Levi 6 - Gourmanchéma Bible

¹ Li Miali Diedo den maadi leni Musa ki yedi o:

² «Waani Alono leni o bijaba yaa *bali maama n tie ne: A padijuukaana bali maama nne. Li padijuukaali baa yaa maa li *padibinbinli po ki yaa dua ki co hali lan ban faa. Mi fantama baa yaa co li padibinbinli po ki kan gbindi.

³ Li yaa fii ki faa, o kopadiciamo baa laa yaa liadicianli n luni leni *len gaali ki go yie yaa banda n luni leni len gaali, ki wodi yaa fantanpienma n ye li padibinbinli po, mi fantama n den sia ki buoni li padijuukaali yeni ki ŋa yaala. Wan wodi ki bili ki balini li padibinbinli.

⁴ Li yaa puoli wan landi o tiadi yeni ki laa tiatoadi, ki taa mi fantanpienma yeni ki ñani li nagili niini ki ban lu ma yaa kaanu n gagidi.

⁵ Mi fantama baa yaa co li padibinbinli po yogunu kuli, man da gbindi. Tiŋaagu kuli o kopadiciamo baa pugini ti daadi, ki maani li padijuukaali po. O go baa sia mi taanyenma padili yaa kpama lipo.

⁶ Mi fantama baa yaa co li padibinbinli po yaa yogunu kuli, mi kan gbindi hali abada.

Yaa padili n tie jiema

⁷ Line n tie yaa padili n tie jiema yaa bali maama. Alono bijaba n baa cua ki padi laa padili li padibinbinli nintuali Li Miali Diedo po.

⁸ Bi siiga yendo baa yidi o nukuli nni yaa yonŋanma n kali leni mi kpama leni a *dugibila. O baa sia laa yoma li padibinbinli po man tua mi tiadima bonla, yaala yaa nuulu n mani Li Miali Diedo po.

⁹ Alono leni o bijaba baa je yaala n sieni laa padili nni u *Kadikaanu gbandieli luolu yu n gagidi yaa niinni. Bi baa je ma ke *dabinli ki ye lienni.

¹⁰ Ban da tieni dabinli lienni. Lani n tie min teni ba yaa biinu, n padijuukaana yaa siiga. Li tie yaa bonla n gagidi ki ŋani cain nani ti candandi yaa pada leni mi tudima goaŋanbima yaa pada yeni.

¹¹ Alono bila siiga, a bonjala kuli baa je laa jiema, kelima ban kpendinni Li Miali Diedo po yaa pada siiga, laa bonla tie ban die yaala hali yaa yogunu kuli. Nitoa yaa sii la kuli yaala n bia baa le o.

¹² Li Miali Diedo den yedi Musa:

¹³ Line n tie Alono leni o bijaba n baa cuani yaa paabu ki pa Li Miali Diedo ki cili ban sogi ba mi kpama ki gagidi ba a pada tuonli po yaa daali. Daali kuli bi baa cuani mi yonŋanma yebiga ki boagidi, boagidima ku tiŋaagu, boagidima ku yenjuogu.

¹⁴ A baa sagi ma leni mi kpama ki sanga nni, ki cabidi boncabacaba ki cuani, man tua yaa paabu yaa nuulu n mani Li Miali Diedo po.

¹⁵ Alono bijaba siiga, bi yaa ti faa ki gagidi yua ke o tua kopadiciamo ki lebidi Alono, o mo baa yaa puuni laa paabu. Li tie yaa padili n baa yaa tiendi Li Miali Diedo nintuali yaa yogunu kuli. Laa paabu kuli baa sia ki buodi cain.

¹⁶ Kopadiciamo n puni yaa paabu kuli baa sia ki buodi cain. Bi kan je bu ba.»

Yaa pada n tie ti candandi po

¹⁷ Li Miali Diedo den yedi Musa:

¹⁸ «Yedi Alono leni o bijaba mine: Ti candandi miabu yaa pada yaa balimaama n tie ne: Ban kodi a padijuukaana yandi naankani yeni, bi baa kodi ti candandi miabu yaa padiyandi lankane, Li Miali Diedo nintuali. Li tie yaa bonla n gagidi ki ŋani cain.

¹⁹ Yaa kopadiciamo n kodi ki padiyanga yeni baa ŋmani ga. O baa ŋmani ga u Kadikaanu gbandieli logagidiko yeni yaa niinni.

²⁰ Yua n sii laa nandi kuli, yaala n bia baa le o. Ki padiyanga soama yaa yadi o kopadiciamo liadili po, yin ŋuudi man yadi o liadili po naani yeni u *kaangagidiŋamu nni.

²¹ Yin ŋaani ti nandi yaa tiagu nni yeni, li yaa tie ban maa yaa tiagu leni ku yoagu yin mudi laa tiagu. Ku tiagu yaa tie kumoandi mo, yin duuni bonŋanla ki ŋuudi ki candi bonŋanla leni mi ñima.

²² Bi kopadicianba yaa niba yaa siiga, a bonjala bebe n baa ŋmani laa nandi, kelima li tie yaa bonla n gagidi ki ŋani cain.

²³ Ama ti candandi yaa pada yaa yandi, ban gedini yaaba yaa soama u Kadikaanu gbandieli tugu nni ki mia ti tuonbiadi sugili u kaangagidiŋamu nni, oba kuli kan ŋmani ti. Bi baa sia ki buoni tikuli cain.