Levi 5 - Gourmanchéma Bible

¹ Li yaa tie nani bi yedi ke siedinba n tieni siedi ki togidi ban laa ki bandi yaala, nilo yaa laa ki bani lan tientieni maama, ama ki yie kaa togidi, o tieni ti*tuonbiadi ki pia i tagili.

² Nilo yaa didi sii yaa bonla n *joagini kaa faami, nani yankpienga, ki yaa tie denyanga bi fuayanga ki joagini, bi li yaa tie yaa bonbalinkaali n joagini, baa o yaa faami, o baa yaa joagini ki yaa ye leni i tagili.

³ Yaaka o nilo yaa sii yaa nilo n joagini yaa joagindi n puodi kaa faami, ki nan ti yuandi ki bandi, o pia i tagili lienni.

⁴ Bi nilo yaa maadi tontoni kaa kpaagi ki poli ke o baa tieni bonla, li yaa ŋani bi li yaa bia, o yaa tieni la kaa faami, ama ki ti yuandi ki bandi, o pia i tagili lienni.

⁵ Yaa nilo n baa i tagili kelima o tieni laa bonbuolu, wan tuo o tuonbiadi ki doagidi ki waani ti.

⁶ Li yaa puoli o baa cuani o tudima yeni goaŋanbima po pesalo bi ŋuasalo ban padi Li Miali Diedo po ki mia opo o tuonbiadi sugili.

A luoda yaa padili

⁷ Nilo yaa luo ki kan fidi ki baa pesalo bi ŋuasalo, wan cuani kpaajefanmu lie yaaka kpaajenawuundi lie o tudima padili po ki padi Li Miali Diedo po. Yendo baa yaa tie ti candandi padili, yendo mo baa yaa tie padijuukaali.

⁸ O baa cua ki teni ba o kopadiciamo. Wani o kopadiciamo baa kpa kodi yua n tie ti candandi padili po yene. O baa kodi o leni o niñiagu ama ki da jia ki jendi o yuli.

⁹ O baa miimii mi soama waamu li *padibinbinli kunu, ki wuli yaama n sieni li padibinbinli tiipo. Li tie ti candandi padili. Li yaa puoli

¹⁰ o baa padi yaa kpaajiega n sieni kan tua padijuukaali ki ŋoadi nani lan bili a padijuukaana po maama. Lanwani o kopadiciamo baa padi o nilo yeni po ki mia opo sugili. O baa baa sugili mo.

¹¹ Nilo yaa luo kaa fidi ki baa baa kpaajefanmu lie, bi kpaajenawuundi lie yeni, wan cuani mi yoma kilo bonba naa ki teni o candandi padili po, kelima li tie tuonbiadi sugili miabu yaa padili.

¹² O baa cuani mi yoma yeni ki teni o kopadiciamo. O kopadiciamo baa yidi nukuli mi tiadima po ki taani leni yaala n baa sia kuli ki sia li padibinbinli po. Li tie ti candandi padili.

¹³ O kopadiciamo baa padi o nilo yeni po, ki mia opo sugili. O baa baa o tuonbiadi sugili mo. O kopadiciamo baa tieni laa padili nani lan tie maama mi jiema padili po yeni.»

Mi tudima goaŋanbima padili

¹⁴ Li Miali Diedo go den maadi leni Musa ki yedi o:

¹⁵ «Nilo yaa miidi kuali ki tudi yaala n gagidi Li Miali Diedo po tudibiadima kaa faami, o baa cuani yaa petonli n ki pia poadi ki padi Li Miali Diedo po lan tua mi tudima goaŋanbima padili. O baa cuo o yanloli nni, ki bandi o dunga n baa pundi maama nani u *kaangagidiŋamu yaa kujapiena yeni.

¹⁶ O baa pugini ki dunga yeni po, kujapiena muu siiga kuli kujapienyenli, kelima wan biidi yaala u kaangagidiŋamu yeni yaa po. O baa teni likuli o kopadiciamo. Lanwani o kopadiciamo yaa padi li petonli yeni, o baa mia opo sugili. O baa baa sugili mo.

¹⁷ O nilo yeni yaa tieni tuonbiadi ki miidi Li Miali Diedo*bali maama maamaba, o yaa tieni yaala n kua, baa o yaa faami, o pia i tagili, o baa ga o tagili panpaani.

¹⁸ O baa cuani o tagili po yaa petonli n ki pia poadi ki cua ki teni o kopadiciamo. O baa cuo li o yanloli nni ke li ŋua ŋan sua ke li dunga pundi maama. O kopadiciamo yeni baa padi o nilo yeni po ki mia sugili wan tieni yaa tudima kaa faami yeni po. Lani o baa baa sugili.

¹⁹ Mi tudima goaŋanbima yaa padile, kelima o tudi Li Miali Diedo po moamoani lige.»

²⁰ Li Miali Diedo den yedi Musa:

²¹ «Nilo yaa tieni ti tuonbiadi ki tudi mini Li Miali Diedo po, ki pua o lielo mi faama wan piani o yaala ke o bili o kani po, yaaka wan suni yaala, bi wan tieni i janbi ki baa yaala po,

²² lani yaaka o yaa piidi bonla ki nia ke waa laa, bi o yaa poli tuofaapoli tuonbiadiba kuli po,

²³ o yaa tieni laa bonla kuli siiga bonliba, o tieni ti tuonbiadi ki kua i tagili nni. O baa goa ki teni wan suni bi wan fie bi wan piidi bi ban piani o yaala, bi wan poli li tuofaapoli yaala yaa po yeni.

²⁴ O baa goa ki guani la ki go maani lipo laa bonla dunga n pundi maama kujapiena muu siiga kuli kujapienyenli. O yaa bandi o tagili yaa daali yeni, o baa goa ki teni o bondaano.

²⁵ Wan tieni yaa tagili Li Miali Diedo po yeni, o baa cua ki teni o kopadiciamo yaa petonli n ki pia poadi. O baa cuo li o yanloli nni ke li ŋua ŋan sua ke li dunga pundi maama. O baa cuani li, lin tua padili o tagili po.

²⁶ O kopadiciamo baa padi laa nilo po ki mia sugili Li Miali Diedo nintuali. O baa baa o tuonbiadi sugili, baa wan tieni yaa tudima ki kua i tagili nni kuli.»