodi mi tudima goaŋanbima yaa padiyandi mo lankane. Bi baa miimii mi soama li *padibinbinli kaani kuli.

³ Bi baa taa ki cuani Li Miali Diedo po yaa nankpanba n tie ne: Li juoli leni yaa kpakaagu n ŋuagi ti nuadi,

⁴ leni a cayaanlieda leni yaa kpama n ye a loga nni, leni mi pualanma ban baa taani ki tabidi ki ñani yaama leni a cayaana.

⁵ O kopadiciamo baa sia likuli li padibinbinli po Li Miali Diedo nintuali. Li tie mi tudima goaŋanbima yaa padili.

⁶ Bi kopadicianba yaa niba yaa siiga yaa bonjala bebe n baa fidi ki ŋmani laa padinandi. Bi baa ŋmani ti yaa kaanu n gagidi kelima li tie yaa bonla n gagidi ki ŋani cain.

⁷ Mi tudima goaŋanbima padili leni ti candandi yaa padili kuli tie balimayenma. Yaa kopadiciamo n padi laa padili ki mia sugili yeni n die ki padiyanga.

O kopadiciamo n die yaala

⁸ O kopadiciamo yaa padi padijuukaali niloba po, wani n die ki padiyanga gbangu.

⁹ Yaa padili n tie jiema mi yaa luoni u fanu nni bi bi yaa luoni ma sanga nni, bi bi yaa sagi ma, yaa kopadiciamo n padi yeni n die laa padili.

¹⁰ Yaa pada n sieni ki tie jiema ama ki nan tie jekaadi ki kali leni mi kpama bi kaa pia kpama, Alono bijaba kuli n die ke gagidima ki ye.

Mi taanyenma pada

¹¹ Mi taanyenma pada po, o nilo n baa padi yaa Li Miali Diedo po, yaa bali maama nne:

¹² Nilo yaa cuani mi taanyenma padili ke li tie tuondi, o baa padi mi taanyenma padiyanga yeni, ki pugini yaa dupen n kali leni mi kpama kaa pia *dabinli, leni yencangili ban wuli yaali yaa po mi kpama, ke lii pia dabinli ki go cuani ban pua yaa lalaadi leni mi yonŋanma leni mi kpama.

¹³ O go baa cuani yaa dupen n pia li dabinli ki taani leni laa jiema kuli, likuli n taani ki tua o tuondi leni o taanyenma padili.

¹⁴ Bi baa ñanñani wan cuani yaa jebuoli yeni kuli kani waamuwaamu Li Miali Diedo po. Yaa kopadiciamo n miimii mi soama yeni n die lani.

¹⁵ Ban ŋmani mi taanyenma yeni padinandi ki go je i tuondi padijiema yeni ban padi yaa daali, ki da tuo liba n faa.

¹⁶ Nilo yaa padi taanyenma padili kelima o den niani nianli bi li yaa tie yanbuama po, bi baa ŋmani ti padinandi ban padi yaa daali. Yaala n sieni, ban faa ki ŋmani.

¹⁷ Ti nandi yaa pundi hali dana taa, ban sia ki buoni ti.

¹⁸ Li yaa tie ke nilo ŋmani o taanyenma padinandi li dataali, Li Miali Diedo kan ga o padili. Li kaa pia opo todima baa waamu, li tie joagindi, yua n ŋmani kuli baa tugi o tagili.

¹⁹ Yaa nandi n tabini yaa bonla n *joagini kuli, bi kan ŋmani ti se ban sia ki buoni ti. Yaa nilo n ki ye leni joagindi kuli baa fidi ki ŋmani laa nandi.

²⁰ Ama o nilo yaa ye leni joagindi ki nan ŋmani mi taanyenma padinandi, Li Miali Diedo n die yaadi yeni, bi baa paadi ki ñani laa nilo o buolu yaaba siiga.

²¹ Yaa nilo n sii yaa bonla n joagini, li yaa tie nisaalo yaa joagindi bi yaa yanga n joagini, bi lan tie yaa joaginbuolu kuli, o yaa ŋmani mi taanyenma padinandi, Li Miali Diedo n die yaadi yeni, bi baa paadi ki ñani laa nilo o buolu yaaba siiga.»

²² Li Miali Diedo go den yedi Musa:

²³ «Yedi Isalele yaaba mine: Yi kan ŋmani nua bi pia bi ŋuabo kpama.

²⁴ Yanga yaa kpe, yaaka fuayanga yaa cuo ga, yi baa fidi ki taa o kpama ki tieni yin bua ki tieni yaala kuli, ama yi kan je ma.

²⁵ Nilo yaa dini ban padi Li Miali Diedo po yaa yandi a padijuukaana yaa kpama, bi baa paadi ki ñani laa nilo o buolu yaaba siiga.

²⁶ Yin da ŋmani soama kuli, ti bonyugiditi, bi ti yandi yaa soama, yin baa yaa ye naankani kuli.

²⁷ Nilo yaa ŋmani soama, lan tie yaa soabuolu kuli, bi baa paadi ki ñani laa nilo o buolu yaaba siiga.»

²⁸ Li Miali Diedo go den yedi Musa:

²⁹ «Yedi Isalele yaaba mine: Nilo yaa padi taanyenma padili, o baa teni Li Miali Diedo wan die yaala.

³⁰ Wani oba baa ñani yaala n baa sia ki buodi lani n tie mi kpama leni li bengunli ki cuani Li Miali Diedo nintuali. O baa tieni yaa bogidili n doagidi ke o teni li Li Miali Diedo.

³¹ O kopadiciamo baa sia mi kpama li padibinbinli po Li Miali Diedo nintuali, li bengunli mo n tua Alono leni o bijaba yaa biinu.

³² Mi taanyenma padili yeni niinni, yi go baa ñani li jienpanli ki teni o kopadiciamo.

³³ Alono bijaba siiga, yua n ga mi taanyenma padili soama leni mi kpama ki cuani li padibinbinli kani, wani n die li panli yeni, o yaa biinu yo.

³⁴ U Tienu wani oba bili ke yinba Isalele yaaba, yin ñani mi taanyenma padiyandi kani a benguna leni a pana ki teni Alono leni o bijaba. Laa bali maama baa yaa ye hali yaa yogunu kuli.»

³⁵ Lani n tie Alono leni o bijaba n baa yaa biinu Isalele yaaba n puuni yaala yaa siiga. Ban wuli bipo mi kpama ki gagidi ba yaa daale ke bi baa laa sanu.

³⁶ Lani n tie Li Miali Diedo n bili yaala Isalele yaaba po, ban teni Alono leni o bijaba, ki cili ban sogi ki gagidi ba yaa daali. Li tie yaa balimaama n baa yaa ye hali yaa yogunu kuli. Isalele yaaba leni bi puoliŋuani kuli baa yaa kubi ma.

³⁷ Lani n tie a padijuukaana leni yaa pada n tie jiema, leni ti candandi yaa pada leni mi tudima goaŋanbima yaa pada, leni bi yaa baa dini kopadiciamo yaa pada leni mi taanyenma yaa pada kuli mabilikaama.

³⁸ Li Miali Diedo den teni Musa laa bali maama ke o ye Sinayi juali yuli po. Ban den ye Sinayi fanpienma nni ke o bili ban yaa kpendinni a pada wani Li Miali Diedo po yaa daale ke o den teni laa bali maama.