Levi 26 - Gourmanchéma Bible

¹ Yin da tieni yi yula po *buli, yin da kpiedi ki sieni bonliba kuli yaa nannanli, bi butanli. Yin da kpie tanli ki nandi nannanliba yi diema nni, ki gbaani ki baa pugi la kelima mini n tie Li Miali Diedo yi Tienu.

² Yin yaa kubi mani n fuodima dana, ki go yaa fangi mani n*kaangagidiŋamu. N tie Li Miali Diedo.

A sela

³ Yi yaa ŋua n mabilikaama, ki kubi n *balimaama ki go tiendi li kuli bonŋanla,

⁴ n baa tuuni yipo ki taaga ki yogunu, ki tinga baa luoni ki bonluonkaala, i koatiidi mo n yaa luoni i bonluonkaala.

⁵ Hali yi baa lendi yi kpaandi ki gbeni, li baa sua ke duven tiidi ciema yogunu pundi. Hali yi baa cie ki gbeni duven tiidi bonluonkaala, li baa sua ke ti jaadi yogunu go pundi. Yi baa di yi jiema ki guodi, ki yaa ye leni mi yanduanma yi diema nni.

⁶ Mini Li Miali Diedo n baa teni mi yanduanma n yaa ye mi diema nni. Yi yaa goa, oba kuli kan yagi yi yama. N baa teni ti fuayanbiaditi n bodi mi diema kuli nni. Ki jugisiega mo kan go poandi yi diema nni.

⁷ Yi baa deli yi yibalinba, yi jugisiemu baa je ba.

⁸ Yi siiga nni, niba muu baa deli niba kobiga, niba koga mo n deli niba tudapiiga (10 000). Ki jugisiega n baa bolini yi yibalinba yi nintuali.

⁹ N baa pegidi ki nuali yipo, ki teni yin yaa maa ki pugidi boncianla, min go kubi min den kuani yaa *ŋantaado leni yi.

¹⁰ Yi baa yaa di li bonkpelila, yi baa ñani li bonkpelila ki lingi li bonpanla po u bilikaanu.

¹¹ N baa tii n diegu yi siiga, n yama kan ña yi niinni mo.

¹² N baa yaa cuoni leni yi, n baa tie yi Tienu, yi mo baa tie n niba.

¹³ N tie Li Miali Diedo yi Tienu yua n den ñani yi Ejipiti diema nni ke yin da go tie yonbi. N den kua kua yi lolima yaa kpaadi, yaadi n den naani leni i naakpakpaadi daagu yeni. N den teni ke yi yaadi yi yula ki cuoni.

Ti solindi

¹⁴ Ama, yi yaa cengi, ki naa tiendi n balimaama ne kuli bonŋanla,

¹⁵ yi yaa ŋa n mabilikaama leni n ñoabonbilikaana, ki naa ŋoadi n balimaama, ki miidi n ŋantaado,

¹⁶ diidi min baa tieni yi yaala: N baa yagi yi yama boncianla, ki teni ku dondongu leni ti ñinwadi, laa yiani yii n baa teni yi nuni n tadigi, ki go je yi miana. Yi baa ko fanma fanma kelima yi yibalinba baa je yi bonbaakaala.

¹⁷ N baa buli yi n nunga ki sedi yipo. Yi yibalinba baa deli ki paadi yi. Yaa niba n nani yi yeni baa die yi, yi baa sani, baa ke oba kuli naa deli yi.

¹⁸ Li yaa tie ke lankuli tieni, ama baa yeni, yi yaa tuo ki cengi n maama, n go baa faligi yi taalima lele yi*tuonbiadi po.

¹⁹ N baa pua ki mudi yi fidu japaadi kuli. N baa teni tanpoli n tua yipo nani ti kudi, ki tinga mo baa tua nani ti kumoandi.

²⁰ Yi baa tuuni ki biandi yi fidu fanma fanma. Yi tinga kan luoni yipo ki bonluonkaala, ki tinga tiidi mo kan go luoni yipo bonluonkaala.

²¹ Yi yaa go yie ki pugini ki naa bua ki cengi n maama, n go baa pua yi taalima lele nani yi tuonbiadi n tie maama.

²² N baa soani ti fuayandi yi kani tin fii yipo ki kpa yi bila ki go bolini yi yandi. Yi niba baa wadi. Yi sani nni mo kan go yaa pia niba.

²³ Baa leni lankuli yi yaa cedi ke n tundi yi, ke yi go baa yiedi nni,

²⁴ mini moko baa yie ki go pua yi taalima lele goga yi tuonbiadi po.

²⁵ N baa teni yaa jugisiega n baa tu li panli n cua ki tu yi panpaani n ŋantaado miidima po. Yi yaa taani ki kua yi dociamu nni, n baa soani u yianbiadipuodiko yi siiga, ki go taa yi ki teni yi, yi yibalinba nuu nni.

²⁶ N baa muni yi mi jiema hali yaala ke puoba piiga baa pua bi dupen dupenpuakaanyendu. Bi baa cabidi cabidi ki boagidi hali yaala ke yi baa je ki kan go guo.

²⁷ Baa leni lankuli yi yaa cengi n maama ki go baa yiedi npo,

²⁸ n baa sedi yipo leni li pabienli ki pua ki faligi yi taalima lele goga yi tuonbiadi yaa po.

²⁹ Yi baa ŋmani yi bijaba nandi ki go ŋmani yi bisiaba nandi.

³⁰ N baa bolini yi buli yii n ye a juana po, ki go bolini yin den fiini ki sieni yaa nannana u yienu yaa jaandi po. N baa teni yi buli tinkpiba n dogini ki taani leni yi bucaba caba yeni. N baa nandi yi hali boncianla.

³¹ N go baa bolini yi dogi, yin tua diegbendi. N baa bolini yin padi yi buli naankani yeni. N kan go tuo ki ga yi tulale pada nuulimanu.

³² Mini nba, n go baa bolini mi diema, yi yibalinba yaaba n baa cua ki kali mi niinni mo, li pakili n cuo ba.

³³ N baa yadi yadi yi kuli ŋanduna nibuoli siiga, ki noadi n jugisiega ki ŋoadi yi puoli. Yi diema yeni baa ye leni li paboanli, yi dogi mo kuli kan go yaa pia niba.

³⁴ Laa yogunu mi diema baa pia mi fuodima bina. Mi diema yeni n ye leni li paboanli yaa yogunu, ke yimo yadi ki ye yi yibalinba diema nni yaa yogunu banlu yeni, mi diema baa fuo laa bina banlu. Mi baa baa mi fuodima bina.

³⁵ Yaa yogunu ke mi diema ye leni li paboanli yeni, mi baa baa ki fuodi man kaa den baa yaa fuodima bina, yin den ye mi niinni yaa yogunu.

³⁶ N baa teni ti jawaanciandi n cuo yaa niba n sieni yi buolu nni yeni. Baa ku faaligu n figi ki tieni yaa fuugu baa deli ba. Bi baa sani nani bi deli ba leni mu jugisiemu, ki yaa baali ke oba kuli naa deli ba.

³⁷ Bi niba yeni baa tuudi ki baali biyaba po, ki bua sani ki cia, nani ki jugisiega n deli ba yeni, ke oba kuli naa deli ba. Yi kan fidi ki sedi yi yibalinba nintuali.

³⁸ Yi baa bodi i nibuoli siiga. Yi yibalinba yeni yaa diema mo n baa je yi.

³⁹ Yi siiga yaa niba n sieni ki ye yi yibalinba diema nni yeni, bi jigi baa cie ban dondi boncianla, kelima bi tagili po. Bi jigi baa cie, ban dondi boncianla kelima bi baanba tagili po.

U Tienu baa tiadi o ŋantaado po

⁴⁰ Laa yogunu bi baa tuo bi tagili leni bi baanba mo yaa tagili, ki go tuo ban den miidi n bali maama ki yiedi nni maama.

⁴¹ Mini moko baa yie bipo ki kuani ba bi yibalinba diema nni. Lanwani leni bi pajoagima kuli, bi baa miini bi yula ki pa bi tagili panpaani kuli.

⁴² N go baa tiadi ki kubi min den kuani yaa ŋantaado leni Jakobo. N baa tiadi ki kubi min den kuani yaa ŋantaado leni Isaaka leni Abalahama kuli. N baa tiadi n diema yeni po.

⁴³ Bi baa ŋa mi diema, man yaa pia mi fuodima bina baa ke mi foagi leni ba. Bi baa pa bi tagili panpaani kelima bi ŋa n ñoabonbilikaana, ki nandi n mabilikaama mo.

⁴⁴ Ama baa bi yaa ban ye bi yibalinba diema nni, n kan yie ba cain. N kan yaa nani ba hali ki bolini ba, ki ŋa min den kuani leni ba yaa ŋantaado. N tie Li Miali Diedo bi Tienu.

⁴⁵ N baa tiadi min den kpa kuani yaa ŋantaado kelima bi yaa po, yua yaa po ke n den ñani ba Ejipiti diema nni i nibuoli nintuali, ke min yaa tie bi Tienu. N tie Li Miali Diedo.»

⁴⁶ Lani n tie Li Miali Diedo n den bili yaa mabilikaama leni yaa ñoabonbilikaana leni yaa bali maama kuli. O den maadi leni Musa Sinayi juali po ki bili laa maama wani Li Miali Diedo leni Isalele yaaba siiga.