Levi 25 - Gourmanchéma Bible

¹ Li Miali Diedo den maadi leni Musa Sinayi juali po ki yedi:

² «Maadi leni Isalele yaaba ki yedi ba: Yi yaa kua ki kali min baa pa yi yaa diema nni, ki tinga baa baadi mi fuodima. Li baa tie fuodima Li Miali Diedo kpiagidi po.

³ Bina luoba yi baa ko yi kuani, yi baa go cuadi yi duven tiidi beni ke yi luoni, yi baa taagi yi kuani kuli bonluonkaala.

⁴ Ama li binleleeli baa tie mi fuodima, ki tinga fuodima binli. Li baa tie fuodima Li Miali Diedo kpiagidi yaa po. Laa binli yi kan coagi yi kuani, yi kan cuadi yi duven tiidi beni mo.

⁵ Yi kan yendi yaa *ŋalikama n baa tiipo ki pudi oba, ŋalikama liana yeni. Yi kan cie yaa duven tiidi n ki den cuadi n loni yaa bonluonkaala. Li baa tie ki tinga po mi fuodima binli.

⁶ Ki tinga n loni yaala mi fuodima binli yeni baa tie mi jiema yinba leni yi niba, yi yonbi leni yi potuada, yi tuonsoanba leni yaa canba n kaa yi siiga kuli yaa po.

⁷ Laa bonla kuli go baa tie mi jiema yi yandi po leni yaa fuayandi n ye yi diema nni yaa po.

Mi faabima binli

⁸ A go baa coadi mi fuodima bina, bina lele hali taalima lele. Laa fuodima bina lele yeni baa taani ki yaa tie piinaa n bina yia.

⁹ Cilele yaa danpiiga daali yi baa teni ban piebi li naatuntunli, ti *tuonbiadi sugili miabu yaa dacianli yeni yaa po. Yi baa piebi li naatuntunli yi diema kuli nni.

¹⁰ Yi baa gagidi i binpiimuudi binli yeni, ki kpaani ki waani mi *faabima maama mi diema nni yaaba n den ye ti yonbidi nni kuli yaa po. Li baa tua yipo *faabima binli, nilo kuli baa goa ki kuni o yaa tinga po, nilo kuli baa goa ki taani leni o yaa buolu.

¹¹ I binpiimuudi baa tie yipo faabima binli. Yi kan ko, yi kan yendi ki bili yaa ŋalikama n pudi oba. Yi kan cie yaa duven tiidi n ki den cuadi n loni yaa bonluonkaala.

¹² Kelima li baa yaa tie mi faabima binli, ki tie yipo yaa bonla n gagidi ki ŋani. Yi baa di yaala n pudi yi kuani nni yaa bonluonkaala laa binli.

¹³ Mi faabima binli yeni niinni, nilo kuli baa guani wan die yaa tinga yaa niinni.

¹⁴ O nilo yaa kuadi o lielo po bi o yaa da o kani bonliba, oba kuli n da janbi o lielo.

¹⁵ A yaa baa da u kuanu a lielo kani, a baa coadi hali mi faabima binli n pendi lan pundi yaa bina banlu, o mo n kuadi apo ki coadi ŋan baa ko ki pedi yaa bina banlu.

¹⁶ A bina yaa yaba, a baa pugini ki dunga. A bina yaa yaba, a baa wadi ki dunga, kelima o baa kuadi apo ki ŋoadi wan koni ki pedi yaa bina banlu.

¹⁷ Oba kuli n da janbi o yua. Ŋan fangi a Tienu kelima n tie Li Miali Diedo a Tienu.

¹⁸ Yin yaa tiendi mani n mabilikaama bonŋanla, ki yaa kubi n ñoabonbilikaana, lani yi baa yaa ye leni mi yanduanma mi diema nni.

¹⁹ Ki tinga baa luoni ki bonluonkaala, yi kuli mo baa di ki guodi, ki yaa go ye leni mi yanduanma.

²⁰ Yi yaa yedi: ‹Ti baa je be li binleleeli, kelima ti kan ko, ti kan yendi yaala n pudi liba yaa bonluonkaala?›

²¹ N baa wuli yipo n seli li binluobili, ki tinga baa luoni yaala n baa dagidi bina taa yaa jiema po.

²² Li binniili yi baa ko ki go di li bonkpelila hali li binyiali. Yi baa di li bonkpelila hali li bonpanla n baan be.

Mu tinmu daama bali maama

²³ Mi diema tinga kan kuadi cain cain, kelima mini n die mi diema, yimo cua ki kali n diema nni nani bi canba leni bi nilanba yeni.

²⁴ Yin baa yaa die yaa diema kuli yaa niinni, yi baa bili li bali maama mu tinmu yaa goadaama po.

²⁵ A kpiilo Isalele nni yaa laa fala ki luo cain hali yaala ke o kuadi o tinga boagidima, yaa nilo n pia mi goadaama bali o danba siiga yeni, wani n baa cua ki goa ki da o nilo n den kuadi yaala.

²⁶ O nilo yeni yaa pia o nilo yua n pia mi goadaama bali, ama ke o ti yuandi ki baa yaala n dagidi ki goa ki da o tinga,

²⁷ o baa coadi ban den da ki koni yaa bina yeni, ki goa ki pa yua n den da yeni yaa ligi n dagidi leni wan den pani ki maani yaala hali mi faabima yaa cuama.

²⁸ O nilo yeni yaa fidi ki goa ki da o tinga o yuli po, yua n da yeni baa kubi wan den da yua yaa tinga yeni hali mi faabima binli. Mi faabima binli yaa cua, o nilo yeni baa goa kua o tinga nni, yua n den da ga yeni mo n ña.

²⁹ O nilo yaa kuadi yaa dieli n se yaa dociamu n pia u bilinu niinni, o pia li bali ki goa ki da li binyenli yaa banlu po bebe. Mi goadaama bali sedi binyenli po bebe.

³⁰ Ama yaa dieli n se yaa dociamu n pia u bilinu yaa niinni yeni, bi yaa goa ki da li dieli, ki cedi hali li binli pendi, yua n den da li dieli yeni baa die li hali yaa yogunu kuli hali o puoliŋuani po. Mi faabima binli yua n den kpa die li kan go ga li.

³¹ Ama yaa diena n ye a dobila nni, ya n ki pia bilini yeni, a diena yeni baa tie yenma leni u kuanu tinga daama. Yaaba n kuadi fidi ki goa ki da, mi faabima binli yua n den da yeni baa ña lienni.

³² Lefi buolu yaaba dogi leni bi diena maama yaa po, Lefi buolu yaaba n pia mi goadaama yaa bali hali yaa yogunu kuli.

³³ Yaa nilo n goa ki da Lefi yua kani, mi faabima binli o baa ña wan da yaa dieli nni, ki go ña o dogu nni kelima Lefi yaaba dogi leni bi diena yeni n tie bi yaa biinu Isalele yaaba siiga.

³⁴ Yaa tinmu n ye Lefi yaaba yaa dogi lindima po mo kan fidi ki kuadi. Lefi yaaba bebe n baa yaa die mu hali yaa yogunu kuli.

A luoda panli dinma

³⁵ A kpiilo Isalele nni yaa tua luodo, ki ku leni a, ki naa pia yaala n baa kubi o, ŋan kubi o, baa o yaa tie caano bi nilamo, ke wan yaa ye leni a.

³⁶ Ŋan da ga o kani ti ñuadi, ama ŋan yaa jie a Tienu ki cedi a kpiilo n yaa ye leni a.

³⁷ Ŋan da ledi o i ligi ki lingi o kani ñuadi. Ŋan da ledi o jiema mo ki go lingi o kani ñuadi.

³⁸ N tie Li Miali Diedo yi Tienu yua n den ñani yi Ejipiti diema nni, ki puni yi Kanana diema, ke min tua yi Tienu.

Bi niba daafaabima yaa sanbili

³⁹ A kpiilo Isalele nni yua yaa tua luodo ki ku leni a, ki nan kuadi o yuli apo, ŋan da o leni a ligi, ŋan da puogi o yonbituonli ki yaa nua o nani o yonbo yeni.

⁴⁰ O baa ye a kani nani o tuonsoanlo, bi nani o caano yeni. O baa tuuni apo hali mi faabima binli.

⁴¹ Laa yogunu o baa ña a diegu nni wani leni o bila kuli ki guani o buolu nni, ki goa ki kuni o baanba tinmu po.

⁴² Kelima bi tie n yaa naacenba, min den ñani yaa niba Ejipiti diema nni. Bi kan go kuadi ba nani ban kuadi i yonbi maama.

⁴³ Ŋan da diedi o leni u paalu, ŋan yaa fangi a Tienu.

⁴⁴ Yi baa baa yi yonbi leni yi potuada yaa nibuoli n lindi yi yaa kani. Yi baa da yi yonbi leni yi potuada bi yaa kani.

⁴⁵ Yi go baa fidi ki da yaa nilanba n kaa yi diema nni yeni yaa bila, bi buolu siiga ban mali yaa bila yi diema nni yeni. Yi baa fidi ki diedi bani ban tua yi piama.

⁴⁶ Yi baa fidi ki ŋa laa yonbi ban tua li faali yi bila po nani ŋalimani yeni. Yi baa fidi ki kubi ba ban yaa tie yi yonbi yaa yogunu kuli. Ama yi kpiiba Isalele yaaba wani, oba kuli kan diedi o kpiilo leni u paalu.

⁴⁷ Li yaa tie ke yaa nilamo n kaa yi siiga tua piado, ke a kpiilo Isalele nni yua tua luodo, ke a kpiilo kuadi o yuli o nilamo po, bi o caano po, bi o nilamo yeni buolu siiga yua po,

⁴⁸ wani yua n kuadi o yuli yeni pia mi goadaama yaa bali. O kpiiba siiga yendo baa fidi ki goa ki da o ki faabi o.

⁴⁹ O baa kpelo bi o waalo, bi o baa kpelo bi o waalo yaa bijua, bi wani leni yua n kpi bonŋanla yaa siiga baa fidi ki goa ki da ki faabi o. Lani yaaka o nilo yeni yaa yuandi ki baa yaala n dagidi, o baa fidi ki goa ki da ki faabi o yuli.

⁵⁰ Wani leni yua n den da o yeni baa coadi a bina, ki cili wan den da o yaa binli ki ban pundi hali mi faabima binli. Wan baa pa yaa dunga baa ŋua a bina n de maama. Bi baa coadi nani o tuonsoanlo yaa tuonli bina n de maama.

⁵¹ A bina da yaa go yaba, o baa pa yaa dunga n dagidi leni a bina yeni, ban den da o yaa bina yaa po.

⁵² Li yaa sieni bina waamu mi faabima binli n pundi, bi baa coadi ki goa ki pa yaa dunga n dagidi laa bina banlu po.

⁵³ O baa tie nani ban taa yaa tuonsoanlo binmunli tuona po, o canbaa n kan diedi yua leni u paalu a nunbu nni.

⁵⁴ Bi yaa fidi ki goa ki da ki faabi o, o baa faabi mi faabima binli wani leni o bila kuli.

N tie Li Miali Diedo yi Tienu

⁵⁵ Kelima Isalele yaaba tie mini Li Miali Diedo yaa naacenba, min den ñani yaaba Ejipiti diema nni. N tie Li Miali Diedo yi Tienu.