Levi 27 - Gourmanchéma Bible

¹ Li Miali Diedo den maadi leni Musa ki yedi:

² «Maadi leni Isalele yaaba ki yedi ba: O nilo yaa niani Li Miali Diedo nisaalo, li yaa tie ke li daano ti bua ki pa i ligi ki kuani o nianli yeni, diidi li ligi n baa de maama nne:

³ Li yaa tie yaa ja n pia bina piilie ki yaa di caa hali bina piiluoba yaa siiga, o baa bili ke o dunga baa tie kujapiena piimuu, nani u *kaangagidiŋamu yaa kujapiena yeni.

⁴ Li yaa tie pua mo o dunga baa tie kujapiena piitaa.

⁵ Yaa biga n pia bina muu ki yaa caa hali bina piilie yaa siiga, a baa bili ki yaa dunga baa tie kujapiena piilie, bonjaga po, kujapiena piiga bonpuoga yaa po.

⁶ Yaa biga n da pia ŋmayendo ki yaa caa hali bina muu, bonjaga dunga baa tie kujapiena muu, bonpuoga mo kujapiena taa.

⁷ Yaa niba n pia bina piiluoba bi ki cie yeni, a baa bili ke ja yaa dunga baa tie piiga n kujapiena muu, pua mo yaa dunga n yaa tie kujapiena piiga.

⁸ Li yaa tie ke yaa nilo n niani li nianli yeni luo hali ke li pendi ki naa baa fidi ki pa ŋan bili yaa dunga yeni, a baa taa o ki gedini o o kopadiciamo kani. Wani n baa jagi li nianli yeni po, wan sua yua n niani li nianli yeni n baa fidi ki pa yaala.

⁹ Li yaa tie ke li nianli yeni tie yaa yandi n tie ban padi yaa yanbuoli Li Miali Diedo po, ban niani ki puni Li Miali Diedo yaa yanga kuli tie yaa bonla n gagidi ki ŋani.

¹⁰ Bi kan lebidi laa yanga, bi kan cuani yaa yanga n ki ŋani ki lebidi leni yaaga n ŋani. Bi kan cuani yaa yanga n ŋani ki lebidi leni yaaga n ki ŋani. Bi yaa lebidi yaa yanga ki baa teni yantoaga, bani bonba lie yeni kuli baa tie yaala n gagidi ki ŋani.

¹¹ Li nianli yanga yeni yaa tie yaa yanbuolu n *joagini ke bi kan fidi ki cuani ga ki padi Li Miali Diedo po, bi baa cuani ki yanga yeni ki waani o kopadiciamo.

¹² O kopadiciamo baa waani o dunga ki ŋoadi ki yaa ŋani bi ki yaa ŋani. Li nianli dunga baa ŋua o kopadiciamo n baa waani maama.

¹³ Li daano yaa bua ki goa ki da o nianli yanga, o baa pa yeni ki go pugini ki dunga yeni po bonla muu kuli siiga bonyenla.

¹⁴ O nilo yaa puni o dieli kelima li nianli po, ke li gagidi Li Miali Diedo po, o kopadiciamo baa waani li nianli yeni dunga ki ŋoadi li yaa ŋani bi li yaa ŋani. Ki dunga baa se nani o kopadiciamo n waani maama.

¹⁵ O nilo yeni yaa bua ki goa ki da o dieli, o baa pa li dunga yeni ki go pugini li dunga yeni po bonla muu siiga kuli bonyenla. Lanwani o baa ga o cili.

¹⁶ O nilo yaa teni Li Miali Diedo o kuanu boagidima kelima li nianli po, o baa waani ki dunga. A baa biigi leni yaa bonbuolu n baa coagi laa boagidima nni n baa de maama. Yaa bonbuolu n yi *olije yeni a baa biigi leni yaa*bonbiigikaala n yi *omela, li dunga n yaa tie kujapiena piimuu.

¹⁷ Li yaa tie mi *faabima binli ke o puni o kuanu, bi baa ŋoadi ŋan bili yaa dunga.

¹⁸ Li yaa tie mi faabima binli n pendi ke o puni o kuanu, o kopadiciamo baa coadi ki bandi yaa bina banlu n sieni hali mi faabima binli n go baa cua. O baa wadi ki dunga lan yaa de leni yaa bina n sieni, ki bili o nilo yeni po o dunga.

¹⁹ Yua n den teni o kuanu li nianli po yeni, yaa bua ki goa ki da o kuanu, o baa pa ŋan bili opo yaa dunga ki pugini ki dunga yeni po, bonla muu kuli siiga bonyenla. Lanwani o baa ga u.

²⁰ O nilo yeni yaa goa ki da o kuanu, ama ke bi kuadi o kuanu yeni nitoa po, o kan go fidi ki goa ki da laa kuanu.

²¹ Yaa nilo n den da yeni yaa ñani lienni mi faabima binli yaa yogunu, u kuanu yeni baa tua Li Miali Diedo yaa kuanu yo hali yaa yogunu kuli, nani o nilo n niani yaala leni li poli yeni. O kopadiciamo n baa yaa die u.

²² O nilo yaa puni Li Miali Diedo wan da yaa kuanu ke laa tie faali ka,

²³ o kopadiciamo baa waani ki dunga ki ŋoadi yaa bina n sieni hali mi faabima binli n go baa cua. O nilo yeni baa pa ki dunga yenma laa daali, kelima li tie yaa bonla n gagidi Li Miali Diedo po.

²⁴ Mi faabima binli yaa cua, bi baa guani u kuanu yua den kpa kuadi u yeni, wani yua n den die laa tinga yeni.

²⁵ Laa dunga kuli baa ŋua u kaangagidiŋamu yaa kujapiena buolu yo. Kujapienyenli kuli tie gela piilie.

Bu paabu buoli

²⁶ Niloba kan fidi ki taa o yandi bontonkpiaga ki pa kelima yaaba n kpa mali kuli, Li Miali Diedo n die. Li yaa tie nua, pia, bi ŋuabo, Li Miali Diedo n die o.

²⁷ Li yaa tie yaa yanga n joagini yaa bontonkpiaga bi baa goa da ki faabi ga ki ŋoadi ŋan bili kipo yaa dunga, ki pugini ki dunga yeni po bonla muu kuli siiga bonyenla. Bi yaa goa da ki faabi ga, a baa kuadi ga ki ŋoadi ŋan bili yaa dunga yeni.

²⁸ O nilo n baa niani yaala leni li poli ki gagidi yaa bonla kuli o piama kuli yaa siiga Li Miali Diedo po, li kan fidi ki goa ki kuadi, li kan fidi ki goa ki da mo. Baa li yaa tie nilo, bi yanga bi kuanu, bi dieli, o nilo n niani yaala leni li poli kuli, li baa gagidi Li Miali Diedo po cain.

²⁹ Ban niani yaa nisaalo leni li poli, oba kuli kan fidi ki goa ki da ki faabi o, se ban kpa o.

³⁰ Ki tinga bonluonkaala yaa *dim kuli tie Li Miali Diedo yaala, lan tie i kuani yaala bi i koatiidi yaa bonluonkaala kuli, li gagidi Li Miali Diedo po.

³¹ O nilo yaa bua ki goa ki da bonliba o dim yaa niinni, o baa pugini ki dunga yeni po bonli muu kuli siiga bonyenla.

³² Ti yanciandi leni ti yanbidi kuli yaa dim po, o yankpaalo gbiamu n gagidi o yandi siiga, yandi piiga siiga yaa yanga yeni kuli baa tie yaa bonla n gagidi ki ŋani Li Miali Diedo po.

³³ Bi kan biigi ki le ki yanga yaa ŋani bi ki yaa ŋani, bi didi kan lebidi yantoaga mo. Bi yaa ñani yanyenga ki bua ki lebidi leni yantoaga, bani bonba lie yeni kuli baa tua yaa bonla n gagidi ki ŋani. Bi kan fidi ki goa ki da ba.»

³⁴ Lani n tie Li Miali Diedo n den teni Musa yaa bali maama Isalele yaaba po, Sinayi juali po.