Levi 4 - Gourmanchéma Bible

¹ Li Miali Diedo den yedi Musa: «Waani Isalele yaaba yaa maama n tie ne:

² O nilo yaa tieni *tuonbiadi ki miidi Li Miali Diedo*bali maama maamaba kaa faami, o yaa tieni yaa bonla n kua, yin baa tieni maama nne:

³ Li yaa tie ban den sogi ki gagidi yaa kopadiciamo a pada tuonli po n tieni ti tuonbiadi kaa faami, ki cedi ke bi niba kuli baa i tagili kelima o tudima yeni po, o baa baa yaa naatonli n ki pia poadi ki padi Li Miali Diedo po lan tua ti candandi padili.

⁴ O baa cuani li naatonli yeni u *kaangagidiŋanmoanu nintuali, u *Kadikaanu gbandieli buliñoatuogili kani. O baa maani o nuu li naatonli yeni yuli po, ki kodi li lankani, Li Miali Diedo nintuali.

⁵ O kopadiciamo, ban den gagidi yua a pada tuonli po yeni baa taa li naatonli yeni soama ki kuani u Kadikaanu gbandieli nni.

⁶ O baa tu o nubili mi soama nni, ki miimii taalima lele Li Miali Diedo nintuali, u kaangagidiŋanmoanu*kpalidoaginkaabu po.

⁷ O go baa tieni mi soama ban juugi tulale yaa*padibinbinli po ke li se u kaangagidiŋanmoanu nni yeni yina po. O baa taa yaa soama n sieni ki wuli ma a padijuukaana binbinli yaali n se u Kadikaanu gbandieli buliñoabu kani yeni tiipo.

⁸ O baa ñani ti candandi padili yaa naatonli yeni kpama kuli, lani n tie yaa kpakaagu n ŋuagi ti nuadi kuli.

⁹ O go baa ñani a cayaanlieda leni a kpama leni yaa kpama n ye a loga nni, leni mi pualanma, wan baa taani ki tabidi ki ñani yaama leni a cayaana.

¹⁰ O kopadiciamo baa ñani laa bonla kuli nani ban tiendi maama mi taanyenma padili yaa naatonli po. O baa sia likuli li padijuukaali yaa padibinbinli po.

¹¹ Yaala n sieni lani n tie ku gbangu, ti nandi, li yuli, a biana leni tugu nni yaala leni yaala n ye lienni kuli,

¹² o baa ñani likuli li nagili niini ki bili ban gagidi ki lu ti baadi naankani. O baa maani likuli yaa daadi n maa ban lu ti baadi leni mi fantanpienma yaa tinbengu po, ki sia ki buoni likuli. Lankane ke likuli baa sia ki buodi.

Isalele yaaba kuli yaa padili

¹³ Li yaa tie ke Isalele yaaba nitaanli kuli n tieni ti tuonbiadi kaa faami, ki tieni yaala n kua ki miidi Li Miali Diedo bali maama, baa ke baa bani, bi kua i tagili nni.

¹⁴ Ban tieni yaa tuonbiadi yeni yaa doagidi, bi baa cuani naatonli ki padi ti candandi padili. Bi baa cuani li u Kadikaanu gbandieli buliñoabu kani.

¹⁵ Isalele yaaba nikpela baa maani bi nii li naatonli yuli po U Tienu nintuali, bi siiga yendo n kodi li.

¹⁶ O kopadiciamo, ban den gagidi yua a pada tuonli po yeni, baa taa li naatonli yeni soama ki kuani u Kadikaanu gbandieli nni.

¹⁷ O baa tu o nubili mi soama nni ki miimii taalima lele Li Miali Diedo nintuali, u kaangagidiŋanmoanu kpalidoaginkaabu po.

¹⁸ O go baa tieni mi soama yaa padibinbinli n se u Kadikaanu gbandieli nni yeni yina po Li Miali Diedo nintuali. O baa taa yaa soama n sieni ki wuli ma a padijuukaana binbinli yaali n se u Kadikaanu gbandieli buliñoabu kani yeni tiipo.

¹⁹ O baa ñani li naatonli yeni kpama kuli ki sia ma li padibinbinli po.

²⁰ O baa tieni laa naatonli moko nani ban tiendi ti candandi padili yaa naatonli maama. O baa tieni lini moko yene. O kopadiciamo baa padi bi niba po li padili ki mia bipo sugili yene. Bi baa baa sugili mo.

²¹ Yaala n sieni li naatonli yeni nni, o baa ñani likuli li nagili niini ki sia nani wan den tieni li naatonkpiali maama. Li tie li nitaanli kuli candandi yaa padili.

Yudaano padili

²² Li yaa tie ke yudaano n tieni tuonbiadi kaa faami, ki tieni yaala n kua ki miidi Li Miali Diedo U Tienu bali maama, o kua i tagili nni.

²³ O yaa ti bandi wan tieni yaa tuonbiadi yeni, o baa cuani yaa ŋuabuali n ki pia poadi kuli ki padi ti candandi padili.

²⁴ O baa maani o nuu li ŋuabuali yeni yuli po, ki kodi li ban kodi a padijuukaana yaa yandi naankani, Li Miali Diedo nintuali. Li tie ti candandi padili.

²⁵ O kopadiciamo baa tu o nubili ki padiyanga yeni soama nni ki tieni ma a padijuukaana binbinli yina po. Li yaa puoli o baa wuli yaa soama n sieni li padibinbinli yeni tiipo.

²⁶ O baa sia mi kpama kuli li padibinbinli po nani ban tiendi maama mi taanyenma pada po. O baa padi o yudaano yeni po ki mia opo sugili yene. O baa baa sugili mo.

Nifano padili

²⁷ Li yaa tie ke nifano n tieni tuonbiadi kaa faami, ki tieni yaala n kua ki miidi Li Miali Diedo bali maama, o kua i tagili nni.

²⁸ O yaa ti bandi wan tieni yaa tuonbiadi yeni, o baa cuani yaa ŋuasalo n ki pia poadi ki padi ti candandi padili.

²⁹ O baa maani o nuu o ŋuasalo yeni yuli po, ki kodi o ban kodi a padijuukaana yaa yandi naankani.

³⁰ O kopadiciamo baa tu o nubili ki padiyanga yeni soama nni ki tieni ma a padijuukaana binbinli yina po. Li yaa puoli o baa wuli yaa soama n sieni li padibinbinli yeni tiipo.

³¹ O kopadiciamo baa ñani mi kpama kuli, nani ban tiendi mi taanyenma padiyanga maama yeni, ki sia ma li padibinbinli po lan tua Li Miali Diedo po nuulimanu. O baa padi o nilo yeni po ki mia opo sugili yene. O baa baa sugili mo.

³² Li yaa tie ke o nilo yeni baa cuani o candandi po pia, o baa cuani pesalo yua n ki pia poadi.

³³ O baa maani o nuu o pesalo yeni yuli po, ki kodi o ban kodi a padijuukaana yaa yandi naankani.

³⁴ O kopadiciamo baa tu o nubili ki padiyanga yeni soama nni ki tieni ma a padijuukaana binbinli yina po. Li yaa puoli o baa wuli yaa soama n sieni li padibinbinli yeni tiipo.

³⁵ O kopadiciamo baa ñani mi kpama kuli, nani ban tiendi mi taanyenma padipia maama yeni, ki taani leni yaala n baa sia kuli ki sia li padibinbinli po. O baa padi o nilo yeni po ki mia opo sugili yene. O baa baa sugili mo.